ތިލައުތުރު ވޮލީ މުބާރާތުގެ ފުރަތަމަ ތަށި މުރައިދޫ ހޯދައިފިއެވެ. ތިލައުތުރު ވޮލީ މުބާރާތުގެ ފުރަތަމަ ތަށި މުރައިދޫއިން ހޯދީ އިހަވަންދޫއާ ވާދަކޮށް ސީދާ 3 ސެޓްން ފައިނަލް މެޗް ކާމިޔާބުކޮށްގެންނެވެ.
މުރައިދޫއާއި، އިހަވަންދޫ ވާދަކުރި މެޗް އަދި މުބާރާތް ނިންމުމުގެ ރަަސްމިއްޔާތު ޝަރަފުވެރިކޮށްދެއްވީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އޮނަރަބްލް އާދަމް ޝަރީފު ޢުމަރެވެ. މި ރަސްމިއްޔާތުގައި އަތޮޅު ކައުންސިލްގެ ރައީސާއި، އެ ކައުންސިލްގެ މެންބަރުންނާއި، ސިޓީސް މިނިސްޓްރީގެ ނާއިބު ޢަލީ ޝަމީމާއި، މުޙައްމަދު ޙަސަންގެ އިތުރުން މުރައިދޫގެ މުއައްސަސާތަކުގެ ވެރިން ބައިވެރިވެލެއްވިއެވެ.
ރޭ 8.00 ގައި ކުޅުނު ތިލައުތުރު ވޮލީ މުބާރާތް 2024 ގެ ފައިނަލްގައި މުރައިދޫއާއި، އިހަވަންދޫ ބައްދަލުކުރި މެޗްގެ ފުރަތަމަ ސެޓް މުރައިދޫ ކާމިޔާބުކުރީ 25 ޕޮއިންޓް 9 ޕޮއިންޓްންނެވެ. ދެވަނަ ސެޓް މުރައިދޫ ހޯދީ 25 ޕޮއިންޓް 15 ޕޮއިންޓްންނެވެ. އަދި ތިން ވަނަ ސެޓް މުރައިދޫ ކާމިޔާބުކުރީ 25 ޕޮއިންޓް 19 ޕޮއިންޓްންނެވެ. މި މެޗްގެ ކުއީން އޮފް ދަ މެޗަކަށް ހޮވުނީ މުރައިދޫ ޓީމުގެ ޖަރޒީ ނަންބަރ 17 ފާޠިމަތު ސަމާއެވެ. ފާޠިމަތު ސަމާއަށް އިނާމު ޙަވާލުކޮށްދެއްވީ ޝަރަފުވެރި މެހްމާނު ވަޒީރު އާދަމް ޝަރީފު ޢުމަރެވެ.
މުބާރާތުގެ އެހެނިހެން ނަތީޖާ
މުބާރާތުގެ އެންމެ މޮޅު 6 ކުޅުންތެރިން
1. އިހަވަންދޫ ޓީމުގެ ޖަރޒީ ނަންބަރު 14 ފާޠިމަތު ޠަހޫރާ،
2. އިހަވަންދޫ ޓީމުގެ ޖަރޒީ ނަންބަރ 9 އީނަތު އަހްލާ
3. މުރައިދޫ ޓީމުގެ ޖަރޒީ ނަންބަރ 17 ފާޠިމަތު ސަމާ
4. މުރައިދޫ ޓީމުގެ ޖަރޒީ ނަންބަރ 10 ފާޠިމަތު ނުހާ
5. މުރައިދޫ ޓީމުގެ ޖަރޒީ ނަންބަރ 2 ސަމީނަތު ޙުސައިން
6. ބާރަށު ޓީމުގެ ޖަރޒީ ނަންބަރ 7 އާމިނަތު އަރީޝާ
މުބާރާތުގެ އެންމެ މޮޅު ކޯޗް:މުރައިދޫ ޓީމުގެ ކޯޗް އަސްރާރު ޢަބްދުﷲ
މުބާރާތުގެ އެންމެ މޮޅި ލިބަރޯ: ވަށަފަރު ޓީމުގެ ޖަރޒީ ނަންބަރ 7 މަޒީނާ މުޙައްމަދު
މުބާރާތުގެ އެންމެ ޒުވާން ކުޅުންތެރިޔާ: އިހަވަންދޫ ޓީމުގެ ޖަރޒީ ނަންބަރ 12 އައިރީން އިބްރާހީމް
މުބާރާތުގެ ކުއީން އޮފް ދަ ޓޯނަމަންޓް (ވޮލީ ބޯލް ކުއީން): މުރައިދޫ 10 ފާޠިމަތު ނުހާ
މުބާރާތުގެ ފެއަރޕްލޭ ޓީމް: ބާރަށު ޓީމް
މުބާރާތުގެ ރަނަރއަޕް ޓީމް: އިހަވަންދޫ ޓީމް
މުބާރާތުގެ ޗެމްޕިއަން ޓީމް: މުރައިދޫ ޓީމް
މި މުބާރާތުގެ ޗެމްޕިއަން ޓީމަށް 20000 ރުފިޔާ ދެއްވާފައިވާ އިރު، މި މުބާރާތުގެ ރަނަރއަޕް ޓީމަށް ދެއްވާފައި ވަނީ 15000 ރުފިޔާއެވެ. އަދި ފެއަރ ޕްލޭ ޓީމަށް ދެއްވީ 5000 ރުފިޔާއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމްކޮށްގެން މުރައިދޫގައި ބޭއްވި ތިލައުތުރު ވޮލީ މުބާރާތް 2024 ނިންމުމަށް ބޭއްވި ރަސްމިއްޔާތުގައި މުރައިދޫ ކައުންސިލްގެ ރައީސާއި، އަތޮޅު ކައުންސިލްގެ ރައީސް ވާހަކަފުޅުދެއްކެވިއެވެ. މުބާރާތް ނިންމުމަށް ބޭއްވި ކުލަގަދަ ރަސްމިއްޔާތުގައި މުބާރާތުގެ ޗެމްޕިއަން ޓީމަށް ތައްޓާއި ފައިސާގެ އިނާމާއި މެޑެލް ޙަވާލުކޮށްދެއްވީ ވަޒީރު އާދަމް ޝަރީފު ޢުމަރެވެ.
