މި ފެންނަނީ ކެލާ ރައްޔިތުންގެ ދުޅަހެޔޮކަން އެހެން ހަރުފަތަކަށް ގެންގޮސްދޭނެކަމުގެ ހުރިހާ އުންމީދަކާ ގުޅިފައިވާ ކެލާ ޞިއްޙީ މަރުކަޒަށް އިތުރުކުރެވޭ ޢިމާރާތެވެ.
އިތުރުކުރެވޭ ޢިމާރާތެކޭ ދެންނެވިއަސް މިއީ އެއް ޢިމާރާތެއް ނޫނެވެ. ޖޫނިއަރ ހޮސްޕިޓަލަކަށް ވުރެ މި ތަން ކުޑަވާނެ ކަމަކަށް ލަފައެއް ނުކުރެވެއެވެ. އެކި ފަންގެފިލާތައް ހިމެނޭ 3 ޢިމާރާތެއް މިތަނުގައި ބިނާކުރެވޭ ކަމަށް މަޢުލޫމާތު ލިބިފައި ވެއެވެ.
މި ދެންނެވި 3 ޢިމާރާތުގެ ތެރޭގައި 3 ފަންގެފިލާ ހިމެނޭ އެކޮމޮޑޭޝަން ބްލޮކެއް ވެސް ހުރެއެވެ. މި ބްލޮކުގެ ކޮންމެ ފަންގެފިލާއެއްގައި 2 ކޮޓަރީގެ 2 އެޕާޓްމަންޓް ހުންނަ ކަމަށް ވެސް ވެއެވެ. މިހާރު ޕައުންޑޭޝަން އެޅުމަށް ކޮންނަމުންދަނީ އެކޮމޮޑޭޝަން ބްލޮކެވެ.
މިހާރު ފެންނަން މި ހުރީ، ނިމުނު ސަރުކާރުގެ މިނިސްޓަރެއްގެ ހިއްސާ އޮތް ކުންފުންޏަކާ ޙަވާލުކޮށްގެން ފައްޓާފައިވާ މި ޕްރޮޖެކްޓްގެ މަސައްކަތް ކުރިއަށް ނުދާތީ، އެއްބަސްވުން ބާޠިލް ކުރިއިރު، މަސައްކަތް ކުރިއަށް ގޮސްފައިވާ ވަރެވެ. ދާދި ފަހުގެ ތާރީޚެއްގައި އެހެން ކޮންޓްރެކްޓަރަކާ މި ސަރުކާރުން ވަނީ މަސައްކަތް ޙަވާލުކޮށްފައެވެ.
ފެޑޯ ކޮމްޕެނީ ޕްރައިވެޓް ލިމިޓެޑާ ޙަވާލުކޮށްގެން މިހާރު ކުރިއަށްގެންދާ މި ޕްރޮޖެކްޓަކީ ކެލާ ރައްޔިތުންގެ ޞިއްޙީ ދުޅަހެޔޮކަން ރައްކާތެރިކޮށްދިނުމުގައި މުހިންމު ދައުރެއް އަދާކުރާނެ ޕްރޮޖެކްޓެކެވެ. މަސައްކަތް ކުރިއަށް ނުގޮސް އަދިވެސް މަޑުޖެހިފަ އޮތުމަކީ ކެލާ ރައްޔިތުންގެ ކަަންބޮޑުވުމަށް ނިމުން ނާންނަ ކަމެކެވެ.
ހަލުއި ކަމާއެކު ރައީސް ޑޮކްޓަރ މުޙައްމަދު މުޢިއްޒުގެ ސްޕީޑުގައި މި ޕްރޮޖެކްޓްގެ މަސައްކަތް ކުރިއަށްދާތަން ދެކެން ކެލާގެ ކޮންމެ ރައްޔިތަކު ވެސް ބޭނުން ވެއެވެ. ހޮސްޕިޓަލުގެ ޚިދުމަތް ކެލާ ރައްޔިތުންނަށް ލިބުމުގެ ހުރިހާ އުންމީދެއް ވެސް ގުޅިފައި ވަނީ މި ޕްރޮޖެކްޓްގެ މަސައްކަތް ނިމިގެން ކަމަށްވާތީވެ.
