އިއްޔެ ފެށި ތިލައުތުރު ފުޓްސަލް މުބާރާތުގެ ފުރަތަމަ މެޗުން ކެލާ ޓީމަށް ލިބުނު ނާކާމިޔާބު، ކާމިޔާބަކަށް ބަދަލުކުރުމުގެ ވަރުގަދަ ޢަޒުމުގައި މިރޭ ދިއްދޫ މެޗަށް ނުކުންނަ ކަމަށް ޓީމުގެ ކޯޗު އާދަމް ޝަރީފު ވިދާޅުވެއްޖެއެވެ.
މިރޭގެ މެޗާ ބެހޭ ގޮތުން ތިލައުތުރު ނޫހުން ކުރި ސުވާލަކަށް ޖަވާދެއްވަމުން ކޯޗު އާދަމް ޝަރީފު ވިދާޅުވީ މިރޭގެ މެޗަށް ނުކުންނަނީ މެޗު ނެގުމަށް ކަމަށެވެ. ޓީމުގެ ހުރިހައި ކުޅުންތެރިން ވެސް ތިބީ އެ ޢަޒުމުގައި ކަމަށް ޒުވާން ކޯޗު ވިދާޅުވިއެވެ.
މިރޭގެ މެޗަށް ނުކުންނަ އިރު ދިއްދޫއަށް ވެސް ވަނީ 3 ޕޮއިންޓް ލިބިފައެވެ. އެއީ ކުޅުނު ފުރަތަމަ މެޗު، 2 ލަނޑު 1 ލަނޑުން މުރައިދޫގެ މައްޗަށް ކުރި ހޯދައިގެންނެވެ. ކެލާއަކަށް އަދި ޕޮއިންޓެއް ނުލިބެއެވެ. ކެލާ ވަނީ ބާރަށާއެކު ކުޅުނު ފުރަތަމަ މެޗުން 1-0 އިން ބަލިވެފައެވެ.
ތިލައުތުރު ފުޓްސަލް މުބާރާތުގެ ބީ ގުރޫޕުގެ ޕޮއިންޓް ތާވަލަށް ބަލައި އިރު ކެލާ ފިޔަވާ މި ގުރޫޕުގައި ހިމެނޭ ދިއްދޫ، ބާރަށް އަދި މުރައިދޫއަށް ވެސް މި ވަގުތު ވަނީ 3 ޕޮއިންޓް ލިބިފައެވެ. މުރައިދޫއަށް 3 ޕޮއިންޓް ލިބުނީ މިއަދު ހަވީރު ކުޅުނު މެޗު 3-2 އިން ބާރަށުގެ މައްޗަށް ކުރި ހޯދައިގެންނެވެ.
މިރޭގެ މެޗު ކެލައަށް ގެއްލިއްޖެ ނަމަ މުބާރާތާ އަލްވަދާޢު ކިޔަންޖެހުމަކީ ވެދާނެ ކަމެކެވެ. ތިލައުތުރު ފުޓްސަލް މުބާރާތް މި އަހަރު ކުރިއަށް ދަނީ ބޮޑުތަކުރުފާނުގެ ރަށުގައެވެ. މުތީއެއް ފަދަ އުތީމުގައެވެ.
