ޖޫނިއަރ މެޗު ދިއްދޫ، ދި ސްޕޯރޓްސް ހޭންޑްބޯލް އެކަޑަމީއަށް، ސީނިއަރ މެޗު ކެލާ، ކޭވައިއެފް ސްޕޯރޓްސް އެކަޑަމީއަށް
ކެލާ، ކޭވައިއެފް ސްޕޯރޓްސް އެކަޑަމީއާއި، ދިއްދޫގެ އެކަޑަމީއެއް ކަމަށްވާ، ދި ސްޕޯރޓްސް ހޭންޑްބޯލް އެކަޑަމީގެ ދަރިވަރުންގެ މެދުގައި މިއަދު ކުޅުނު ރަޙުމަތްތެރިކަމުގެ ޖޫނިއަރ މެޗު ދި ސްޕޯރޓްސް ހޭންޑްބޯލް އެކަޑަމީން އަދި ސީނިއަރ މެޗު ކޭވައިއެފް ސްޕޯރޓްސް އެކަޑަމީން ކާމިޔާބުކޮށްފިއެވެ.
ޖޫނިއަރ މެޗު ދި ސްޕޯރޓްސް ހޭންޑްބޯލް އެކަޑަމީން ކާމިޔާބުކުރީ 23-13 އިންނެވެ. ސީނިއަރ މެޗު ކޭވައިއެފް ސްޕޯރޓްސް އެކަޑަމީން ކާމިޔާބުކުރީ 32-17އިންނެވެ. ޖޫނިއަރ މެޗުގައި ކުޅުނީ ގްރޭޑް 5އިން ދަށުގެ ކުދިންނެވެ. ސީނިއަރ މެޗުގައި ކުޅުނީ ގްރޭޑް 6އިން މަތީގެ ދަރިވަރުންނެވެ.
ހޭންޑްބޯލްއަކީ މިއަދު ރާއްޖޭގެ ހުރިހާ ހިސާބެއްގައި ވެސް ކުޅެމުން އަންނަ ފޯރިގަދަ ކުޅިވަރެކެވެ. އަދި މިއީ ދެ ޖިންސުގެ ކުދިން ވެސް ކުޅެމުން އަންނަ ކުޅިވަރެކެވެ. ނަމަވެސް ހއ. އަތޮޅުން މިހާތަނަށް ފެންނަނީ އަންހެންކުދިން މި ކުޅިވަރު ކުޅޭ ތަނެވެ.
