މާތްﷲގެ ފުއްސެވުމާއި، އެކަލާނގެ ރަޙުމަތުގެ މައްސަރަށް މަރުޙަބާ ކިޔާއިރު، ސަލަފުން ޞާލިޙުން އެމަހަށް ތައްޔާރުވީ ގޮތަށް ތައްޔާރުވުމަށް ޚުޠުބާގައި ގޮވާލައްވައިފި

މާތްﷲގެ ފުއްސެވުމާއި، އެކަލާނގެ ރަޙުމަތުގެ މައްސަރަށް މަރުޙަބާ ކިޔާއިރު، ސަލަފުން ޞާލިޙުން އެމަހަށް ތައްޔާރުވީ ގޮތަށް ތައްޔާރުވުމަށް 2026 ވަނަ އަހަރުގެ ފެބުރުވަރީ މަހުގެ 13 ވަނަ ދުވަހުގެ ހުކުރު ޚުޠުބާގައި ގޮވާލައްވައިފިއެވެ. ”ރުއްސެވުމާއި ފުއްސެވުމުގެ މަހަށް މަރުޙަބާ!” މި މަޢުޟޫއަށް ލިޔެފައިވާ ޚުޠުބާގައި ރަމަޟާންމަހުގެ ދަރުމަޔާއި ބަރަކާތުގެ ފައިދާ އެންމެ ފުރިހަމައަށް ހޯދުމަށް އަޅުކަމާއި އެޔޮޢަމަލުތައް ގިނަކުރުމަށް މުސްލިމުންނަށް ގޮވާލައްވާފައިވެއެވެ. ރޯދައަށް ފުރިހަމައަށް އިސްތިޤުބާލުކުރެވޭނީ، ރޯދައަކީ ކޮބައިކަމާއި ރޯދައާ ބެހޭ ޢާންމު ޙުކުމްތައް އެންގިގެންނެވެ.   

އާދަކާދައިގެމަތިން ޚުޠުބާ ފައްޓަވާފައިވަނީ އެންމެހައި ޙަމްދު ޘަނާ ތަޢުރީފު ޙާއްޤުވެގެންވަނީ މާތްﷲއަށް ކަމާއި އެކަލާނގެ ރަސޫލާއަށް ޞަލަވާތާއި ސަލާމް ލެއްވުން އެދި ދުޢާކުރަމުންނެވެ. އަދި އެ ޞަލަވާތާއި ސަލާމުގައި އެ މާތް ރަސޫލާގެ އާލު އަޞްޙާބުންނާއި ހެޔޮގޮތުގައި ތަބަޢަވީ އެންމެން ޝާމިލް ކޮށްފައި ވެއެވެ. ހަމައެހެންމެ މާތްﷲ އަށް ތަޤުވާގެރިވުމަށާއި މާތްﷲ ފިޔަވާ ޙައްޤުވެގެން އަޅުކަންކުރެވޭ އެހެންފަތާރެއް ނުވާކަމަށާއި އެކަލާނގެއަށް ޝަރީކުނުކުރުމަށް ހުރިހާ މުސްލިމުންނަށް ހަނދާންކޮށްދެއްވާފައި ވެއެވެ.

”ރޯދައަކީ އެކަމަށް ނިޔަތްގަނެ، ފަޖުރުލީއްސުރެ، އިރު އޮއްސިންޖައުމަށް ދާންދެން، ކެއުމާއި ބުއިމާއި ރޯދަގެއްލޭ އެންމެހައި ކަންތައްތަކުން ދުރުހެލިވެގެން ހުރުމެވެ. ރޯދަވެރިޔާ އޭނާގެ ދުލާއި، އެހެނިހެން ގުނަވަންތައް މުންކަރާތްތަކުން އެއްކިބާކުރަންޖެހޭނެއެވެ. އެއީ ދޮގުހެދުމާއި އުރެދުމުގެ ޢަމަލުތަކަށް އަރައިގަންނަ މީހާ، ނުކައި ނުބޮއި ހުރިކަމުގައި ވިޔަސް އެތައްއެތައް ސަވާބަކުން މަޙުރޫމު ވާތީއެވެ” މި ޢިބާރާތްތަކުން ދިވެހި އުއްމަތަށް ނަސޫޙަތްތެރިވެ، މިކަމުގެ ދަލީލުތައް ގެނެސްފައި ވެއެވެ.

”ރަމަޟާންމަހަކީ އީމާންކަމާއި ތަޤުވާވެރިމަކުގެ މަހެކެވެ. މަތިވެރި އަޚުލާޤާއި ތަރުބިއްތަޔުގެ މަހެކެވެ. ކެތްތެރިކަމާއި، އޯގާވެރިކަމުގެ މަހެކެވެ. ރޯދައަކީ، އިޚުލާޞްތެރިކަމާއި، އަމާނާތްތެރިކަން ދަސްކޮށްދޭ އަޅުކަމެކެވެ. ރޯދަވެރިޔާގެ ރޯދައަކީ އަޅާއާއި އޭނާގެ ވެރިރަސްކަލާނގެއާ ދެމެދު އޮތް ބޮޑު ސިއްރެކެވެ.” ދެއްކުންތެރިކަމެއްނެތި އިޚުލާޞްތެރިކަމާއެކު ރޯދަހިފުމަށް އުއްމަތަށް އިރުޝާދު ދެއްވާފައިވެއެވެ.

ރޯދަގެއްލޭ ކަންތައްތަކާއި ރޯދަ ހިފުމަށް ޢުޒުރުވެރިވާ ފަރާތްތަކުން ޢަމަލުކުރަންޖެހޭ ގޮތައް ބަޔާންކުރައްވާފައި ވެއެވެ. ރަމަޟާންމަހުގެ ވަގުތުތައް ބޭކާރުވިޔަނުދިނުމަށާއި ގިނަވަގުތު އަޅުކަމުގައި ހީވާގިކަމާއެކު ހޭދަކުރުމަށް އިރުޝާދު ދެއްވާފައި ވެއެވެ. ތަރާވީޙުނަމާދު ކުރުމަށާއި، ރޭއަޅުކަމަށް ތެދުވެ، ފާފަފުއްސެވުމަށާއި ރަނގަޅުގޮތްވުމަށް ގިނަގިނައިން ދުޢާކުރުމަށް ހަންދާންކޮށްދެއްވާފައި ވެއެވެ.