ކެލާ ޔޫތު ފޯރަމް އުފެދުނީންސުރެ ކޮންމެ އަހަރެއްގެ ރަމަޟާންމަހާ ގުޅިގެން ބާއްވާ ސިލްސިލާ މާހެފުން ރޭ ބާއްވައިފިއެވެ.
އެ ޖަމްޢިއްޔާގެ ހޯލުގައި އޮތް މާހެފުމުގެ މި ޙަފުލާގައި އެ ޖަމްްޢިއްޔާގެ މެންބަރުންނާއި، އެ ޖަމްޢިއްޔާގެ ސްޕޯރޓްސް އެކަޑަމީގެ ދަރިވަރުންނާއި ބެލެނިވެރިން ވެސް ބައިވެރިވެލެއްވިއެވެ.
25އަކަށް އަހަރުވީ ކެލާ ޔޫތު ފޯރަމަކީ ކެލާގެ ތަރައްޤީ މުހިންމު ހިއްސާދާރެކެވެ. މެދު ނުކެނޑި ފޮނި އަރުތަކެއް އެ ޖަމްޢިއްޔާއިން އަންނަނީ ހޯދަމުންނެވެ.
އަތޮޅުގެ ޤުރުއާން މުބާރާތްތަކުން ކެލާގެ ދަރިވަރުން ހޯދި ރަންވަނަތަކުގެ ޙަޤީޤި މޭސްތިރިއަކީ އެ ޖަމްޢިއްޔާއެވެ. އެ ޖަމްޢިއްޔާއިން މިހާރު އަމާޒު ހިފާފައި ވަނީ އަތޮޅު ޤުރުއާނުގެ ކާމިޔާބު އަލުން އަނބުރާ ކެލައަށް ހޯދުމަށް ޓަކައި މި އަހަރުގެ ބޮޑު ބަންދާ ދިމާކޮށް ޤުރުއާން ކިޔަވަން ދަސްކޮށްދިނުމުގެ ޚާއްޞަ ޙަރަކާތެއް ކުރިއަށް ގެންދިއުމަށެވެ.
