މިހާރު ކުރިއަށްދާ ގޯލްޑަން ފުޓްސްލް މުބާރާތުގައި މާރަންދޫއާއި، ކެލާ ބައްދަލުކުރާ ހއ. އަތޮޅު ފައިނަލް މެޗު މިއަދު ހަވީރު 4.00ގައި ކުޅޭނެއެވެ.
މިއީ މާރަންދޫއާއި، ކެލާ ވެސް މި މުބާރާތުގެ ފައިނަލުން ޖާގަ ލިބުނު ފުރަތަމަ ފަހަރެވެ. މާރަންދޫ ފައިނަލަށް ދަތުރުކުރީ އޭ ގުރޫޕުގެ 1 ވަނަ ޓީމު ކަމުގައިވާ ފިއްލަދޫއާއެކު ކުޅުނު ސެމީ ފައިނަލް މެޗު ކާމިޔާބުކޮށެވެ. އެއްވެސް ބަޔަކު އަތްދަށު ނުވެ 100އިންސައްތަ ކާމިޔާބާއެކު ސެމީން ޖާގަ ހޯދި ފިއްލަދޫ ބަލިކޮށް ފައިނަލަށް ދަތުރުކުރި މާރަންދޫއަކީ ވެސް ވަރުގަދަ ޓީމެއްކަން މި ވަނީ ސާބިތުކޮށްދީފައެވެ.
ކެލާ ފައިނަލަށް ދަތުރުކުރީ ބީ ގުރޫޕުގެ 1 ވަނަ ޓީމު ކަމުގައިވާ މުރައުދޫއާއެކު ކުޅުނު ސެމީ ފައިނަލް މެޗު ކާމިޔާބުކޮށެވެ. އެއްވެސް ބަޔަކު އަތްދަށު ނުވެ 100އިންސައްތަ ކާމިޔާބާއެކު ސެމީން ޖާގަ ހޯދި މުރައިދޫ ބަލިކޮށް ފައިނަލަށް ދަތުރުކުރި ކެލާއަކީ ވެސް ވަރުގަދަ ޓީމެއްކަން މި ވަނީ ސާބިތުކޮށްދީފައެވެ.
މާރަންދޫއަކީ ވެސް ފުޓުބޯޅާގައި ކެލާއަށް އަޅައިބަލައި އިރު ބަލި ޓީމެއް ކަމަށް ފާހަގައެއް ނުކުރެވެއެވެ. ހުނަރުވެރި މޮޅު ކުޅުންތެރިން މާރަންދޫ ޓީމުގައި ވެސް އެބަ ތިއްބެވެ. ގޯލާ ރަށްޓެހި ކުޅުންތެރިން ވެސް މާރަންދޫ ޓީމުގައި ވަކި މަދެއް ނޫނެވެ. އަނެއް ކޮޅުން ކެލާ ޓީމާށް ބަލައިއިރު ހުނަރުވެރި ހަލުއި ކުޅުންތެރިން މަދުކަމަށް ފާހަގަކުރެވޭކަށް ނެތެވެ. ގޯލާ ރަށްޓެހި ކުޅުންތެރިން ވެސް ކެލާ ޓީމުގައި އެބަ ތިއްބެވެ. އައްމަޑޭއާއީ، ރިޝާލުގެ އިތުރުން ފަހަތުގައި މޮޅަށް ކުޅެމުންދާ ޝަފަޤު އަދި ޢަޠޫފަކީ ވެސް ގޯލަށް ނުފަރިތަ ބައެއް ނޫންކަން މި މުބާރާތުގައި ވަނީ ސާބިތުކޮށްދީފައެވެ.
އަލަށް ފައިނަލުގައި ވާދަކުރާ މާރަންދޫއާއި، ކެލާ ވެސް ނުކުންނަނީ މުބާރާތުގެ ތަށި ލިބޭނެ ކަމަށް ދެކެމުން އަންނަ ހުވަފެން ޙަޤީޤަތަކަށް ހެދުމަށެވެ. މި ދެ ރަށުގެ ސަޕޯޓަރުން މިއަދު ހަވީރު ދަނޑުދޮށަށް ނުކުންނަނީ ކުޅުންތެރިންނަށް އެ ހިތްވަރު އިތުރަށް ދިނުމަށެވެ. ފޯރިއާއި، ޖޯޝް އުފައިދައިދިނުމަށެވެ.
މުބާރާތުގެ އަތޮޅުގެ ތަށި ލިބޭނީ ކޮންމެވެސް އެއް ޓީމަކަށެވެ. އެ ޓީމެއް އެނގިގެންދާނީ ދެ ޓީމުން މިއަދު ހަވީރު ދެއްކޭ ކުޅުމަކުންނެވެ. ސޕޯޓަރުން ދޭންވީ ތަރުޙީބެވެ. އިތުރުކޮށްދޭންވީ ހިތްވަރެވެ. ދައްކައިދޭންވީ ވަޠަނީ ލޯތްބެވެ. ކުޅިވަރުގެ ރޫޙު ދެމެހެއްޓެނިވި ގޮތަށެވެ. އަތޮޅުގެ މަޞްލަހަތު ހިފެހެއްޓޭ ވެސް ގޮތަށެވެ.
