ކެލާ ޝައިޚް އިބްރާހީމް ސުކޫލުގެ ހައުސްތަކުގެ މެދުގައި ބޭއްވި ސީނިއަރ ހޭންޑް ބޯލް މުބާރާތުގެ ޗެމްޕިއަންކަން ފީރޯޒު ހައުސް ހޯދައިފިއެވެ. އިއްޔެ ހަވީރު ކުޅެވުނު ފައިނަލް މެޗްގައި ފީރޯޒު ހައުސް ޗެމްޕިއަންކަން ހޯދީ ޔާގޫތު ހައުސްއާ ވާދަކޮށް 8 ލަނޑު 1 ލަނޑުން މެޗް ކާމިޔާބުކޮށްގެންނެވެ. ފައިނަލް މެޗްގެ އެންމެ މޮޅު ކުޅުންތެރިއަކަށް ހޮވުނީ ޗެމްޕިއަންކަން ހޯދި ފީރޯޒު ހައުސްގެ ޙައްވާ އިސްރާއެވެ.
ފައިނަލް މެޗް ޝަރަފުވެރިކޮށްދެއްވައި ޗެމްޕިއަން ޓީމަށް ތަށްޓާއި މެޑަލް ޙަވާލުކޮށްދެއްވީ ކެލާ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ރައީސާ އަލްފާޟިލާ ޙައްވާ ފަޒްނާއެވެ. އަދި ރަނައަޕް ޓީމަށް މެޑަލް ޙަވާލުކޮށްދެއްވީ ވެސް ރައީސާ ޙައްވާ ފަޒްނާއެވެ.
ނިމި ދިޔަ ސީނިއަރ ހޭންޑް ބޯލް މުބާރާތުގެ ވަނަތައް ޙާޞިލްކުރި ދަރިވަރުން
މުބާރާތުގެ އެންމެ މޮޅު 7 ކުޅުންތެރިން
- މަރިޔަމް މިޝްކާ ޝާހް އަލިމަސް ހައުސް
- ޙައްވާ އިސްރާ ފީރޯޒު ހައުސް
- ފާޠިމަތު ޒީޝާ ޒިޔާދު އަލިމަސް ހައުސް
- ޢާއިޝަތު ރާޔާ އިބްރާހީމް އަލިމަސް ހައުސް
- ޝާމިޝް ޙަފީޒް އަލިމަސް ހައުސް
- އާމިނަތު ޒާޔާ މުޙައްމަދު އަލިމަސް ހައުސް
- މަރިޔަމް އައިކާ ފީރޯޒު ހައުސް
މުބާރާތުގައި އެންމެ ގިނަ ގޯލުޖެހި ކުޅުންތެރިޔާ: ޙައްވާ އިސްރާ ފީރޯޒް ހައުސް
މުބާރާތުގެ އެންމެ މޮޅު ކުޅުންތެރިޔާ: ޙައްވާ އިސްރާ ފީރޯޒް ހައުސް
ރަނައަޕް ހައުސް: ޔާގޫތު ހައުސް
ޗެމްޕިއަން ހައުސް: ފީރޯޒު ހައުސް
“ތިލަ އުތުރު” އަށް މަޢުލުމާތު ލިބިފައިވާ ގޮތުގައި، ސުކޫލުގެ ކުޅޭ ބިމުގައި ކުރިޔަށް ދިޔަ ސީނިއަރ ހޭންޑް ބޯލް މުބާރާތުގެ ފައިނަލް މެޗްގެ ކުޅިބެލުމަށް ޓަކައި ގިނަ ޢަދަދެއްގެ ބެލެނިވެރިންނާއި، ދަރިވަރުން ސުކޫލުގެ ކުޅޭ ބިމަށް ޙާޒިރުވިއެވެ. ކުޅިވަރުގެ ރޫޙް ދިރުވާ އާލާކޮށް، ވާދަވެރި މާޙައުލެއްގައި ކުޅިވަރު ކުޅުމުގެ ފުރުޞަތު ފަހިކޮށްދެއްވުމުގެ މަޤްޞަދުގައި ޝައިޚް އިބްރާހީމް ސުކޫލުން ބޭއްވި މި މުބާރާތް އޮތީ ހުސްވި އޯގަސްޓް މަހުގެ 25 އިން 1 ސެޕްޓެންބަރގެ ނިއަލަށެވެ.
