މިހާރު ހއ. މުރައިދޫގައި ހިނގަމުން އަންނަ ތިލައުތުރު ވޮލީ މުބާރާތް 2024 ގެ ފައިނަލްގެ ފުރަތަމަ ޖާގަ އިހަވަންދޫ ހޯދައިފިއެވެ.
އިހަވަންދޫ ޓީމުން މި މުބާރާތުގެ ފައިނަލްގެ ފުރަތަމަ ޖާގަ ހޯދީ މިއަދު ހަވީރު 4.00 ގައި ކުޅުނު ފުރަތަމަ ސެމީގައި މުބާރާތް ބާއްވަ ރަށް ކަމުގައިވާ މުރައިދޫއާ ބައްދަލުކޮށް 3 ސެޓް 2 ސެޓުން މުރައިދޫގެ މައްޗަށް ކުރި ހޯދައިގެންނެވެ.
ފައިނަލްގައި ބައްދަލުކުރާ އަނެއް ޓީމު އެނގިގެން ދާނީ 3 ވަނަ ސެމީގައި ބައްދަލުކުރާ މެޗުގެ ނަތީޖާއިންނެވެ. 3 ވަނަ ސެމީގައި ބައްދަލުކުރާނީ މިރޭ ކުޅުނު ދެ ވަނަ ސެމީގައި ސީދާ 3 ސެޓްން އުތީމުގެ މައްޗަށް ކުރި ހޯދި ބާރަށާއި، ފުރަތަމަ ސެމީން ބަލިވި މުރައިދޫއެވެ.
3 ވަނަ ސެމީ ފައިނަލް މެޗް ކުޅުމަށް ހަމަޖެހިފައި ވަނީ މާދަމާ ހަވީރު 4.00 ގައެވެ. އިހަވަންދޫއާއި، މުރައިދޫ ބައްދަލުކުރި ސެމީ ފައިނަލް މެޗްގެ ކުއީން އޮފް ދަ މެޗަކަށް ހޮވުނީ އިހަވަންދޫ ޓީމުގެ ޖަރޒީ ނަންބަރ 12 އައިރީން އިބްރާހީމެވެ. ބާރަށާއި، އުތީމު ބައްދަލުކުރި ސެމީ ފައިނަލް މެޗްގެ ކުއީން އޮފް ދަ މެޗަކަށް ހޮވުނީ ބާރަށު ޓީމުގެ ޖަރޒީ ނަންބަރ 7 އާމިނަތު އަރީޝާއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމްކޮށްގެން ބާއްވާ ތިލައުތުރު ވޮލީ މުބާރާތް 2024 ގެ ފައިނަލް މެޗް ކުޅުމަށް ހަމަޖެހިފައި ވަނީ މި މަހުގެ 23 ވާ ހޮނިހިރު ދުވަހުގެ ރޭ 8.00 ގައެވެ. މި އަހަރުގެ މުބާރާތް ހޯސްޓްކުރަނީ މުރައިދޫއިންނެވެ.
