މިހާރު ހިނގަމުންދާ ގޯލްޑަން ފުޓްސަލް ޓޯނަމަންޓުގައި ޕެނަލްޓީން ކެލާ ބަލިކޮށް ހއ. އަތޮޅު ޗެމްޕިއަންކަން މާރަންދޫ ހޯދައިފިއެވެ.
މިއަދު ހަވީރު 4.00ގައި ހުޅުމާލޭ ރެހެންދި ފުޓްސަލް ދަނޑުގައި މާރަންދޫއާއި، ކެލާ ކުޅުނު ހއ. އަތޮޅު ފައިނަލް މެޗުގެ، ފުރިހަމަ ވަގުތު ނިމުނީ 1-1އިން ދެ ޓީމު އެއްވަރުވެގެންނެވެ. އެހެންކަމުން ޗެމްޕިއަންޓީމު ކަނޑައެޅީ ޕެނަލްޓީ ޖަހައިގެންނެވެ. ހއ. އަތޮޅު ޗެމްޕިއަންކަން މާރަންދޫ ހޯދީ 4-1އިން ކެލާގެ މައްޗަށް ކުރި ހޯދައިގެންނެވެ.
ފައިނަލް މެޗުގައި މާރަންދޫ ތީމުން ލަނޑުޖެހީ ލޫޠު ޙުސައިން 1 ލަނޑު، މުޙައްމަދު ޙަމްދާން އަޙްމަދު 1 ލަނޑު، ޙަސަން އަސްލަމް 1 ލަނޑު އަދި އަޙްމަދު މުޙައްމަދު 1 ލަނޑެވެ. ލޫޠު ފިޔަވާ މާރަންދޫ ޓީމުގެ އަނެއް 3 ކުޅުންތެރިން ލަނޑުޖެހީ ނަތީޖަ ނެރުމަށް ޖެހި ޕެނަލްޓިގައެވެ. ކެލާ ޓީމުން މި މެޗުގައި ޖެހި ހަމައެކަނި ލަނޑު ކަމިޔަބުކޮށްދިނީ އިބްރާހީމް ރިޝާލެވެ. މި މެޗުގައި ޖެހި އެއްވެސް ޕެނަލްޓީއެއް ކެލާ ޓިމަށް ވަނީ ކާމިޔާބު ނުކުރެވިއެވެ. ފައިނަލް މެޗުގެ މޮޅު ކުޅުންތެރިއަކަށް ހޮވުނީ މާރަންދޫ ޓީމުގެ ގޯލްކީޕަރު ޖަރޒީ ނަންބަރު 18 ނައުފަލް މޫސާއެވެ. ކެލާ ޓީމުން ޖެހި ޕެނަލްޓީތައް ނާކާމިޔާބުވީ ނައުފަލުގެ ހުސިޔާރުކަމުންކަން ފާހަގަކޮށްލަން ޖެހެއެވެ.
ހއ. އަތޮޅުން އެންމެ ގިނަ ލަނޑުޖެހި ކުޅުންތެރިއަކަށް ހޮވުނީ ކެލާ ޓީމުގެ ޖަރޒީ ނަންބަރު 30 އިބްރާހީމް ރިޝާލެވެ. މުބާރާތުގެ ހއ.ގެ އެންމެ މޮޅު ކުޅުންތެރިއަކަށް ހޮވުނީ މާރަންދޫ ޓީމުގެ ޖަރޒީ ނަންބަރު 13 ޙަމްދޫން އަޙްމަދު ލަޠީފެވެ.
ހއ. ގެ ޗެމްޕިއަން މާރަންދޫ ޓީމަށް، ތިލައުތުރު ނޫހުގެ ފަރާތުން ހޫނު މަރުޙަބާ ކިޔަމެވެ. ދެއްކި މޮޅު ކުޅުމަށް ސާބަސް ދެމެވެ. އަދިހަމައެހެންމެ ބަލިވިޔަސް މޮޅު ކުޅުމެއް ދައްކާ ރަނައަޕްކަން ހޯދި ކެލާ ފުޓްސަލް ޓީމަށް ތަހުނިޔާ ކިޔަމެވެ.
ޙަޤީޤަތުގައި ވެސް ގޯލްޑަން ފުޓްސަލްގައި މާރަންދޫއާއި، ކެލާ ހއ.ގެ ތާރީޚު ބަދަލުކޮށްފި ކަމުގެ ހިތްހަމަޖެހުން މި ދެ ރަށުގެ ރައްޔިތުންނަށް މި ފަހަރު ލިބިއްޖެއެވެ. މި މުބާރާތުގެ ޒޯނު މެޗުތަކުގައި ވެސް ތިޔަ ދެ ރަށަށް ކާމިޔާބަށް އެދެމެވެ.
