ސްކޫލު މާޙައުލާއި ދިރިއުޅުމުގެ އެހެނިހެން ކަންކަމުގައި ވެސް ފަހި ވިސްނުން ގެންގުޅޭނެ ގޮތްތައް އޮޅުންފިލުވައި ދެއްވައިފި
ސްކޫލު މާޙައުލާއި ދިރިއުޅުމުގެ އެހެނިހެން ކަންކަމުގައި ވެސް ފަހި ވިސްނުން ގެންގުޅޭނެ ގޮތްތައް އޮޅުންފިލުވައި ދެއްވައިފިއެވެ. ކެލާ ޝައިޚް އިބްރާހީމް ސުކޫލުގެ ލިޓްލް މެއިޑް ދަރިވަރުންނަށް ފަހިވިސްނުން ގެންގުޅޭނެ ގޮތްތައް އޮޅުންފިލުވައި ދެއްވީ އެ ކުދިންނަށް ޚާއްޞަކޮށްގެން ސުކޫލުން ބޭއްވި ކޭމްޕްގައި ކެލާ ޕޮލިސް ސްޓޭޝަނުން ނަންގަވައި ދެއްވި ޚާއްޞަ ސެޝަންތަކެއްގައެވެ.
ލިޓްލްމެއިޑް ކުދިންނަށް، ކެލާ ޕޮލިސް ސްޓޭޝަނުން އިއްޔެ ކުރިއަށް ގެންދިޔަ މި ސެޝަންތަކުގައި މޯޓިވޭޝަނާއި، ޓީމް ބިލްޑިންގގެ ބައިތައް ހިމަނާ ލެއްވިއެވެ. އެ ގޮތުން ޓީމެއްގެ ގޮތުގައި ގުޅިގެން މަސައްކަތްކުރާނެ ގޮތްތަކާއި، ސުކޫލު މާޙައުލާއި އާންމު ދިރިއުޅުމުގައި ކުރިމަތިވާ މައްސަލަތައް ޙައްލުކުރާނެ ގޮތްތަކާއި، މައިންޑް ގޭމްސްގެ އިތުރުން ކޮމާންޑަށް އަމަލުކުރުމުގެ ޙަރަކާތްތައް ކުރިއަށް ގެންގޮސްފައި ވެއެވެ.
މީގެ އިތުރުން ފުލުހުން ނަންގަވައި ދެއްވި މި ސެޝަންތަކުގައި ދިވެހި މުޖުތަމަޢުން ނެތި ކުލަ ފަނޑުވަމުންދާ އިޙްތިރާމުކުރުމުގެ މައްސަލައަށް ވެސް ޙައްލު ހޯދައިދިނުމުގެ ގޮތުން އެއްކުއްޖަކު އަނެއް ކުއްޖަކަށް އިހުތިރާމުކޮށް ގުޅިގެން އުޅުމަށް ކުރެވިދާނެ ކަންކަން ބުނެދީ އޮޅުންފިލުވައި ދެއްވާފައި ވެއެވެ.
ދިވެހި ފުލުހުން އަންނަނީ ކުށް މަދު މުޖުތަމަޢަކަށް، ދިވެހި މުޖުތަމަޢު ހައްދަވައި ދެއްވުމަށް ރާއްޖޭގެ އެކި ކަންކޮޅުގައި ގިނަގުނަ މަސައްކަތްތަކެއް ކުރައްވަމުންކަން އުފަލާއެކު ފާހަގަކުރަމެވެ.
