މިހާރު ހިނގަމުންދާ ތިލައުތުރު ފުޓްސަލް މުބާރާތުގެ ފައިނަލަށް ޗެންޕިއަން އިހަވަންދޫއާއި، ވަރުގަދަ ދިއްދޫ ބަލިކޮށް ރަނައަޕު އުތީމާއި، މުރައިދޫ ދަތުރުކޮށްފިއެވެ.
ހއ. އަތޮޅު ކައުންސިލުން އިންތިޒާމުކޮށްގެން ބާއްވަމުން އަންނަ ތިލައުތު ފުޓުސަލް މުބާރާތުގެ ފައިނަލަށް އުތީމު ދަތުރުކުރީ ވަރުގަދަ ދިއްދޫއާ ސެމީ ފައިނަލުގައި ބައްދަލުކޮށް، ޕެނަލްޓީން 6-5އިން ސެމީ ކާމިޔާބުކޮށްގެންނެވެ. މުރައިދޫ ފައިނަލުން ޖާގަ ހޯދީ ޗެންޕިއަން އިހަވަންދޫއާ ސެމީ ފައިނަލުގައި ވާދަކޮށް، ޕެނަލްޓީން 3-2އިން އިހަވަންދޫގެ މައްޗަށް ކުރި ހޯދައިގެންނެވެ.
އިހަވަންދޫ ސެމީ ފައިނަލަށް ދަތުކުރީ ގުރޫޕު އޭގެ އެއް ވަނަ ޓީމުގެ ގޮތުގައެވެ. ދިއްދޫ ސެމީ ފައިނަލަށް އައީ ގުރޫޕު ބީގެ އެއް ވަނަ ޓީމުގެ ގޮތުގައެވެ. އުތީމު ސެމީ ފައިނަލުން ޖާގަ ހޯދީ ގުރޫޕު އޭގެ ދެ ވަނަ ޓީމުގެ ގޮތުގައެވެ. އަދި މުރައިދޫ ސެމީ ފައިނަލް ކަށަވަރު ކުރީ ގުރޫޕު ބީގެ ދެ ވަނަ ޓީމުގެ ގޮތުގައެވެ.
މުބާރާތުގެ ފައިނަލުގެ ޖާގަ ހޯދި އުތީމަކީ ތިލައުތުރު ފުޓްސަލް މުބާރާތުގެ އެންމެ ފަހުގެ ރަނައަޕް ޓީމެވެ. އަދި އެންމެ ފަހުގެ ދެ މުބާރާތުގައި ވެސް އުތީމު ވަނީ ފައިނަލުގައި ކުޅެ ބަލިވެފައެވެ. މުބާރާތުގެ ފައިނަލުން ޖާގަ ހޯދި މުރައިދޫ މިއީ ފައިނަލް ކުޅޭ ފުރަތަމަ އަހަރެވެ.
މުބާރާތް ބާއްވާ ރަށް އުތީމާއި، މުރައިދޫ ބައްދަލުކުރާ ފައިނަލް މެޗު އޮންނާނީ މި މަހުގެ 12 ވަނަ ދުވަހުގެ ރޭ (މާދަމާރޭ) 8.30 ގައެވެ.
