ރައީސް މައުމޫނު ވިދާޅުވި ފަދައިން ރާއްޖޭގެ ރަންބިސްއަޅައި ކުކުޅަކީ ފަތުވެރިކަމެވެ. މިއީ ޙަޤީޤަތެއްކަން ފާޅުކަން ބޮޑު ގޮތެއްގައި މި ދަނީ ހާމަވަމުންނެވެ. އެ ކުކުޅު އަޅައި ބިހުގެ ޢަދަދު އިތުރުކުރެވިގެން ނޫނީ މި ޤައުމަށް ފާގަތިކަން ހޯދޭކަށް ނެތެވެ. 1972 ގައި ރާއްޖޭގައި ފެށުނު ފަތުރުވެރިކަމުގެ ސިނާއަތު ބުނެދެނީ އެ ހަޤިޤަތެވެ.
2019 ވަނަ އަހަރު މުޅި ދުނިޔެއަށް ކުރިމަތިވި ކޮވިޑުގެ ވަބާގައި ފުދުންތެރިކަމާއި، އުފެއްދުންތެރިކަން ކުޑަަ މި ޤައުމުގެ ރައްޔިތުން ތަޙައްމަލުކުރި އިޤްތިޞާދީ ޙާލަތު ބުނެދެނީ އެ ވާހަކައެވެ. ހާމަކޮށްދިނީ ފަތުރުވެރިކަން އިނދަޖެހުމުން ޤައުމުގެ އިޤްތިޞާދު ފުނޑިގެންދާ ކަމެވެ. އާންމު ރައްޔިތުން ނިކަމެތިވެ ބިކަވާ ވަރެވެ. ގޮތް ހުސްވެ މުޅި ރާއްޖެ ސުމަކަށް ދިޔަ ގޮތެވެ.
ޝައްކެއްނެތެވެ. ފަތުރުވެރި ކަމަކީ މި ރާއްޖޭގެ އިޤްތިޞާދުގެ މައި ބަދައެވެ. އެއް ވަނަ މަސައްކަތެވެ. މި މަސައްކަތަށް ވާގިދެވިގެން ނޫނީ މި ރާއްޖެ ކުރިއަރައި ދާކަށް ނެތެވެ. އިޤްތިޞާދީ ގޮތުން ފުދުންތެރިވާކަށް ނެތެވެ.
ހަނިމާދޫ އިންޓަނޭޝަނަލް އެއާޕޯޓަކީ ތިލަދުންމައްޗަށް ފަތުރުވެރިން ވައްދައިދޭނެ މައި ދޮރޯއްޓެވެ. މި ދޮރޯށިން ވަންނަ ފަތުރުވެރިން ޢަދަދު ބޮޑުތަނުން އިތުރުވާން މާ ގިނަދުވަސް ހޭދަވާ ތަނެއް އަޅުގަނޑަކަށް ނުފެނެއެވެ. ސަރުކާރުން ފަހިކޮށްދިން ވަރަކަށް މި ސިނާއަތުގެ މަލަ ތިލަދުންމަތިން ދާނީ އުފުލެމުންނެވެ. އަންނަ ފަތުރުވެރިންގެ ޢަދަދު ދާނީ ބޮޑުތަނުން އިތުރުވަމުންނެވެ.
ރައީސް ޑރ. މުޙައްމަދު މުޢިއްޒުގެ ސިޔާސަތުތައް ބިނާކޮށްފައި ހުރީ ރާއްޖޭގެ ތަރައްޤީގެ ދުވެލި މަޑުޖެހޭ ގޮތަކަށް ނޫނެވެ. އެ މަނިކުފާނުގެ ދުރުވިސްނުންފުޅުން ތަރައްޤީވެފައިވާ ޤައުމަކަށް މި ޤައުމުވާ މަންޒަރު ކުރެހެމުން ދެއެވެ. ބޮޑު ތިލަދުންމަތި އެ މަންޒަރުތަކުން ފަލަކޮށް ފެވި ކުލަޖެހެމުން ބޮޑު ތިލަދުންމަތި ދެއެވެ.
ހަނިމާދޫ އިންޓަނޭޝަނަލް އެއާޕޯޓާއެކު، ބޮޑު ތިލަދުން މައްޗަށް އިންވެސްޓަރުންގެ ކަޅި ހުއްޓޭކަށް ގިނަ ދުވަސްތަކެއް ނުވާއެވެ. ބޮޑު ތިލަދުންމަތިން ބީލަމަށްލީ ރަށްތަކާއި، ފަޅުތައް ބިޑުކޮށް ޑިވެލޮޕުކުރާނެ އިންވެސްޓަރުން ފެންނާއެވެ. ތިން ހަތަރު ފަހަރު އިޢުލާންކޮށް ނުވިކުނު ތަންތަން ވެސް އޭރުން ވިކޭނެއެވެ. ކެލާ ފަޅުތެރޭން ރަށްތައް ހިކި، ޑޮލަރު ޑަބިޔާތައް ކެލައަށް ލައްގަން ފަށައިކަސް ގިނަ ދުވަސްތަކެއް ނުވާނެއެވެ. ތިލަދުންމަތީގެ އިންވެސްޓަރުން ވެސް، ތިލަދުންމަތިން އުފަންވާކަށް އޭރުން ލައްކަ ދުވަހެއް ނުވާނެއެވެ.
ތެދެކެވެ. ބޮޑު ތިލަދުންމަތީގެ މަލަ ޤައުމުގެ އެންމެ އުހުގައި ވިދާ ބަބުޅާނެ ޒަމާން މާ ދުރެއް ނޫނެވެ. ތިލަދުންމައްޗަކީ މި ރާއްޖޭގެ ފަތުރުވެރިކަމަށް އެންމެ ހިތްގައިމު އެއް މަންޒިލެވެ. ރީތި ފަޅުތަކާއި، ފިނޮޅުތަކާއި، ރަށްތައް މި ސަރަޙައްދުގައި ވެސް އެބަ ހުއްޓެވެ. ހިތް ހެޔޮ ރައްޔިތަކު ތިލަދުންމަތީގައި ދިރިއުޅެއެވެ. ސަގާފީ ކުޅިވަރުތަކުގައި ވެސް މިއީ މަޝްހޫރު ސަރަހައްދެކެވެ. ދަނޑުވެރިންނާ، މަސްވެރިންނާ، ރާވެރިން މި ސަރަޙައްދުގައި ވެސް އެބަ ތިއްބެވެ. މަސައްކަތްތެރި ފަންނުވެރިން ތިލދުންމަތީގައި ވެސް މަދެއް ނޫނެވެ.
ހާހުން ގުނޭ ވަރަށް ފަތުރުވެރިން ތިލަދުން މައްޗަށް އެތެރެވެ، ބޭރުވެވޭނެ ފަހިގޮތްތައް ފަތުރުވެރިކަމުގެ ތެރޭން ސާރުކާރުން ފަހިކޮށް ދެވިއްޖެ ނަމަ، ހަނިމާދޫ އިންޓަނޭޝަނަލް އެއާޕޯޓު ވެގެން ދާނީ ތިލަދުންމައްޗަށް އިންޤިލާބީ ބަދަލެއް ގެނެސްދޭނެ ދޮރޯއްޓަށެވެ. ބޮޑެތި މަތިންދުއްވާ ބޯޓުތަކާއި، ޕްރައިވެޓް ޖެޓްތައް އެންމެ ގިނައިން ތިރިކުރާނެ އެއް މަންޒިލަށެވެ. ތިލަދުންމައްޗަށް އަންނަން އޮތް ތިޔާގިކަމުގެ މޫސުންބަހާރުގެ ބަގީޗާއަށެވެ.
