މިހާރު ކުރިއަށްދާ ގޯލްޑަން ފުޓްސަލް ޓޯނަމަންޓްގެ ޒޯން 1ގެ ފައިނަލް މެޗު މިރޭ 8.00ގައި އޮންނާނެއެވެ.
ޒޯން 1ގެ ފައިނަލުގައި ވާދަކުރަނީ ހއ. ގެ ޗެމްޕިއަން މާރަންދޫއާއި، ހދ. ގެ ޗެމްޕިއަން ނާވައިދޫއެވެ.
ޒޯނުގައި މި ދެ ޓީމު ބައްދަލުކުރި މެޗު 3-1 އިން ފަސޭހަކަމާއެކު، ކާމިޔާބުކޮށްފައި ވަނީ ނާވައިދޫއެވެ. އެހެންނަމަވެސް ފައިނަލަކީ މުޅިން ތަފާތު މެޗެކެވެ. ލޭގެ ވިންދަށް އިތުރު ހޫނުކަމެއް ގެނުވާ މެޗެކެވެ. ޖޯޝާ ފޯރިން ދަނޑު ކައްކާލާ މެޗެކެވެ.
ފައިނަލުން ނާވައިދޫ ޖާގަ ހޯދީ 1 ވަނަ ޓީމުގެ ގޮތުގައެވެ. މާރަންދޫއަށް ޖާގަ ލިބުނީ 2 ވަނަ ޓީމުގެ ގޮތުގައެވެ.
މި ފޯރި ގަދަ ފައިނަލް މެޗު ސާބަހުން ގުގުމާލަ ދިނުމަށް މިރޭ ހުޅުމާލޭ ފުޓްސަލް ދަނޑަށް މާރަންދޫއާއި، ނާވައިދޫގެ ސަޕޯޓަރުން ދިޔުމަކީ ކުޅުންތެރިންނާއި، އޮފިޝަލުންގެ ވަރަށް މަތިވެރި އެދުމެކެވެ. ތިލައުތުރު ނޫހުން ދެ ޓީމަށް ވެސް ކާމިޔާބަށް އެދެމެވެ.
