މިހާރު ކުރިއަށްދާ ގޯލްޑަން ފުޓްސަލް ޓޯނަމަންޓްގެ ނުކައުޓް ބުރު (ރައުންޑް އޮފް ސޯޅައިގާ) ރޭ ތިމަރަފުށި އަތުން މާރަންދޫ ބަލިވެއްޖެއެވެ.
ރޭ ހުޅުމާލޭ ރެހެންދި ފުޓްސަލް ދަނޑުގައި ކުޅުނު މި މެޗުން ތިމަރަފުށީ އަތުން މާރަންދޫ ބަލިވީ 3-0 އިންނެވެ. މި މެޗުގައި ތިމަރަފުށިން ލަނޑުޖެހީ ޢަބްދުﷲ ޒިޔާން 2 ލަނޑު އަދި ޙުމައިދު ޙުސައިން 1 ލަނޑެވެ. މި މެޗުގެ މޮޅު ކުޅުންތެރިއަކަށް ހޮވުނީ ތިމަރަފުށްޓަށް 2 ލަނޑުޖަހައިދިން ޖަރޒީ ނަންބަރު 11 ޢަބްދުﷲ ޒިޔާނެވެ. މި މެޗުން ބަލިވި މާރަންދޫއަށް މުބާރާތް ނިމުނު ކަމަށް ވިޔަސް މާރަންދޫ ވަނީ ހއ. އަތޮޅު ޗެމްޕިއަންކަން ހޯދާފައިކަން ފާހަގަކޮށްލަމެވެ.
ޒޯން 1 ގެ ޗެމްޕިއަން ހދ. ނާވައިދޫ ނުކައުޓް ބުރުގައި ކުޅޭ މެޗު މިރޭ 8.00 ގައި ދިއްގަރާއެކު އޮންނާނެއެވެ. މިހާތަނަށް އައި އިރު، މި މުބާރަތުގެ ކުއާޓަރ ފައިނަލަށް 4 ޓީމު ވަނީ ދަތުރުކޮށްފައެވެ. އެއީ ރ. ދުވާފަރާއި، ބ. އޭދަފުށްޓާއި، ތ. ތިމަރަފުށްޓާއި އަދި ގއ. ދެއްވަދޫއެވެ.
މި މުބާރާތުގެ ނުކައުޓް ބުރުގެ ދެ މެޗެއް މިރޭ ވެސް ކުޅެނެއެވެ. މި ރޭ 8.00ގައި ކުޅޭ އެއް މެޗުގައި ބައްދަލުކުރާނީ ނާވައިދުއާއި، ދިއްގަރެވެ. އަނެއް މެޗުގައި ބައްދަލުކުރާނީ އިސްދޫއާއި، މަތިވެރިއެވެ.
