ތިލައުތުރު ފުޓްސެލް މުބާރާތް 2024ގެ އިއްޔެގެ މެޗްތައް ބާރަށާއި، ފިއްލަދޫ އަދި އިހަވަންދޫއިން ކާމިޔާބުކުރި އިރު ތުރާކުނާއި، ކެލާއަށް ހަމަހަމަ ނިމުމެއް
ތިލައުތުރު ފުޓްސެލް މުބާރާތް 2024ގެ އިއްޔެގެ މެޗްތައް ބާރަށާއި، ފިއްލަދޫ އަދި އިހަވަންދޫއިން ކާމިޔާބުކުރި އިރު ތުރާކުނާއި، ކެލާ ބައްދަލުކުރި މެޗް އެއްވެސް ކޮޅަކަށް ލަނޑެއް ނުޖެހި ވަނީ ނިމިފައެެވެ. ކެލާ ފުޓްސެލް ދަނޑުގައި ހިނގަމުންދާ މި މުބާރާތުގައި އިއްޔެ ހަވީރާއި ރޭގަނޑާއެކު ޖުމްލަ 4 މެޗެއް އިއްޔެ ވަނީ ކުޅެފައެވެ.
އިއްޔެ ހަވީރު 4.00ގައި ކުޅެވުނު ވަށަފަރާއި، ބާރަށް ބައްދަލުކުރި މެޗު 3 ލަނޑު 2 ލަނޑުން ކާމިޔާބުކުރީ ބާރަށު ޓީމެވެ. މި މެޗުގައި ބާރަށުން ޖެހި 3 ލަނޑު ޖަހައި ދިނީ ޢަބްދުﷲ މިޞްބާޙާއި، އަޙްމަދު ޝަޒީމެވެ. ޝަޒީމް ވަނީ 2 ލަނޑު ޖަހައި ދީފައެވެ. ވަށަފަށުން ޖެހި 2 ލަނޑު ޖަހައިދިނީ ސާޖިދު ރަޝީދާއި، ޢަބްދުﷲ ސިނާނެވެ. މި މެޗްގެ މޮޅު ކުޅުންތެރިއަކަށް ހޮވުނީ ބާރަށު ޓީމުގެ ޖަރޒީ ނަންބަރ 17 އަޙްމަދު ޝަޒީމެވެ. ވަށަފަރަކީ 2023 ވަނަ އަހަރު މި މުބާރާތް ކާމިޔާބު ކުރި ރަށެވެ.
އިއްޔެ ހަވީރު 5.00ގައި ކުޅެވުނު މެޗްގައި ބައްދަލުކުރީ ތުރާކުނާއި ކެލާއެވެ. މި މެޗް ނިމުނީ އެއްވެސް ކޮޅަކަށް ލަނޑެއް ނުޖެހި ދެ ޓީމު އެއްވަރުވެގެންނެވެ. މި މެޗްގެ މޮޅު ކުޅުންތެރިއަކަށް ހޮވުނީ ކެލާ ޓީމުގެ ޖަރޒީ ނަންބަރ 20، ގޯލްކީޕަރ ޢަބްދުﷲ ޒިމާމެވެ.
ރޭ 8.00ގައި ކުޅެވުނު މެޗްގައި ބައްދަލުކުރީ މުރައިދޫއާއި، ފިއްލަދޫއެވެ. 3 ލަނޑު 1 ލަނޑުން މި މެޗު ކާމިޔާބުކުރީ ފިއްލަދޫއެވެ. ފިއްލަދޫ ޓީމުން ޖެހި 3 ލަނޑު ޖެހީ ޢަބްދުﷲ އިޚްވާނާއި، މުޙައްމަދު ހުޝާމާއި އަދި އާދަމް ޢަބުދުއްރަޙީމެވެ. މުރައިދޫ ޓީމުން ލަނޑުޖެހީ އިޔާން އަޙްމަދު ރަޝީދެވެ. މި މެޗްގެ މޮޅު ކުޅުންތެރިއަކަށް ހޮވުނީ ފިއްލަދޫ ޓީމުގެ ޖަރޒީ ނަންބަރ 10 މުޙައްމަދު ހުޝާމެވެ.
ރޭ 9.00ގައި ކުޅެވުނު މެޗްގައި ބައްދަލުކުރީ އުތީމާއި، އިހަވަންދޫއެވެ. މި މެޗް 3 ލަނޑު 1 ލަނޑުން ކާމިޔާބުކުރީ އިހަވަންދޫ ޓީމެވެ. މި މެޗުގައި އިހަންދޫއިން ލަނޑު ޖެހީ މުޙައްމަދު މަދީޙާއި، އިބްރާހީމް ޙާމިދާއި އަދި މުޙައްމަދު ސާނިއެވެ. އުތީމުން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ މުޙައްމަދު މަޒީނެވެ. މި މެޗްގެ މޮޅު ކުޅުންތެރިއަކަށް ހޮވުނީ އިހަވަންދޫ ޓީމުގެ ޖަރޒީ ނަންބަރ 7 މުޙައްމަދު މަދީޙެވެ.
މިއަދުވެސް މި މުބާރާތުގެ 4 މެޗެއް ކުޅެވޭނެއެވެ. އެއީ ހަވީރު 2 މެޗާއި، ރޭގަނޑު 2 މެޗެވެ. ހަވީރު 4.00ގައި ކުޅޭ މެޗުގައި ބައްދަލުކުރާނީ ކެލާއާއި، އުތީމެވެ. ހަވީރު 5.00ގައި ކުޅޭ މެޗުގައި ބައްދަލުކުރާނީ ބާރަށާއި، މުރައިދޫއެވެ. ރޭގަނޑު 8.00ގައި ކުޅޭ މެޗުގައި ބައްދަލުކުރާނީ އުލިގަމާއި، ތުރާކުނެވެ. މިރޭގެ އެންމެ ފަހު މެޗު ކަމުގައިވާ 9.00ގައި ކުޅޭ މެޗުގައި ބައްދަލުކުރާނީ ދިއްދޫއާއި، ވަށަފަރެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ބާއްވާ މި މުބާރާތުގެ ސަބަބުން މުޅި އަތޮޅަށް މި ވަނީ ކުޅިވަރުގެ ޢީދެއް އައިސްފައެވެ. ޚާއްޞަކޮށް މުބާރާތް ބާއްވާ ރަށް ކަމުގައިވާ ކެލާއަށެވެ.
