ޓެކްނިކަލް އޮފިޝަލް އޮފް ދަ އިޔަރގެ އެވޯޑް ހއ. ކެލާ، ފައިންރޯޒް ޢާއިޝަތު ޝިމްލާއަށް ލިބިއްޖެއެވެ. މި އެވޯޑް ޝިމްލާއަށް ޙަވާލުކޮށްފައި ވަނީ މޯލްޑިވްސް ސްޕޯރޓްސް އެވޯޑް 2025ގެ ނަމުގައި ރޭ ބެއްވި ޚާއްޞަ ޙަފުލާގައެވެ. މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.
ޢާއިޝަތު ޝިމްލާއަކީ ކުޅިވަރުގެ އާއިލާއަކުން އުފަންވި ކުޅުންތެރިއެކެވެ. ސުކޫލު ދައުރުގައި ވެސް އޭނާއަކީ ކުޅިވަރު މުބާރާތްތަކުގައި ފާހަގަކޮށްލެވުނު މޮޅު ދަރިވަރެކެވެ. އޭނާގެ ބައްޕައާއި، މަންމަގެ އާޢިލާގައި ވެސް ހުނަރުވެރި ކުޅުންތެރިން ފެނިފައި ވެއެވެ. ރާއްޖޭގެ ނިސްބަތުން އެ ފަރާތްތައް މަޝްހޫރު ނުވިއަސް ރަށުފެންވަރުގައި ފާހަގަކޮށްލެވޭ ހުނަރުވެރިންތަކެއް ޝިމްލާގެ ޢާއިލާއިން ފެނިފައި ވެއެވެ. ޝިމްލާގެ އެންބަނޑު އެއްބަފައި މީހުންގެ ތެރޭގައި ވެސް މޮޅު ކުޅުންތެރިން އެބަ ތިއްބެވެ.
ޝިމްލާގެ މި ކާމިޔާބާ ގުޅިގެން، ކެލާ ކައުންސިލުން ވަނީ އެ ކައުންސިލާއި ރައްޔިތުންގެ ނަމުގައި ޝިމްލާއަށް ތަހުނިޔާ ކިޔައިފައެވެ. ކެލާ ކައުންސިލުން ވަނީ ޝިމްގެ މި ކާމިޔާބީއަކީ ރަން ވަނައެއްގެ ގޮތުގައި ސިފަކޮށްފައެވެ.
ތިލަ އުތުރު ނޫހަށް މަޢުލޫމާތު ލިބިފައިވާ ގޮތުގައި ޝިމްލާއަކީ ހޭންޑް ބޯލްގެ ދަނޑުގައި އިތުބާރު ލިބިފައިވާ ރެފެރީއެކެވެ. 2022އިން ފެށިގެން ޝިމްލާ އަންނަނީ ހޭންޑް ބޯލް ރެފްރީކަން ކުރައްވަމުންނެވެ. ޚާއްޞަކޮށް އަތޮޅުތަކުގައި ބޭއްވި އެތައް މުބާރާތެއްގައި ޝިމްލާ ވަނީ ރެފްރީކަން ކުރައްވާފައެވެ.
ޝިމްލާގެ މި ފަޚުރުވެރި ކާމިޔާބުގައި ބައިވެރިވެ ތިލަ އުތުރު ނޫހުގެ ފަރާތުން ވެސް ޝިމްލާއަށް ތަހުނިހާ ކިޔަމެވެ. އިތުރު ކުރިއެރުމާއި ފާގަތިކަމަށް އެދެމެވެ.
