އަހަރެމެންނާއި ބައްދަލުކޮށްފައިވާ މި ބަރަކާތްތެރި ރަމަޟާންމަހަކީ ހަމައެކަނި ކެއުމާއި ބުއިމުން ދުރުހެލިވުމުގެ މަހެއްނޫންކަން 2026 ވަނަ އަހަރުގެ ފެބުރުވަރީ މަހުގެ 27 ވަނަ ދުވަހުގެ ހުކުރު ޚުޠުބާގައި ގޮވާލައްވައިފިއެވެ. ” ނަޞްރާއި ކާމިޔާބުގެ މައްސަރު!” މި މަޢުޟޫއަށް ލިޔެފައިވާ ޚުޠުބާގައި ރަމަޟާންމަހަކީ ޖިހާދުގެ މައްސަރުކަމާއި އިންސާނާގެ ހަށިގަނޑުންކުރެވޭ ޖިހާދުގެ އިތުރަށް އޭނާގެ ހަވާނަފުސާ ދެކޮޅަށް އެންމެ ފުރިހަމަ މާނައިގައި ޖިހާދުކުރެވޭ މައްސަރުކަން ބަޔާން ކުރައްވާފައި ވެއެވެ.
ހުކުރުޚުޠުބާ ފައްޓަވާފައިވަނީ އެންމެހައި ޙަމްދު ޘަނާ ތަޢުރީފު ޙައްޤުވެގެންވަނީ ގަދަކިރިތިވަންތަ ﷲ ސުބުޙާނަހޫ ވަތަޢާލާއަށް ކަމާއި އަޅަމެން ފާފަފުއްސެވުމަށާއި ކަންކަމުގައި އެހީތެރިކަމާއި، ވާތްގަށް އެދެނީ އެކަލާނގެ ޙަޟުރަތުންކަން ހަނދާންކޮށްދެއްވާފައިވާ ވެއެވެ. މުޙައްމަދުގެފާނީ މާތްﷲ ގެ އަޅާ އަދި ރަސޫލާކަމަށް އެކިވުމާއެކު އެކަލޭގެފާނަށް ޞަލަވާތާއި ސަލާމް ލެއްވުން އެދި ދުޢާކުރައްވާފައި ވެއެވެ. އަދި އެ ޞަލަވާތާއި ސަލާމުގައި އެ މާތް ރަސޫލާގެ އާލު އަޞްޙާބުންނާއި ހެޔޮގޮތުގައި ތަބަޢަވީ އެންމެން ޝާމިލް ކޮށްފައި ވެއެވެ. ހަމައެހެންމެ މާތްﷲ އަށް ތަޤުވާގެރިވުމަށާއި މާތްﷲ ފިޔަވާ ޙައްޤުވެގެން އަޅުކަންކުރެވޭ އެހެންފަތާރެއް ނުވާކަމަށާއި އެކަލާނގެއަށް ޝަރީކުނުކުރުމަށް ހުރިހާ މުސްލިމުންނަށް ހަނދާންކޮށްދެއްވާފައި ވެއެވެ.
މި މައްސަރުގައި ހިފާ ރޯދައިގެ ސަބަބުން އޭނާގެ ހަވާނަފުސުގެ އެދުންތަކުގެ މައްޗަށް ގަދަވެގަނެ، ނަފުސު ތަހުޒީބުކުރުމަށް ބާރުއަޅާކަން ހުކުރު ޚުޠުބާގައި ބަޔާންކުރައްވާފައި އެވެވެ. ނަފުސުގެ ޖިހާދުގެ އިތުރަށް އިސްލާމްދީނުގެ ޢަދުއްވުންނާއި ދެކޮޅަށް މުސްލިމުން އެންމެ ބޮޑެތި ނަޞްރާއި ކާމިޔާބީތައް ޙާޞިލުކުރީ މި މައްސަރުގައިކަން ކީރިތި ޤުރްއާނާއި ރަސޫލާގެ ޙަދީޘްތަކުގެ އަލީގައި ގެންނަވައިފައި ވެއެވެ. އެގޮތުން އިސްލާމީ ތާރީޚް ބަދަލުކޮށްލި މަޝްހޫރު ބަދަރު ހަނގުރާމައިގެ ވާހަކައާއި މައްކާ ފަތަޙަކުރެއްވި ޙާދިސާއިން މުސްލިމުންނަށް ލިބިގެންދާ ޢިބްރަތްތެރި ފިލާވަޅުތަކަށް އަލި އަޅުއްވާލައްވާފައި ވެއެވެ.
ރަމަޟާންމަހަކީ ހެޔޮކަމާއި ބަރަކާތާއި ފާފަފުއްސެވުމުގެ މޫސުމެއްކަމާއި މުސްލިމު މުޖުތަމަޢުތަކުގައި ރަމަޟާންމަހުގެ މަތިވެރިކަމާއި މާތްކަން ދަމަހައްޓަން ޖެހޭނެކަމަށް ބަޔާންކުރައްވާފައި ވެއެވެ. ހަމައެއާއެކު އަހަރެމެންނާއެކު ދިރިއުޅެމުންދާ އެހެމްދީންކަތުގެ މީހުންނާއި ބިދޭސީންނަށް އިޙްސާންތެރިވުމަށް ގޮވާލައްވާފައި ވެއެވެ. ރޯދަ ނުހިފާ މީހުންނަށް ކެއިންބުއިމުގެ ޚިދުމަތްތައް ފޯރުކޮށްދިނުމުގައި ޚައްޞަ އިންތިޒާމެއްގެ ތެރެއިން އެކަން ކުރުމަށް ވަރަށްބޮޑަށް ބާރު އަޅުއްވާފައި ވެއެވެ.
ޚުޠުބާ ނިންމަވާލައްވާފައިވަނީ މި މަތިވެރި މައްސަރުގެ ބަރަކާތްލިބޭ ބަޔަކުކަމުގައި އަޅަމެން ލެއްވުން އެދި ދުޢާކުރުމާއެކު މި ޤައުމަށާއި ޤައުމުގެ ކަންކަމަށް ރަނގަޅުގޮތްވުމަށް އެދި ދުޢާކުރަމުންނެވެ. ޤައުމުގެ ކަންކަން އިސްލާމްދީނާއެއްގޮތަށް ގެންދިއުމަށް މަސައްކަތްކުރައްވާ ވެރީންނަށް ހެޔޮގޮތްވުމަށް އެދެމުންނެވެ. ބަލިމީހުންނަށް ޝިފާދެއްވާ ފުރިހަމަ ޞިއްޙަތާއި ޢާފިޔަތުގެ ނިޢުމަތް މިންވަރު ކުރެއްވުމަށް އެދެމުންނެވެ.
