ހުޅުމާލޭގެ މެންހެޓަން ގްރޭންޑް ހޮޓަލުގައި ރޭ ބޭއްވި އެފްއޭއެމް އެވޯޑްސް 2026 ގެ މުހިންމު ކާމިޔާބީތަކެއް ހއ. އަތޮޅަށް ލިބިއްޖެއެވެ.
އެ ގޮތުން މި އެވޯޑް ޙަފުލާގައި ނިމުނު ސީޒަންގެ އެންމެ މޮޅު ފުޓުބޯޅަ ކުޅުންތެރިޔާގެ ޝަރަފު ހޯއްދެވި އަޙްމަދު އައިހަމަކީ ހއ. އުތީމަށް އުފަން، އުތީމު ރައްޔިތެކެވެ. މާޒިޔާ ސްޕޯރޓްސް ކުލަބަށް ކުޅޭ އައިހަމް ވަނީ އެ ކުލަބާއެކު ދިވެހި ލީގާއި، ޗެރިޓީ ޝީލްޑް ކާމިޔާބުކުރުމުގެ އިތުރުން ގައުމީ ޓީމަށް ވެސް މެޗުތަކެއް ކުޅެދީފައެވެ.
ރޭގެ އެވޯޑު ޙަފުލާގައި އެންމެ މޮޅު ރީޖަނަލް ކްލަބުގެ ދެވަނަ މަގާމު ހއ. ދިއްދޫ ސްޕޯޓްސް ކްލަބު ވަނީ ހާސިލުކޮށްފައެވެ. މިއީ އަތޮޅު ފެންވަރުގައި ފުޓުބޯޅައިން ގިނަ ކާމިޔާބީތަކެއް ހޯދަމުން އަންނަ ދިއްދޫއަށް ޤައުމީ ފެންވަރުގައި ކާމިޔާބީތަކެއް ހޯދުމަށް ލިބުނު އިތުރު ހިތްވަރެކެވެ. އަދި މިއީ މުޅި އަތޮޅަށް ވެސް ލިބުނު ބޮޑު ކާމިޔާބީއެވެ.
އެފްއޭއެމް އެވޯޑު 2026ގެ އެންމެ މޮޅު ރެފްރީ ކަމުގައިވާ ހުސައިން ސިނާނަކީ ވެސް ހއ. އަތޮޅަށް ނިސްބަތްވާ ރައްޔިތެކެވެ. ހއ. ވަށަފަރުގެ ދަރިއެކެވެ. ރާއްޖެއާއި ރާއްޖޭން ބޭރުގައި ވެސް ރެފްރީކަން ކުރައްވަމުން އަންނަ ޙުސައިން ސިނާނަކީ ފީފާ ރެފްރީއެއް ވެސް މެއެވެ.
8 އަހަރުގެ މެދުކެނޑުމަކަށް ފަހު ބޭއްވި އެފްއޭއެމް އެވޯޑު 2026ގެ ފަޚުރުވެރި ވަނަތައް ޙާޞިލްކުރެއްވި އެންމެހައި ފަރާތްތަކާއި، ޓީމުތަކަށް ތިލައުތުރު ނޫހުގެ ފަރާތުން ތަހުނިޔާ ކިޔަމެވެ. ޚާއްޞަކޮށް ހއ. އަތޮޅަށް ލިބުނު ކާމިޔާބީތަކުގެ ޙައްޤުވެރި ފަރާތްތަކަށް ޝުކުރާއި ތަޢުރީފުގެ ބަސްތައް ވެދުންކުރަމެވެ.
