އަންނަ ނޮވެންބަރު 4 ވަނަ ދުވަހު ފެށުމަށް ހަމަޖެހިފައިވާ ތިލައުތުރު ފުޓުސަލް މުބާރާތުގައި ގަދަފަދަ ދިއްދޫއާ އެއް ގުރޫޕެއްގައި ކެލާ ހިމެނިއްޖެއެވެ.
ގޯލްޑަން ފުޓްސަލް މުބާރާތުގައި ވެސް ރަނގަޅު ނަތީޖާ ހޯދަމުން އަންނަ ދިއްދޫއާއި، ކެލާގެ އިތުރުން ބީ ގުރޫޕުގައި ހިމެނެނީ މުރައިދޫއާއި ބާރަށެވެ. އޭ ގުރޫޕުގައި ހިމެނެނީ އުތީމާއި، އިހަވަންދޫއާއި، ވަށަފަރާއި، ފިއްލަދޫއާއި އަދި ހޯރަފުއްޓެވެ.
އުތީމުގައި ބޭއްވުމަށް ހަމަޖެހިފައިވާ މި މުބާރާތް ފެށުމަށް ހަމަޖެހިފައި ވަނީ އިހަވަންދޫއާއި އުތީމު ބައްދަލުކުރާ މެޗުންނެވެ.
މިއީ ހއ. އަތޮޅުގެ ރައްޔިތުންގެ މެދުގައި އެކުވެރިކަމާއި އެއްބައިވަންތަކަން ދަމަހައްޓައި އާލާކޮށް، އިޖްތިމާޢީ ގުޅުން ބަދަހިކުރުމާއި، ކުޅިވަރުގެ ރޫޙު އާލާކޮށް ދެމެހެއްޓުމުގެ މަޤުސަދުގައި ކުރިއަށްގެންދާ މުބާރާތެކެވެ. މީގެ އިތުރުން ހއ. އަތޮޅުގައި ހުނަރުވެރި ފުޓްސަލް ކުޅުންތެރިން އުފެއްދުމާއި، ފުޓްސަލް ކުރިއެރުވުމާއި، ހުނަރުވެރި ކުޅުންތެރިންގެ ހުނަރު ދައްކާލުމާއި، އެ ފަރާތްތަކަށް ވާދަކުރުމުގެ ފަހި މާޙައުލެއް ހޯދައިދިނުމަކީ ވެސް މި މުބާރާތުގެ މަޤުސަދެކެވެ.
ޗެންޕިއަން ޓީމަށް 35000.00 ރުފިޔާގެ ފައިސާގެ އިނާމު ހުށަހެޅިފައިވާ މި މުބާރާތުގައި ރަނައަޕް ޓީމަށް 15000.00 ރުފިޔާގެ ފައިސާގެ އިނާމު ދެއްވާ ގޮތަށް ވަނީ ހަމަޖެހިފައެވެ. މުބާރާތުގެ ފެއަރޕްލޭ ޓީމަށް ދިނުމަށް ހަމަޖެހިފައި ވަނީ 5000.00 ރުފިޔާގެ ފައިސާގެ އިނާމެވެ.
ތިލައުތުރު ފުޓްސަލް މުބާރަތުގެ އެންމެ ފަހުގެ ޗެންޕިއަނަކީ އިހަވަންދޫއެވެ. ރަނައަޕަކީ އުތީމެވެ.
