މިހާރު ހިނގަމުންދާ ގޯލްޑަން ފުޓްސަލް މުބާރާތުގައި ހއ. އަތޮޅުގެ ގުރޫޕް އޭގަ މިރޭ ވަރުގަދަ ކުރިމަތިލުންތަކެއް އޮންނަ ގޮތަށް ތާވަލުގައި ވަނީ ހަމަޖެހިފައެވެ.
ރެހެންދި ފުޓްސަލް ދަނޑުގަ މިރޭ 10.00ގައި ކުޅޭ ގުރޫޕް އޭގެ ފުރަތަމަ މެޗުގައި ބައްދަލުކުރާނީ ގުރޫޕްގެ 1 ވަނާގައި އޮތް ފިއްލަދޫއާއި، ގުރޫޕުގެ 2ވަނާގައި އޮތް ކެލައެވެ. މި މެޗަކީ މިހާރު ހޯދަމުން އަންނަ ކާމިޔާބު އިތުރަށް ދެމެހެއްޓުމަށް ފިއްލަދޫއަށް ވެސް މުހިންމު މެޗެކެވެ. ހަމައެއާއެކު މިރޭގެ މެޗު ކެލައަށް އެހާމެ މުހިންމެވެ. ސަބަބަކީ މިރޭގެ މެޗުން މޮޅުވެގެން ކެލައަށް ވެސް ގުރޫޕުގެ 1 ވަނައަށް އެރުމުގެ ފުރުޞަތު އޮތުމެވެ.
މި ގުރޫޕުގެ އިތުރު މެޗެއް މިރޭ 11.00ގައި ކުޅުމަށް ހަމަޖެހިފައިވާ އިރު، އެ މެޗުގައި ބައްދަލުކުރާނީ 1 ޕޮއިންޓާއެކު ގުރޫޕުގެ 3 ވަނާގައި އޮތް ހޯރަފުށްޓާއި، ޕޮއިންޓެއް އަދި ނުލިބި އޮތް ބާރަށެވެ. މުބާރާތުގެ ސެމީގެ ޖާގަ ހޯދުމަށް މި މެޗަކީ ހޯރަފުށްޓަށް ވެސް މުހިންމު މެޗެކެވެ. ޚާއްޞަކޮށް ބާރަށަށް މި މެޗުގެ މުހިންމުކަން ވަކިން ބޮޑެވެ. ސަބަބަކީ މި މެޗުން ބާރަށް ބަލިވެއްޖެ ނަމަ ސެމީގެ ފުރުޞަތު ބަންދުވެދާނެތީއެވެ.
މި ފޯރި ގަދަ މެޗުތައް ބަލައިލުމަށް ކެލާ، ފިއްލަދޫ، ބާރަށް އަދި ހޯރަފުށީ ސަޕޯޓަރުން ހުޅުމާލޭ ރެހެންދި ފުޓްސަލް ދަނޑަށް ދިޔުމަކީ ޓީމުތަކަށް ލިބިގެންދާނެ ވަރަށް މަތިވެރި ހިތްވަރެކެވެ. އަދި ކުޅިވަރުގެ ރޫޙާ އެއް ގޮތަށް ސަޕޯޓްކުރުމަކީ ޓީމުގެ 6 ވަނަ ކުޅުންތެރިޔާގެ ވަރުގަދަކަން ޓީމުގެ ކުޅުންތެރިންނަށް އިޙްސާސްވާނެ ކަމެކެވެ.
