ތިލައުތުރު ފުޓްސެލް މުބާރާތް 2024ގެ ޗެންޕިއަންކަން އިހަވަންދޫ ހޯދައިފިއެވެ. މުބާރާތުގެ ޗެންޕިއަންކަން އިހަވަންދޫ ހޯދީ ފައިނަލުގައި އުތީމުގެ މައްޗަށް 1 ލަނޑު 0 ލަނޑުން ކުރި ހޯދައިގެންނެވެ.
ސަޕޯޓަރުންގެ ވުވުޒިލާގެ އަޑު މެދުނުކެނޑި އިވެމުން ދިޔަ މި ފޯރިގަދަ ފައިނަލް މެޗުގެ ކުޅިބެލުމަށް އަތޮޅުގެ ގިނަ ބަޔަކު މިއަދު ހަވީރު ކެލައަށް ޖަމާވިއެވެ. ޚާއްޞަކޮށް އިހަވަންދޫއާއި، އުތީމުން އައި ސަޕޯޓަރުންގެ ޢަދަދު ގިނަކަން ވަކިން ފާހަގަކޮށްލެވެއެވެ. މާލޭ ފަޅުތެރެއެކޭ އެއް ގޮތަށް ކެލާ ބަނދަރު ވެސް މިއަދު އޮތީ އޮޑިދޯނި ފަހަރުން ފުރި ބާރުވެފައެވެ.
އަތޮޅުގެ 10 ރަށަކުން ވާދަކުރި ތިލައުތުރު ފުޓްސެލް މުބާރާތުގެ ފައިނަލް މެޗަށް ފަހު މިއަދު ހަވީރު ވަނީ މުބާރާތް ނިންމުމުގެ ކުލަ ގަދަ ރަސްމިއްޔާތު ވެސް ބާއްވާފައެވެ. ހއ. އަތޮޅު ޕޮލިސް ކޮމާންޑަރ ޝަރަފުވެރިކޮށްދެއްވި މި ރަސްމިއްޔާތުގައި މުބާރާތުގެ ފަޚުރުވެރި ވަނަތައް ޙާޞިލްކުރި ކުޅުންތެރިންނަށާއި، ޓީމުތަކަށް ވަނީ އިނާމު ދެވިފައެވެ.
ފޯރި ގަދަ އަދި ވާދަވެރި ފައިނަލް މެޗުގެ މޮޅު ކުޅުންތެރިއަކަށް ހޮވުނީ ޗެންޕިއަންކަން ހޯދި އިހަވަންދޫ ޓީމުގެ ޖަރޒީ ނަންބަރ 10 އިބްރާހީމް ޙާމިދެވެ.
މުބާރާތުގެ ޚާއްޞަ ނަތީޖާ
މުބާރާތުގެ އެންމެ ގިނަ ގޯލް ޖަހައިގެން ރަން ބޫޓް ޙާޞިލްކުރީ: އުތީމު ޓީމުގެ ޖަރޒީ ނަންބަރ 7 މުޙައްމަދު މަޒީން
މުބާރާތުގެ އެންމެ މޮޅު 5 ކުޅުންތެރިން
އިހަންދޫ ޓީމުގެ ޖަރޒީ ނަންބަރ 10 އބްރާހީމް ޙާމިދު
އިހަވަންދޫ ޓީމުގެ ޖަރޒީ ނަންބަރ 7 މުޙައްމަދު މަދީޙު
އުތީމު ޓީމުގެ ޖަރޒީ ނަންބަރ 7 މުޙައްމަދު މަޒީން
ބާރަށު ޓީމުގެ ޖަރޒީ ނަންބަރ 21 މުޙައްމަދު ޒަޔާން
ބާރަށު ޓީމުގެ ޖަރޒީ ނަންބަރ 9 މުޙައްމަދު ޝާމިލް
ތިލައުތުރު ފްޓްސެލް ކިންގ: އިހަވަންދޫ ޓީމުގެ ޖަރޒީ ނަންބަރ 7 މުޙައްމަދު މަދީޙު
މުބާރާތުގެ އެންމެ މޮޅު ކޯޗް: އިހަވަންދޫ ޓީމުގެ ކޯޗް ނުއުޝާން ޢަބްދުއްރައްޒާޤް
މުބާރާތުގެ ފެއަރ ޕްލޭ ޓީމް: އިހަވަންދޫ ޓީމް
މުބާރާތުގެ ރަނަރ އަޕް ޓީމް: އުތީމު ޓީމް
މުބާރާތުގެ ޗެންޕިއަން ޓީމް:އިހަވަންދޫ ޓީމް
ޗެންޕިއަން ޓީމަށް 30000 ރުފިޔާ އަދި ރަނަރ އަޕް ޓީމަށް 15000 ރުފިޔާ ދިން، ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ބޭއްވި މި މުބާރާތް ނިންމުމުގެ ރަސްމިއްޔާތުގައި ހއ. އަތޮޅު ކައުންސިލްގެ ރައީސް އަލްފާޟިލް މޫސާ ޝަފީޤް ދެއްކެވި ވާހަކަފުޅުގައި މި މުބާރާތް ބޭއްވުމުގެ މަޤްޞަދު ވަރަށް ތަފްޞީލީ ގޮތެއްގައި ވިދާޅުވެދެއްވާފައި ވެއެވެ. އަދި ކުރިއަށް އޮތް ތަނުގައި މުބާރާތަށް ޓީމުތަކުންނާއި، މުބާރާތް އިންތިޒާމުކުރާ ފަރާތުން ވެސް ގެންނަން ޖެހޭ ބަދަލުތައް ހުރިކަން މި މުބާރާތުން ފާހަގަކުރެވިގެން ދިޔަ ކަމަށް ވިދާޅުވިއެވެ. އަދި މުބާރާތް ކާމިޔާބު މުބާރާތެއްގެ ގޮތުގައި ހައްދަވައި ދެއްވުމަށް ކެލާ ކައުންސިލާއި، ކެލާ ރައްޔިތުން ކޮށްދެއްވި މަސައްކަތްތަކަށް ޝުކުރު އަދާކުރެއްވިއެވެ.
