ޝަރުޠުހަމަވާ ހުރިހާ ފަރާތްތަކަށް ވެސް ބައިވެރިވުމުގެ ފުރުޞަތު ލިބޭ ގޮތަށް، ކެލާ ޞިއްޙީ މަރުކަޒުގެ އައު ބިލްޑިންގެ ނުނިމި ހުރި މަސައްކަތް ނިންމުމަށް، ފިނޭންސް މިނިސްޓްރީން ބިޑު ހުޅުވައިލައިފިއެވެ.
ފިނޭންސް މިނިސްޓްރީން ހާމަކުރައްވާފައިވާ ގޮތުގައި މި ބީލަންތައް ކުރިއަށްގެންދިއުމަށް ހަމަޖެހިފައި ވަނީ ނޭޝަނަލް ކޮމްޕެޓިޓިވް ބިޑިންގ (އެންސީ.ބީ) އުޞޫލުން، ދައުލަތުގެ މާލިއްޔަތުގެ ޤަވާއިދު (R-158/2023) އާއި އެއްގޮތަށެވެ. މީގެ އިތުރުން، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ “ޢިމާރާތްކުރުމުގެ ޢަމަލީ މަސައްކަތްކުރާފަރާތްތަކުގެ ގަވާއިދު” އާއި، ފިނޭންސް މިނިސްޓްރީގެ “ނޭޝަނަލް ޓެންޑަރުން ކުރިޔަށްގެންދާ ޢިމާރާތްކުރުމުގެ މަސައްކަތްތައް އެވޯޑް ކުރެވޭނެ ޢަދަދު ކަނޑައަޅާނެ ގޮތުގެ އުސޫލު” އާއި އަދި އިކޮނޮމިކް މިނިސްޓްރީގެ “ފޮރިން ޑައިރެކްޓް އިންވެސްޓްމަންޓް ޕޮލިސީ” އަށް ރިއާޔަތްކުރާނެއެވެ.
މި ބީލަންތަކުގައި ބައިވެރިވާ ފަރާތްތަކުން -/500 ރުފިޔާގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހެއެވެ. ފައިސާ ބަލައިގަތުމަށް ހަމަޖެހިފައިވަނީ 2025 ވަނަ އަހަރުގެ އޮކްޓޫބަރު މަހުގެ 26 އިން ނޮވެމްބަރު މަހުގެ 10 ވަނަ ދުވަހާ ހަމައަށް، ބަންދު ނޫން ކޮންމެ ދުވަހެއްގެ 8:00 އިން 14:00 އަށް ބަނޑޭރި ޕޭ ޕޯޓަލް މެދުވެރިކޮށެވެ.
މިއީ ބިޑް ސެކިއުރިޓީ ހުށަހަޅަންޖެހޭ ޕްރޮޖެކްޓެކެވެ. ބިޑް ސެކިއުރިޓީގެ މުއްދަތަކީ ބިޑް ހުޅުވާ ތާރީޚުން ފެށިގެން 148 ދުވަހެވެ. ބިޑާ ގުޅޭ އިތުރު މަޢުލޫމާތު ދިނުމަށް 2025 ނޮވެމްބަރު 4 ވަނަ ދުވަހުގެ ހެނދުނު 10:00 ގައި އޮންލައިންކޮށް ޕްރީ-ބިޑް ބައްދަލުވުމެއް ބޭއްވުމަށް ވަނީ ހަމަޖެހިފައެވެ. ބީލަން ހުށަހެޅުމުގެ އެންމެ ފަހު މުއްދަތަކީ 2025 ނޮވެމްބަރު 12 ވަނަ ދުވަހުގެ މެންދުރު 12:00 އެވެ. ބީލަން ބަލައިގަތުމަށް ހަމަޖެހިފައިވަނީ ބީލަން ޕޯޓަލް މެދުވެރިކޮށެވެ.
ކެލާ ޞިއްޙީ މަރުކަޒަށް އިތުރުކުރެވޭ ޖާގައާއެކު، މަރުކަޒު ހޮސްޕިޓަލަކަށް ބަދަލުވުމީ ކެލާ ރައްޔިތުން ދެކެން ބޭނުންވާ ހުވަފެނެކެވެ. ކެލައަކީ ތަހުޒީބު ރައްޔިތަކު ދިރިއުޅެމުން އަންނަ ރަށެކެވެ.
