އިއްޔެ ހަވީރު 4.30 ގައި ކެލާގައި ކުޅެންފެށި “ތިލައުތުރު ފުޓްސެލް މުބާރާތް 2024” ގެ ފުރަތަމަ މެޗް ކަމުގައިވާ ޗެރިޓީ ޝީލްޑް މެޗް ކެލާ ޓީމް ކާމިޔާބުކޮށްފިއެވެ. މުބާރާތުގެ އެންމެ ފަހުގެ ޗެމްޕިއަން ޓީމް ކަމުގައިވާ ވަށަފަރާ، މި އަހަރު މުބާރާތް ބާއްވާ ރަށް ކަމުގައި ކެލާ ބައްދަލު ކުރި މެޗް 3 ލަނޑު 1 ލަނޑުން ކާމިޔާބުކޮށް ތިލައުތުރު ފުޓްސެލް މުބާރާތުގެ، ފުރަތަމަ ޗެރިޓީ ޝީލްޑް ކާމިޔާބުކުރީ ކެލާއެވެ.
ކުޅިވަރާއި ހަށިހެޔޮކަމާ ބެހޭ ވުޒާރާގެ ޑެޕިޔުޓީ މިނިސްޓަރ މުޙައްމަދު ފަޔާޒު ޝަރަފުވެރިކޮށްދެއްވި މި މެޗްގެ 5 ވަނަ މިނެޓްގައި ލަނޑުޖަހައި ކުރި ހޯދީ ވަށަފަށު ޓީމެވެ. މި ލަނޑު ވަށަފަރަށް ކާމިޔާބުކޮށްދިނީ އެ ޓީމުގެ ޖާރޒީ ނަންބަރ 12 ޔަޒްދާނެވެ. ވަށަފަރުން ލަނޑުޖެހިތާ ކުޑަ ހިނދުކޮޅެއް ތެރޭ ކެލާއިން ލަނޑެއްޖައި ނަތީޖާ ހަމަހަމަ ކުރިއެވެ. މި ލަނޑު ކެލާ ޓީމަށް ޖަހައިދިނީ އެ ޓީމުގެ ޖަރޒީ ނަންބަރ 31 އާސިފެވެ. މި މެޗް ކެލާ ޓީމުން ކާމިޔާބުކުރީ އިތުރު 2 ލަނޑު ޖަހައި ކުރި ހޯދައިގެންނެވެ. އެ ޓީމަށް މި ދެ ލަނޑު ވެސް ޖަހައިދިނީ އެ ޓީމުގެ ޖަރޒީ ނަންބަރ 11 އަޙްމަދު ވަޙީދެވެ.
ކުލަގަދަ ރަސްމިއްޔާތަކަށް ފަހު އިއްޔެ ފެށި “ތިލަ އުތުރު ފުޓްސަލް މުބާރާތް 2024” އަކީ ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ހއ. އަތޮޅުގެ ރަށްތަކަށް ހުޅުވާލައިގެން ކޮންމެ އަހަރަކު ސިލްސިލާކޮށް ބާއްވަމުން އަންނަ މުބާރާތެކެވެ. މި އަހަރުގެ ތިލައުތުރު ފުޓްސަލް މުބާރާތުގައި އަތޮޅުގެ 10 ރަށަކުން ވާދަކުރެއެވެ. އެއީ ތުރާކުނު، އުލިގަން، އިހަވަންދޫ، ދިއްދޫ، ވަށަފަށް، ފިއްލަދޫ، ބާރަށް، އުތީމު، މުރައިދޫ އަދި ކެލާއެވެ.
ދެ ގުރޫޕަކަށް ބަހައިލައިގެން ކުޅޭ މި ފުޓްސަލް މުބާރާތުގެ ގުރޫޕް A ގައި ހިމެނެނީ ވަށަފަށް، މުރައިދޫ، ދިއްދޫ، ބާރަށް އަދި ފިއްލަދޫއެވެ. ގުރޫޕް B ގައި ހިމެނެނީ ތުރާކުނު، އުތީމު، އުލިގަން، ކެލާ އަދި އިހަވަންދޫއެވެ. ދިވެހިރާއްޖޭގެ އުފާވެރި އަދި ފަޚުރުވެރި، ނަޞްރުގެ ދުވަހު ފެށި މި މުބާރާތުގައި މިއަދު 4 މެޗު ކުޅެވޭނެއެވެ. އެއީ ހަވީރު 4.00 ގައި ކުޅެވޭ ވަށަފަށާއި، ބާރަށް ބައްދަލުކުރާ މެޗާއި، 5.00 ގައި ކުޅެވޭ ތުރާކުނާއި، ކެލާ ބައްދަލުކުރާ މެޗާއި، ރޭގަނޑު 8.00 ގައި ކުޅެވޭ މުރައިދޫއާއި، ފިއްލަދޫ ބައްދަލުކުރާ މެޗާއި، ރޭގަނޑު 9.00 ގައި ކުޅެވޭ އުތީމާއި، އިހަވަންދޫ ބައްދަލުކުރާ މެޗެވެ.
ބަލައި ހިތްވާ ކަހަލަ ފޯރިގަދަ ކުޅުމެއް ފެނިގެން ދިޔަ ޗެރިޓީ ޝީލްޑް މެޗްގެ މޭން އޮފް ދަ މެޗަށް ހޮވުނީ ކެލާ ޓީމަށް 2 ލަނޑު ޖަހައިދިން އެ ޓީމުގެ ޖަރޒީ ނަންބަރ 11 އަޙްމަދު ވަޙީދެވެ. އިއްޔެ ފެށި މި މުބާރާތް ފެށުމުގެ ރަސްމިއްޔާތުގައި އަތޮޅު ކައުންސިލްގެ ރައީސް މޫސާ ޝަފީޤާއި، އަތޮޅު ކައުންސިލާއި، ކެލާ ކައުންސިލްގެ މެންބަރުން ބައިވެރިވެލެއްވިއެވެ.
