މިހާރު ހއ. މުރައިދޫގައި ހިނގަމުންދާ ތިލައުތުރު ވޮލީ މުބާރާތް 2024ގައި، ކެލާއިން ކުޅުނު 2 ވަނަ މެޗު 3 ސެޓް 2 ސެޓުން އުތީމު ބަލިކޮށް ކެލާ ޓީމުން އުންމީދު އާކޮށްފިއެވެ.
ތިލައުތުރު ވޮލީ މުބާރާތް 2024ގައި މިއަދު ހަވީރު 4.00ގައި ކުޅުނު މި މެޗުގެ ފުރަތަމަ ސެޓް 25 ޕޮއިންޓް 20 ޕޮއިންޓުން ގެނައީ ކެލާއެވެ. ދެ ވަނަ ސެޓް ކެލާއިން ކާމިޔާބުކުރީ 26 ޕޮއިންޓް 24 ޕޮއިންޓުންނެވެ. ނަމަވެސް ތިން ވަނަ ސެޓް އުތީމު ޓީމުން ކާމިޔާބުކުރީ 25 ޕޮއިންޓް 23 ޕޮއިންޓުންނެވެ. ހަތަރު ވަނަ ސެޓް 27 ޕޮއިންޓް 25 ޕޮއިންޓުން ކާމިޔާބުކުރީ އުތީމެވެ. ނަތީޖާ ނެރުމަށް ކުޅުނު ފަސް ވަނަ ސެޓް 15 ޕޮއިންޓް 13 ޕޮއިންޓުން ކާމިޔާބުކޮށް މި މުބާރާތުގެ ފުރަތަމަ މޮޅު ކެލާއިން ހޯދިއެވެ.
ތިލައުތުރު ވޮލީ މުބާރާތުގައި ކެލާ، އުތީމު ބައްދަލުކުރި މެޗުގެ ކުއީން އޮފް ދަ މެޗަކަށް ހޮވުނީ ކެލާ ޓީމުގެ ޖަރޒީ ނަންބަރު 24 ޙައްވާ ތޫހާއެވެ.
ކެލާ ޓީމު ކުޅޭ 3 ވަނަ މެޗު މާދަމާ ރޭ 8.00ގައި އޮންނާނެއެވެ. މި މެޗުގައި ކެލާއާ ބައްދަލުކުރާނީ މުބާރާތް ބާއްވަ ރަށް ކަމުގައިވާ މުރައިދޫއާއެވެ. މުރައިދޫ ޓީމު އޮތީ ކުޅުނު 2 މެޗުން މޮޅުވެ 6 ޕޮއިންޓާއެކު ގުރޫޕުގެ 1 ވަނާގައެވެ. ކެލާ ޓީމަށް ސެމީ ފައިނަލަށް ދެވޭނީ މި މެޗުން މުރައިދޫ ބަލިކޮށްގެންނެވެ.
ތިލައުތުރު ވޮލީ މުބާރާތް 2024 އަކީ ހއ. އަތޮޅު ކައުންސިލުން އިންތިޒާމުކޮށްގެން ކުރިއަށް ގެންދާ މުބާރާތެކެވެ. މި މުބާރާތް ހޯސްޓްކުރަނީ މުރައިދޫއިންނެވެ.
