މިހާރު ހއ. މުރައިދޫގައި ހިނގަމުންދާ ތިލައުތުރު ވޮލީ މުބާރާތް 2024ގެ، ފުރަތަމަ މެޗުން ވަށަފަރާ ވާދަކޮށް، ބަލިވިޔަސް ރަނގަޅު ކުޅުމެއް ކެލާ ޓީމުން ދެއްކިއެވެ.
މި މުބާރާތުގައި ކެލާ ކުޅުނު ފުރަތަމަ މެޗުން ވަށަފަރު މޮޅުވީ 3 ސެޓް 1 ސެޓުންނެވެ. ފުރަތަމަ ސެޓް 25 ޕޮއިންޓް 20 ޕޮއިންޓުން ގެންދިޔައީ ވަށަފަރެވެ. ދެ ވަނަ ސެޓް ވަށަފަރުން ކާމިޔާބުކުރީ 25 ޕޮއިންޓް 14 ޕޮއިންޓުންނެވެ. ނަމަވެސް ތިން ވަނަ ސެޓް ކެލާ ޓީމުން ކާމިޔާބުކުރީ 25 ޕޮއިންޓް 23 ޕޮއިންޓުންނެވެ. ހަތަރު ވަނަ ސެޓް 25 ޕޮއިންޓް 23 ޕޮއިންޓުން ކާމިޔާބުކުރީ ވަށަފަރެވެ.
ތިލައުތުރު ވޮލީ މުބާރާތުގައި ކެލާ، ވަށަފަރު ބައްދަލުކުރި މެޗުގެ ކުއީން އޮފް ދަ މެޗަކަށް ހޮވުނީ ވަށަފަރު ޓީމުގެ ޖަރޒީ ނަންބަރު 8 އާމިނަތު ނާއިލާއެވެ.
ކެލާ ޓީމު ކުޅޭ 2 ވަނަ މެޗު މާދަމާ ހަވީރު 4.00 ގައި އޮންނާނެއެވެ. މި މެޗުގައި ކެލާއާ ބައްދަލުކުރާނީ އުތީމު ޓީމެވެ. އުތީމު ޓީމު ވެސް ވަނީ ކުޅުނު ފުރަތަމަ މެޗުން މުރައިދޫޫ އަތުން ސީދާ 3 ސެޓުން ބަލިވެފައެވެ. ތިލައުތުރު ވޮލީ މުބާރާތް 2024 އަކީ ހއ. އަތޮޅު ކައުންސިލުން އިންތިޒާމުކޮށްގެން ކުރިއަށްދާ މުބާރާތެކެވެ. މި މުބާރާތް ހޯސްޓްކުރަނީ މުރައިދޫއިންނެވެ.
