މިއަދަކީ 2000 ވަނަ އަހަރުގެ 24 ވަނަ ދުވަހު އޭރުގެ މިނިސްޓްރީ އޮފް ހޯމް އެފެއާޒުގައި ރަޖިސްޓްރީ ކުރި، ކެލާ ޔޫތު ފޯރަމުގެ 26 ވަނަ އަހަރީ ދުވަހެވެ.
ކެލާގެ ތަރައްޤީގާ ވޭތުވެ ދިޔަ 26 އަހަރު، ކެލާ ޔޫތު ފޯރަމުން އަދާކޮށްފައި ވަނީ މުހިންމު ދައުރެކެވެ. ޙާޞިލްކޮށްފައި ވަނީ ފޮނި އަރުތަތަކެވެ. ޤައުމީ އަދި ސަރަޙައްދީ ފެންވަރުގައި ވެސް ކެލާ ޔޫތު ފޯރަމުން ހޯދި ކާމިޔާބުތަކުގެ ވިދުން ގަދައެވެ.
އަތޮޅުގެ ކަންތައް ވަރަށް ގިނަ އަހަރުތަކެއް ވަންދެއް ބެލެހެއްޓެވުމުގައި އިސްކޮށް އުޅުއްވި ހއ. ދިއްދޫ ނަފާ، ޢަބްދުﷲ ނަޢީމު ވިދާޅުވި ގޮތުގައި ކެލާ ޔޫތު ފޯރަމަކީ ގިނަ ރޮނގުތަކެއްގައި އަތޮޅުގައި ފާހަގަކުރެވޭ ޖަމްޢިއްޔާއެކެވެ.
“ކެލާ ޔޫތު ފޯރަމަކީ އަތޮޅު ފެންވަރުގައި ގިނަ ރޮނގުތަކެއްގައި ފާހަގަކުރެވޭ ޖަމްޢިއްޔާއެއް. އިޖްތިމާޢީ ގޮތުންނާއި ތަޢުލީމީގޮތުން އަދި ޘަޤާފީގޮތުންނާއި ކުޅިވަރުގެ ރޮނގުން ކެލެއަށް ގިނަގުނަ ޚިދްމަތްތަކެއްް ކުރެއްވި އަދި މިހާރު ވެސް ކުރައްވަމުން ގެންދަވާ ޖަމްޢިއްޔާއެއް. ޖަމްޢިއްޔާގެ 26 ވަނަ އަހަރީ ދުވަހުގެ ހެޔޮއެދުމާ ތަހްނިޔާ ޖަމްޢިއްޔާގެ ހިންގުންތެރިންނަށާއި އެންމެހައި މެންބަރުންނަށް އަރިސްކުރަން” ނަޢީމު ވިދާޅުވިއެވެ.
ކެލާ ކައުންސިލްގެ ރައީސް ޢަބްދުﷲ އިންފާޒު ވިދާޅުވި ގޮތުގައި ކެލާ ޔޫތު ފޯރަމަކީ އެތައް ދާއިރާއަކުން ފާހަގަކޮށްލެވޭ ޚިދުމަތްތަކެއް ދެއްވާފައިފާ އަދި މިހާރުވެސް ދެއްވަމުން އަންނަ ޖަމްޢިއްޔާއެކެވެ.
“ކެލާ ޔޫތު ފޯރަމަކީ ދީނީ ގޮތުންނާއި، ޢިލްމީ ގޮތުންނާއި، އިޖުތިމާޢީ ގޮތުންނާއި، ސަގާފީ ގޮތުންނާއި އަދި ކުޅިވަރުގެ ރޮނގުން ވަރަށް ޚިދުމަތްތެރި ޖަމްޢިއްޔާއެއް. އުންމީދުކުރަނީ މުސްތަޤްބަލުގައި ވެސް މިހާރަށް ވުރެ ފުޅާކޮށް ޚިދުމަތްތައް ދެމުންދާނެ ކަމަށް” އިންފާޒު ވިދާޅުވިއެވެ.
ކެލާ ޔޫތު ފޯރަމުން އަޅުއްވައިދެއްވި ބިންގަލާއެކު، ކީރިތި ޤުރުއާނުގެ ޢިލްމު ފެތުރުމަށް އަމިއްލަ ޤުރުއާން ކުލާހެއް ރަޖިސްޓްރީކޮށް ހިންގަމުން އަންނަ ހއ. ކެލާ ފެހިވިލާ، މަރިޔަމް ޢަލިމަނިކު ވިދާޅުވި ގޮތުގައި ކީރިތި ޤުރުއާނުގެ ދަންމަރު ކެލާގައި ރޯކޮށްދެއްވުމަށް ކެލާ ޔޫތު ފޯރަމުން ކުރައްވާފައި ވަނީ ތަޢުރީފު ޙައްޤު މަސައްކަތެކެވެ.
“ޤުރުއާނުގެ ޢިލްމު ކެލާގައި ފެތުރިގެން ދިޔައީ ކެލާ ޔޫތު ފޯރަމުން ކުރެއްވި މަސައްކަތުން. އަޅުގަނޑަށް މިހާރު ހުރި ހިސާބަށް އާދެވުނީ ޖަމްޢިއްޔާއިން ކޮށްދެއްވި މަސައްކަތުގެ ސަބަބުން، ޤުރުއާނަށް ހިތްޖެހި އުފެދުނު ޝައުޤެއްގެ ބޮޑުކަމުން” މަރިޔަމް ޢަލިމަނިކު ވިދާޅުވިއެވެ.
ކުޅިވަރަށް ލޯބިކުރައްވާ މުއައްވަޒު ޢަބްދުﷲ ވިދާޅުވި ގޮތުގައި ކުޅިވަރުގެ އިންފްރާންސްޓްރަކްޗަރ ތަރައްޤީކޮށް ކުޅިވަރުގެ ޖީލެއް ބިނާކުރުމަށް ކެލާ ޔޫތު ފޯރަމުން ކުރައްވާފައި ވަނީ ޝުކުރުވެރިވުން ޙައްޤު މަސައްކަތެކެވެ.
“ކުޅިވަރު ކުރިއަރުވާ ތަރައްޤީކޮށް ކުޅިވަރަށް ޝައުޤުވެރި ޖީލެއް ބިނާކުރުމަށް ޓަކައި ކެލާ ޔޫތު ފޯރަމުން ވަނީ ގިނަގުނަ މަސައްކަތްތަކެއް ކުރައްވާފަ. ޚާއްޞަކޮށް ވަޞީލަތްތައް ގާއިމްކޮށް ފަންނީ ބޭފުޅުންގެ އެހީތެރިކަން ކުޅުންތެރިންނަށް ހޯއްދަވައި ދެއްވަމުން ގެންދަވާކަން އުފަލާއެކު ފާހަގަކުރަން” މުއައްވަޒު ޢަބްދުﷲ ވިދާޅުވިއެވެ.
25 އަހަރުގެ ދިގު ތާރީޚުގައި ކެލާ ޔޫތު ފޯރަމުންކޮށްފައިވާ މަސައްކަތްތަކާއި، ހޯދާފައިވާ ކާމިޔާބީތައް މަދު ޞަފުޙާތަކަކުން ބަޔާންކުރެވޭ ވަރަށް ވުރެ ދިގެވެ. ކުރުކޮށް ދަންނަވާ ނަމަ ކެލާ ޔޫތު ފޯރަމަކީ ކެލާގެ ތާރީޚު މިހާތަނަށް ދުށް އެންމެ ކާމިޔާބު ޖަމްޢިއްޔާ ކަމަށް ދަންނަވަމެވެ.
އަތޮޅު ފުޓުބޯޅައާއި، ޒޯން ފުޓުބޯޅައިން އެތައް ފަހަރަކު 1 ވަނަ ހޯދާ ޒޯން ޗެމްޕިއަންސް ލީގު ކާމިޔާބުކުރިއެވެ. ކީރިތި ޤުރުއާން ކިޔެވުމުގެ ޤައުމީ މުބާރާތުގެ ފަޚުރުވެރި 1 ވަނަ ބަލައިގެން ކިޔެވުމުންނާއި، ހިތުން ކިޔެވުމުން ހޯދާފައި ވެއެވެ. އަތޮޅުގެ އެންމެ ހިންގުންތެރި ޖަމްޢިއްޔާގެ އެވޯޑު އެއް ފަހަރަށް ވުރެ ގިނަ ފަހަރު ޙާޞިލްކޮށްފައި ވެއެވެ.
މި ފަޚުރުވެރި ޖަމްޢިއްޔާގެ 26 ވަނަ އަހަރީ ދުވަހުގެ ހެޔޮ އެދުންތައް ތިލަ އުތުރު ނޫހުގެ ފަރާތުން އެ ޖަމްޢިއްޔާގެ އެންމެހައި މެންބަރުންނަށް މި ފުރުޞަތުގައި އަރިސްކުރަމެވެ. އިތުރު ކުރިއެރުމާ ފާގަތިކަމަށް އެދެމުންނެވެ.
