މިހާރު ހިނގަމުންދާ ކެލާ ސްޕޯރޓްސް ފިއެސްޓާ ވޮލީ މުބާރާތުގެ ގުރޫޕުގެ 1 ވަނަ ޖާގަ ކެލާ ހޯދައިފިއެވެ. މި ޖާގަ ކެލާ ޓީމުން ކަށަވަރުކުރީ އިއްޔެ ހަވީރު ފިއްލަދޫއާއެކު ކުޅުނު މެޗު 3 ސެޓް 2 ސެޓުން ކާމިޔާބުކޮށެވެ.
ކެލައާއެކު އެ ގުރޫޕުގައި ހިމެނިފައި ވަނީ ފިއްލަދޫއާއި، ދިއްދޫއެވެ. މި ގުރޫޕުން ދެ ވަނަ ޓީމެއްގެ ގޮތުގައި ސެމީން ޖާގަ ހޯދީ ފިއްލަދޫއެވެ. އަނެއް ގުރޫޕުން ސެމީން ޖާގަ ހޯދާފައި ވަނީ ހަނިމާދޫއާއި، ހޯރަފުށްޓެވެ. އެ ގުރޫޕުގެ 1 ވަނަ ޓީމަކީ ހަނިމާދޫއެވެ. ދެ ވަނަ ޓީމަކީ ހޯރަފުށްޓެވެ. އޭ ގުރޫޕުގައި ސެމީން ޖާގަ ނުލިބި މުބާރާތުން ކެޓީ ނޮޅިވަރަންފަރެވެ.
މުބާރާތުގެ ސެމީ ފައިނަލްގެ ފުރަތަމަ މެޗު މިއަދު ހަވީރު އޮންނާނެއެވެ. މި މެޗުގައި ބައްދަލުކުރާނީ ހަނިމާދޫއާއި، ފިއްލަދޫއެވެ.
ކެލާ ކައުންސިލުން އިންތިޒާމުކޮށްގެން މިހާރު ކުރިއަށް ގެންދާ ކެލާ ސްޕޯރޓްސް ފިއެސްޓާގައި ވޮލީގެ އިތުރުން ހޭންޑްބޯޅައާއި، ފުޓްސަލް މުބާރާތެއް ވެސް ހިނގަމުން ދެއެވެ. ރަށުގެ ރަށްވެހިންނަށް ހުޅުވައިލައިގެން ކުރިއަށް ގެންދާ މި މުބާރާތްތަކުގައި ވެސް ގިނަ ޢަދަދެއްގެ ޓީމުތަކަކުން އަންނަނީ ވާދަކުރަމުންނެވެ.
