2026 އޭޕްރީލް 4ވާ ހޮނިހިރު ދުވަހު ރާއްޖޭގައި ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި ހއ. ބާރަށު ކައުންސިލްގެ ރައީސްކަމަށް ވާދަކުރުމަށް ހުށަހަޅައިވާ ޕީއެންސީގެ ކެންޑިޑޭޓް ޢަލީ ޝަމީމް (އަލިބެ) އާއި، ހއ. އުތީމު ކައުންސިލްގެ ރައީސްކަމަށް ވާދަކުރުމަށް ހުށަހަޅައިފައިވާ ޢަބްދުﷲ ރަޝީދު އެ މަޤާމަށް ހޮވިއްޖެއެވެ.
އަލިބެއާއި، ޢަބްދުﷲ ރަޝީދު ރައީސްކަމަށް ހޮވުނީ އަލިބެއާއި އަދި ޢަބްދުﷲ ރަޝީދާ ވާދަކުރަން އިތުރު މީހަކު ހުށަހަޅައިފައި ނެތުމުންނެވެ.
އަލިބެއާއި، ޢަބްދުﷲ ރަޝީދަކީ ލާމަރުކަޒީ ނިޒާމަށް ނުހަނު ފަރިތަ ދެ ބޭފުޅުންނެވެ. ޢަބްދުﷲ ރަޝީދަކީ މިހާރު ވެސް އުތީމު ކައުންސިލްގެ ރައީސެވެ. ޢަބްދުﷲ ރަޝީދުގެ ރައީސްކަމުގައި އުތީމަށް ހެޔޮ ބަދަލުތަކެއް މިހާރުވެސް ވަނީ ގެންނަވައިފައެވެ. އިތުރު ދައުރެއް ޢަބްދުﷲ ރަޝީދަށް ލިބިގެން ދިޔުމަކީ ސަރުކާރުން އުތީމަށް ކަނޑައަޅައިވާ ޕްރޮޖެކްޓްތަކުގެ އިތުރުން ރައްޔިތުން ބޭނުންވާ އެހެނިހެން ބަދަލުތައް ގެނައުމަށް ލިބިގެން ދިޔަ ފަހި ފުރުޞަތެކެވެ.
ބާރަށު ކައުންސިލުގެ ރައީސްކަމަށް ހޮވުނު އަލިބެއަކީ ލަމަރުކަޒީ ނިޒާމުގެ ތަޖުރިބާކާރެކެވެ. ބާރަށު ކައުންސިލްގެ ރައީސްކަމާއި، ހއ. އަތޮޅު ކައުންސިލްގެ ނައިބުރައީސްކަން އަލިބެ ވަނީ ކޮށްފައެވެ. މިހާރުވެސް އަލިބެ ހުންނެވީ ކައުންސިލްތަކާ ނުހަނު ގާތުން މަސައްކަތްކުރަމުން އަންނަ މިނިސްޓްރީ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވަރކްސްގެ ނާއިބުގެ މަޤާމުގައެވެ.
އަލިބެއާއި، ޢަބްދުﷲ ރަޝީދުގެ އިތުރުން އދ. މަންދޫއާއި، ދިއްދޫ ކައުންސިލްގެ ރައީސްގެ ގޮނޑި ޕީއެންސީއަށް ވަނީ ލިބިފައެވެ.
