ޒޯން 1ގެ ޗެމްޕިއަން ނާވައިދޫ، ގޯލްޑަން ފުޓްސަލް ޗެލެންޖުގެ ފައިނަލުގައި މިރޭ ވާދަކުރާނެއެވެ. 119 ޓީމާއެކު ތަފާތު ބުރުތަކެއްގައި ވާދަކޮށް ބޮޑު ތިލަދުންމަތީގެ ނާވައިދޫ ފައިނަލުގައި ވާދަކުރުމަކީ ބޮޑު ތިލަދުންމައްޗަށް ވެސް ލިބޭ ވަރަށް ބޮޑު އުފަލަކާއި، ފަޚުރެކެވެ.
މުބާރާތުގެ އެންމެ ގަދަ ދެ ޓީމުގެ ތެރޭގައި ހިމެނިގެން ނާވައިދޫ މިރޭ ނުކުންނަނީ ރާއްޖޭގެ ފުޓްސަލްގެ ތާރީޚުގައި އައު ޞަފުޙާއެއް ލިޔެލުމަށެވެ. ޔަޤީނުން ވެސް އާ ޗެމްޕިއަނެއް މިރޭ ކަނޑައެޅޭނެއެވެ. މިއީ މި މުބާރާތުގެ ވާދަވެރިކަން އިތުރަށް ހާމަކޮށްދޭ ވެސް ޙަޤީޤަތެއް ވެސްމެއެވެ.
މި ރެއަކީ މިދިޔަ މަހުގެ ތިންވަނަ ދުވަހު ފެށި މި މުބާރާތުގެ އެންމެ ތާރީޚީ ރެއެވެ. ފައިނަލް މެޗުގެ ރެއެވެ. ޗެމްޕިއަނާ ރަނައަޕް ކަނޑައެޅޭ ރެއެވެ. އެންމެ މޮޅު ކުޅުންތެރިން ފާހަގަކުރެވި ކަރުގައި މެޑެލްތައް އެޅުވޭ އުފާވެރި ރެއެވެ.
ވޯލްޑް ކަޕް މުބާރާތްތަކެކޭ އެއްގޮތަށް ގޯލްޑަން ފުޓްސަލް ޗެލެންޖުގެ މެޗުތައް ވެސް ބޮޑު ސްކްރީންތަކުގައި އަޅުވައިގެން ބެލި ރަށްތައް ވެސް މަދެއް ނޫނެވެ. ރަށްރަށުގެ ކެފޭތަކާއި، ރެސްޓޯރަންޓް ތަކުގައި ވެސް މެޗުތަކުގެ ފޯރި އިންތިހާއަށް މި އަހަރު އޮތެވެ. އިޖުތިމާއީ މަރުކަޒުތަކުގައި ވެސް މި މުބާރާތުގެ މެޗުތައް ބަލަމުން ދިޔައެވެ. މިރޭ ފައިނަލުގައި ވާދަކުރަނީ މުޅިން އަލަށް މި މުބާރާތުގެ ފައިނަލަކަށް ނުކުންނަ ދެއްވަދޫއާއި، މި ދިޔަ އަހަރުގެ ފައިނަލުގައި ވެސް ވާދަކުރި ނާވައިދޫއެވެ.
މި ދިޔަ އަހަރު ގޯލްޑަން ފުޓްސަލްގެ ފައިނަލުގައި ވާދަކުރީ ނާވައިދޫއާއި، ކާށިދޫއެވެ. އުތުރުގެ ދެ ޓީމު ފައިބި އަހަރުގެ ފައިނަލުގައި ވާދަކުރިއަސް މި އަހަރުގެ ފައިނަލް މި އޮތީ ރާއްޖޭގެ އުތުރާއި، ދެކުނުގެ ފައިނަލަކަށް ވެފައެވެ. ފައިނަލުގައި ވާދަކުރަނީ ބޮޑު ތިލަދުންމައްޗާއި، ހުވަދު އަތޮޅެވެ.
މިރޭ ކުޅެވޭ މި ފައިނަލް މެޗުގެ ކުޅިބަލައިލަން އެންމެން ވެސް ހުޅުމާލޭ ރެހެންދި ފުޓްސަލް ދަނޑަށް ދާންވީއެވެ. ހަމަގައިމުވެސް މިރޭ ޗެމްޕިއަނުންގެ ލިސްޓުގެ ތެރެއަށް އައު ރަށެއް ވަންނާނެއެވެ. ނޭނގެނީ ލިބޭނެ ޓީމެކެވެ.
