ޞިއްޙީ ދާއިރާގެ މުހިންމު 05 ޕްރޮގްރާމެއް މާދަމާ ތަންފީޒު ކުރަން ފެށުމުން ޞިއްޙީ ޚިދުމަތަށް މީގެ ކުރިން ރައްޔިތުންގެ ޖީބުތަކުން ކުރި ބޮޑު ހޭދަތަކަށް ނިމުން އަންނާނެ ކަމަށް ހެލްތު މިނިސްޓްރީއާއި، އެންސްޕާއިން ހާމަކޮށްފިއެވެ.
މާދަމާއިން ފެށިގެން ތަންފީޒުކުރާ ކަންކަކަމުގެ ތެރޭގައި ތެލެސީމިއާ ބަލި ތަޙައްމަލުކުރަމުންދާ ފަރާތްތަކަށް އެހީތެރިކަން ފޯރުކޮށްދިނުމުގެ ގޮތުން، ކޮންމެ މަހަކު 2،000 ރުފިޔާގެ އިނާޔަތެއް ދިނުމާއި، ޕްރައިވެޓް ހޮސްޕިޓަލްތަކާއި ކްލިނިކްތަކުން ލިބޭ ހުރިހާ ބާވަތެއްގެ ތެރެޕީގެ ޚިދުމަތްތަކަށް ހިނގާ ޚަރަދު އާސަންދަ ސުކީމް މެދުވެރިކޮށް ހަމަޖެހިގެން ދިޔުމާއި އަދި ނަފުސާނީ ބަލިތަކަށް ފަރުވާ ހޯދުމުގެ ހުރިހާ ޚަރަދެއް އާސަންދަ ސްކީމްގެ ދަށުން ފޯރުކޮށްދޭ ގޮތަށް ވަނީ ހަމަޖެހިފައެވެ.
ނަފްސާނީ ބައްޔަށް ހިނގާ ޚަރަދު އާސަންދަ ސުކީމް މެދުވެރިކޮށް ކަވަރުކޮށްދޭ ތަންތަނަކީ ސެނަހިޔާ، އީވް ކްލިނިކް، ސައިމާ ކެއަރ، އެލީޓް މެޑިކަލް، ކުލުނު މެޑިކަލް ކްލިނިކް، މެޑްނޯވާ މެޑިކަލް ސެންޓަރ އަދި ވީކެއަރ ކައުންސެލިން އެންޑް ސައިކޯ ތެރަޕީ ސެންޓަރެވެ.
މީގެއިތުރުން “މެރަނަ” ސްކީމް ސްކީމް މެދުވެރިކޮށް ފިލިޕީންސްގައި ދިރިއުޅޭ ދިވެހި ކިޔަވާކުދިންނާއި، ރައްޔިތުންނަށް ބޭސްފަރުވާ ކުރެވޭނެ އިންތިޒާމު ހަމަޖެހިގެންދާނެ ކަމަށްވެސް ސަރުކާރުން ވަނީ މިއަދު އިއުލާންކޮށްފައެވެ. މި ސްކީމުގެ ދަށުން ސްރީލަންކާ، އިންޑިއާ އަދި މެލޭޝިއާގައި ދިރިއުޅޭ ދިވެހިންނަށް މިހާރުވެސް އަންނަނީ ޚިދުމަތް ފޯރުކޮށްދެއްވަމުންނެވެ.
ފަޤީރު ޙާލުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީ އެހީގެ މިންވަރު ވެސް މާދަމާއިން ފެށިގެން މަހެއްގެ މައްޗަށް 12،000 ރުފިޔާއާ ހަމައަށް އިތުރުވާނެއެވެ. އެއް ކުއްޖަކު ބަލަހައްޓާ ނަމަ 3،000 ރުފިޔާގެ އިނާޔަތެއް ލިބޭނެއެވެ.
