ސަލްމާނު މިސްކިތުގެ 4 ވަނަ އަދި 5 ވަނަ ފަންގިފިލާގައި މިހާރު ކުރިޔަށްދާ ޤުރުއާން ކިޔެވުމުގެ 36 ވަނަ ޤައުމީ މުބާރާތުގައި ކެލާގެ 8 ކުއްޖަކު ވާދަކުރެއެވެ. އެއީ ހއ. އަތޮޅު ކައުންސިލުގެ ނަމުގައި ވާދަކުރާ 5 ދަރިވަރުންނާއި، ކެލާ ޔޫތު ފޯރަމުގެ ފަރާތުން ކިޔަވާ 3 ދަރިވަރުންނެވެ.
މި އަހަރުގެ މުބާރާތުގައި 119 މުއައްސަސާއަކުން 1029 ބައިވެރިން ވާދަކުރެއެވެ. އެއީ ސިޓީތަކުން ވާދަކުރާ 52 ބައިވެރިންނާއި، ސުކޫލުތަކުން 365 ބައިވެރިންނާއި، އަތޮޅު ކައުންސިލުތަކުން 357 ބައިވެރިންނާއި، އެހެނިހެން މުއައްސަސާތަކުން 292 ބައިވެރިންނާއި، އަދި ޙާފިޒުންގެ ބައިގައި ވާދަކުރާ 15 ބައިވެރިންނެވެ.
މި މުބާރާތުގެ ފޯރި މިހައިރަށް ވުރެ އިތުރުކުރުމަށް ޓަކައި ގެންނަންޖެހޭ ބަދަލުތަކެއް އަދިވެސް އެބަ ހުއްޓެވެ. ޤުރުއާނާ ބެހޭ މަރުކަޒަށް ކޮށްދެވިދާނެ ގިނަގުނަ ކަންތައްތަކެއް އެބަ ހުއްޓެވެ. އެ ގޮތުން ކީސްޓޭޖްތަކުން ދަރިވަރުން ވާދަކުރިއަސް އެ މުއައްސަސާއަކަށް ލިބޭ އެންމެ ފެންވަރު ރަނގަޅު ދަރިވަރުންނަށް ފުރުޞަތު ލިބޭ ގޮތަށް މުބާރާތް ހުޅުވައިލެވޭ ނަމަ ކިޔަވާ ދަރިވަރުންގެ ކޮލެޓީ މިހައިރަށް ވުރެ ރަނގަޅު ވާނެއެވެ. އަދި ދަރިވަރުން ބައިވެރިކުރާ އިރު ގޮފިތަކުން ލާޒިމުކުރާ ވަކި ޢަދަދެއް އޮންނަ ފަދައިން ގިނަ ވެގެން ބައިވެރިކުރެވިދާނެ ޢަދަދެއް އޮންނަ ނަމަ ގިނަ ދަރިވަރުންނަށް ފުރުޞަތު ލިބި، މުބާރާތުގެ ވާދަވެރިކަން މިހައިރަށް ވުރެވެސް ބޮޑުވެ ގިނަގުނަ ފައިދާތަކެއް ކުރާނެ ކަމުގައި ބެލެވެއެވެ.
ޖޫން މަހުގެ 29 އިން މި ހިނގާ ޖުލައި މަހުގެ 7 އަށް ކުރިޔަށްދާ މި މުބާރާތުގެ ނަތީޖާ ފާލުކުރުން މި މަހުގެ 12 ވަނަ ދުވަހު ބޭއްވުމުގެ ތައްޔާރީތައް ކީރިތި ޤުރުއާނާ ބެހޭ މަރުކަޒުން ވަމުންދާ ކަމުގައި ތިލައުތުރަށް މަޢުލޫމާތު ލިބިފައި ވެއެވެ.
