2023 – 2024ގެ އޯލެވެލް ނަތީޖާގެ ގަދަ 10 އަށް ކެލާ ޝައިޚް އިބްރާހީމް ސްކޫލުގެ 3 ދަރިވަރަކު އަރައިފިއެވެ.
މި ދިޔަ އަންގާރަ ދުވަހު އިޢުލާންކުރި ނަތީޖާގައިވާ ގޮތުން 7 ވަނާގަައި ކެލާ ސުކޫލުގެ އާދަމް އަސީލް ހިމެނިފައިވާ އިރު 10 ވަނާގައި އެ ސްކޫލުގެ 2 ދަރިވަރަކު ވަނީ ހިމެނިފައެވެ. އެއީ އިޝާ އިސްމާޢީލާއި، މުޙައްމަދު ނާޒިހެވެ.
ރާއްޖޭގެ ތާރީޚުގެ ރީތި ފަތްފުށްތަކުން ފެންނަން އޮތީ ، ކެލާއަކީ ޢިލްމަށް ލޯބިކުރާ ރައްޔިތަކު ދިރިއުޅެމުން އަންނަ ރަށެއްގެ ގޮތުގައެވެ. ތަޢުލީމީ ރެކޯޑްތަކުން އަބަދުވެސް ކެލާ ކުދިން އަންނަނީ ޖާގަ ހޯދަމުންނެވެ.
އޯލެވެލްއާއި، އޭލެވެލްގެ ނަތީޖާތަކުން ވެސް ކެލާ ކުދިންގެ ވިދުން ފަޑު ކަމަށް ދެންނެވޭކަށް ނެތެވެ. ނިމިދިޔަ އެންމެ ފަހުގެ ހައި އެޗީވަރސް ސްކޮލަރޝިޕްން ވެސް ކެލާގެ ކުދިން ކޮޅެއް ޖާގަ ހޯދިއެވެ.
އޯލެވެލް ގަދަ 10 ހޯދި ކެލާ ސްކޫލުގެ 3 ދަރިވަރުންނާ އެ ދަރިވަރުންގެ ބެލެނިވެރިންނަށް، ހޫނު މަރުޙަބާ ތިލައުތުރުން ކިޔަމެވެ. މި މަރުޙަބާގައި ސްކޫލުގެ އެންމެހައި ވެރިންނާއި ކިޔަވައިދެއްވި އެންމެހައި ޓީޗަރުން ޝާމިލްކުރަމެވެ
