މިހާރު ކުރިއަށްދާ ގޯލްޑަން ފުޓްސަލް މުބާރާތުގެ ޒޯނުގެ ފުރަތަމަ މެޗުން ކެލާ ބަލިވިއަސް، ކުޅުންތެރިން ދެއްކި ކުޅުމާ މެދު ސަޕޯޓަރުން ހިތްހަމަޖެހޭކަން ހާމަވެއްޖެއެވެ.
ރޭގެ މެޗާ ބެހޭ ގޮތުން ތިލަ އުތުރު ނޫހުން ކުރި އިންޓަރވިޔުގައި ކެލާގެ ގިނަ ސަޕޯޓަރުން ބުނުއްވީ ނާވައިދޫ ފަދަ ވަރުގަދަ ޓީމަކާއެކު ކުޅެ 3-2 އިން ބަލިވިއަަަސް ޓީމުން ދެއްކި ކުޅުމާ މެދު އެ ބޭފުޅުން ވަރަށް ބޮޑަށް ހިތްހަމަޖެހިލައްވާ ކަމަށެވެ.
ޒޯން 1ގައި ރޭ ކުޅުނު އެއް މެޗުގައި ބައްދަލުކުރީ ނާވައިދޫއާއި، ކެލައެވެ. މި މެޗު 3-2އިން ކާމިޔާބުކުރީ ނާވައިދޫއެވެ. މި މެޗުގައި ނާވައިދޫން ލަނޑުޖެހީ މުޙައްމަދު އަސްލަމް 2 ލަނޑު، އަދި ޔާމިން މުޙައްމަދު 1 ލަނޑެވެ. ކެލާ ޓީމުން ލަނޑުޖެހީ އަޙްމަދު ވަޙީދު 1 ލަނޑު، އަދި ޤާސިމް އަޠޫފް 1 ލަނޑެވެ. މި މެޗުގެ މޮޅު ކުޅުންތެރިއަކަށް ހޮވުނީ ނާވައިދޫ ޓީމަށް ދެ ލަނޑު ކާމިޔާބުކޮށްދިން، އެ ޓީމުގެ ޖަރޒީ ނަންބަރު 71 މުޙައްމަދު އަސްލަމެވެ.
ރޭ ކުޅުނު ޒޯން 1 ގެ އަނެއް މެޗުގައި ބައްދަލުކުރީ މާރަންދޫއާއި، ނޮޅިވަރަންފަރެވެ. މި މެޗު ނިމުނީ 1-1އިން ދެ ޓީމު އެއްވަރު ވެގެންނެވެ. މި މެޗުގައި މާރަންދޫއިން ލަނޑުޖެހީ ޝަނީމް މޫސާއެވެ. ނޮޅިވަރަންފަރުން ލަނޑުޖެހީ މުޙައްމަދު ސަމީޙް ޙަސަން ފަޔާޒެވެ. މި މެޗުގެ މޮޅު ކުޅުންތެރިއަކަށް ހޮވުނީ މާރަންދޫ ޓީމުގެ ޖަރޒީ ނަންބަރު 16 ޙުމައިދު ޙުސައިނެވެ.
ތާވަލަށް ބަލައި އިރު މި ގުރޫޕުގެ މެޗުތައް ދެން ކުޅެވޭނީ މި މަހުގެ 29 ވާ ބުރާސްފަތި ދުވަހު ހަވީރު 4.00ގައެވެ. އެއް މެޗުގައި ބައްދަލުކުރާނީ ނާވައިދޫއާއި، ނޮޅިވަރަންފަރެވެ. އަނެއް މެޗުގައި ބައްދަލުކުރާނީ މާރަންދޫއާއި، ކެލައެވެ.
ޒޯން 1 ގެ ޓޭބަލަށް ބަލައި އިރު 3 ޕޮއިންޓާއެކު މި ވަގުތު 1 ވަނާގައި އޮތީ ނާވައިދޫއެވެ. 1 ޕޮއިންޓް ލިބިގެން 2 ވަނާގައި އޮތީ މާރަންދޫއާއި، ނޮޅިވަރަންފަރެވެ. ކެލައަކަށް އަދި ޕޮއިންޓެއް ނުލިބެއެވެ.
