މިހާރު ކުރިއަށްދާ ގޯލްޑަން ފުޓްސަލް މުބާރާތުގައި ޒޯން 1ގައި މިއަދު ހަވީރު ކުޅުނު މެޗު މާރަންދޫ، ކެލާގެ މައްޗަށް ކުރި ހޯދިއިރު ނާވައިދޫއާއި، ނޮޅިވަރަންފަރު މެޗު ނިމުނީ 1-1އިން ދެ ޓީމު އެއްވަރުވެގެންނެވެ.
މާރަންދޫ، ކެލާގެ މައްޗަށް ކުރިހޯދީ 1-0 އިން މެޗު ކާމިޔާބުކޮށެވެ. މި މެޗުގައި ޖެހި ހަމައެކަނި ގޯލު މަރަންދޫ ޓީމަށް ކާމިޔާބުކޮށްދިނީ އެ ޓީމުގެ ސަމްހާން ޢަބްދުއްރަޙްމާނެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެސް ސަމްހާނެވެ.
ހދ. ނާވައިދޫއާއި، ނޮޅިވަރަންފަރު ބައްދަލުކުރި މެޗުގައި ނާވައިދުއަށް ލަނޑުޖަހައިދިނީ އަޙްމަދު ސިޒާނެވެ. ނޮޅިވަރަންފަރަށް ލަނޑުޖަހައިދިނީ އަކްރަމް ޢަބްދުއްރަޝީދެވެ. މި މެޗުގެ މޮޅު ކުޅުންތެރިއަކަށް ހޮވުނީ ނާވައިދޫ ޓީމުގެ ޖަރޒީ ނަންބަރު 22 ޔޫސުފް ޝާއިފެވެ.
ޒޯން1ގެ ޕޮއިންޓް ޓޭބަލަށް ބަލާއިރު 4 ޕޮއިންޓާއެކު މި ވަގުތު ކުރީގާ އޮތީ ނާވައިދޫއާއި، މާރަންދޫއެވެ. ނާވައިދޫއިން ޖަހާފައިވަނީ ޖުމްލަ 4 ލަނޑެވެ. ބައިކޮޅަށް ވަނީ 3 ލަނޑު ވަދެފައެވެ. މާރަންދޫއަށް ބަލައިއިރު މިހާތަނަށް މާރަންދޫން ޖެހީ 2 ލަނޑެވެ. ބައިކޮޅަށް ވަދެފައިވަނީ 1 ގޯލެވެ. ޕޮއިންޓާއި، ފައިދާ ގޯލަށް ބަލައިއިރު މާރަންދޫއާއި، ނާވައިދޫ ވެސް މި ވަގުތު އޮތީ އެއްވަރުވެފައެވެ. ކުޅުނު 2 މެޗު ޑްރޯކޮށް 2 ޕޮއިންޓާއެކު ތާވަލުގެ 2 ވަނާގާ އޮތީ ނޮޅިވަރަންފަރެވެ. ކެލައަށް އަދިވެސް އޮތީ ޕޮއިންޓެއް ނުލިބިއެވެ.
މި ގުރޫޕުގެ ކުޅުން ދެން އޮންނާނީ ޖަނަވަރީ 31 ވަނަ ދުވަހުގެ ރޭ 22.00ގައެވެ. އެއް މެޗުގާ ބައްދަލުކުރާނީ ނާވައިދޫއާއި، މާރަންދޫއެވެ. އަނެއް މެޗުގައި ބައްދަލުކުރާނީ ނޮޅިވަރަންފަރާއި، ކެލައެވެ.
