މިހާރު ކެލާގައި ހިނގަމުންދާ، ކެލާ ސްޕޯރޓްސް ފިއެސްޓާ ވޮލީ މުބާރާތުގެ ބާރު ޖެހުންތަކުން ފަސޭހަކަމާއެކު ކެލާ ބަލިކޮށް ހޯރަފުށި ފައިނަލަށް ދަތުރުކޮށްފިއެވެ.
ކެލާ ކައުންސިލުން އިންތިޒާމުކޮށްގެން ކެލާގައި މިހާރު ކުރިއަށްދާ، ކެލާ ސްޕޯރޓްސް ފިއެސްޓާ ވޮލީ މުބާރާތުގެ ސެމީފައިނަލް ދެ ވަނަ މެޗުގައި އިއްޔެ ބައްދަލުކޮށް ކެލާގެ މައްޗަށް ހޯރަފުށިން ކުރި ހޯދީ ސީދާ 3 ސެޓުން ކެލާ ބަލިކުރުމަށް ފަހުގައެވެ.
ފޯރިގަދަ އަދި ރީތި ކުޅުމެއް ފެނިގެން ދިޔަ އިއްޔެ މެޗުތައް ހޯރަފުށިން ކާމިޔާބުކުރީ ފުރަތަމަ ސެޓު 25-23 އިންނެވެ. ދެވަނަ ހޯރަފުށިން ހޯދީ 25-15 އިންނެވެ. ފަހު ސެޓް ހޯރަފުށިން އަތުލީ 25-15 އިންނެވެ. އިއްޔެގެ މެޗުގެ މޮޅު ކުޅުންތެރިއަކަށް ހޮވުނީ ހޯރަފުށީ ތީމުގެ ޖަރޒީ ނަންބަރު 7 އެވެ. މި މެޗުގައި ހޯރަފުށި ޓީމުގެ ޖަރޒީ ނަންބަރ 5 އާދަޔާ ޚިލާފު ޝޮޓްތަކެއް ޖެހިތަން ފެނިގެން ގޮސްފައި ވެއެވެ.
މުބާރާތުގެ ފައިނަލް މެޗުގެ ކުޅުން މިއަދު ހަވީރު އޮންނާނެއެވެ. ފައިނަލްގައި ބައްދަލުކުރަނީ ހަނިމާދޫއާއި، ހޯރަފުއްޓެވެ. ހަނިމާދޫ ފައިނަލަށް ދަތުރުކުރީ ފަސޭހަކަމާއެކު ފިއްލަދޫގެ މައްޗަށް ކުރި ހޯދައިގެންނެވެ.
މިއީ ކެލާ ކައުންސިލުން އިންތިޒާމުކޮށްގެން ކުރިއަށް ގެންދާ ފުރަތަމަ ސްޕޯރޓްސް ފިއެސްޓާއެވެ. މި ފިއެސްޓާގެ ސަބަބުން ކުޅިވަރުގެ އައު ރޫޙެއް އުފެދި ހުނަރުވެރި ކުޅުންތެރިން އުފެދުމަށް ހިތްވަރުލިބިގެންދާނެއެވެ.
