މިހާރު ކުރިއަށްދާ ގޯލްޑަން ފުޓްސަލް މުބާރާތުގައި މިރޭ ނާވައިދޫއާއެކު ކެލާ ކުޅޭނެއެވެ.
މިރޭ 8.00ގައި ކުޅޭ މި މެޗަކީ މި ދެ ޓީމު ވެސް މި އަހަރުގެ ޒޯނުގެ ބުރުގާ ކުޅޭ ފުރަތަމަ މެޗެވެ. ނާވައިދޫއަކީ ޒޯނުގެ މެޗުތަކަށް އެތައް ފަހަރަކު ކުޅެފައިވާ ޓީމެކެވެ. ނަމަވެސް ނާވައިދޫއާ، ބައްދަލުކުރާ ކެލައަކީ މި މުބާރާތުގެ ޒޯނުގައި މުޅިން އަލަށް ކުޅޭ ޓީމެކެވެ.
ނާވައިދޫ ޒޯނަށް ދަތުރުކުރީ ހދ. އަތޮޅު ޗެމްޕިއަނުންގެ ގޮތުގައެވެ. ކެލާ ޒޯނު ބުރުން ޖާގަ ހޯދީ ހއ. އަތޮޅުގެ ރަނަރއަޕް ޓީމުގެ ގޮތުގައެވެ.
މި ދެ ޓީމަށް ބަލައިއިރު ނާވައިދޫއަކީ ހދ. އަތޮޅުގެ ޗެމްޕިއަންކަން އެއް ފަހަރަށް ވުރެ ގިނަ ފަހަރު ހޯދާފައިވާ، މޮޅު އެތައް ކުޅުންތެރިއެއް ހިމެނޭ ޓީމެކެވެ. ރާއްޖޭގެ ފުޓްސަލްގަ ނަން މަޝްހޫރު ކުޅުންތެރިން ވެސް ނާވައިދޫ ޓީމުގައި ހިމެނެއެވެ. މަދު ކުޅުންތެރިންނާއެކު ނުކުމެ، ރަނގަޅު ނަތީޖާތަކެއް ހާޞިލްކުރަމުން އަންނަ ކެލާ ޓީމުގައި ވެސް ހުނަރުވެރި މޮޅު ކުޅުންތެރިންތަކެއް ނުހިމެނެއެކޭ ދެންނެވޭކަށް ނެތެވެ.
ޒޯން 1 ގައި މިރޭ ނާވައިދުއާއި، ކެލާ ކުޅޭ އިރު އަނެއް ދަނޑުގައި އެ ގަޑީގައި މާރަންދުއާއި، ނޮޅިވަރަމްފަރުގެ މެޗު ވެސް ކުރިއަށް ދާނެއެވެ.
މި މެޗުގެ ފޯރިއާ ޖޯޝްއުފައްދިނުމަށް ކެލާ، މާރަންދޫ، ނޮޅިވަރަމްފަރު އަދި ނާވައިދޫގެ ސަޕޯޓަރުން ހުޅުމާލޭ ރެހެންދި ފުޓްސަލް ދަނޑަށް ހާޒިރުވުމަކީ ކުޅުންތެރިންނަށް ލިބިގެންދާނެ އިތުރު ހިތްވަރެކެވެ.
