އޭ ގުރޫޕުގެ ސެމީގެ ދެ ވަނަ ޖާގަ ކެލައަށް، ބީ ގުރޫޕުގެ ފުރަތަމަ ޖާގަ މުރައިދޫއަށް، މާރަންދޫއަށް ވެސް އުންމީދު އާވެއްޖެ
މިހާރު ކުރިއަށް ގޯލްޑަން ފުޓްސަލް ޓޯނަމަންޓްގައި ރޭގެ މެޗުތަކުން ހއ.ގެ އޭ ގުރޫޕުގެ ސެމީގެ ދެ ވަނަ ޖާގަ ކެލައަށް ލިބި، މާރަންދޫ ވެސް ސެމީއަށް ކުރާ އުންމީދު އިތުރަށް އާވެއްޖެއެވެ.
7 ޕޮއިންޓާއެކު ގުރޫޕު އޭގެ ސެމީގެ ދެ ވަނަ ޖާގަ ކެލައަށް ލިބުނީ ރޭ ބާރަށާއެކު ކުޅުނު މެޗު، 2-1އިން ކެލާ ކާމިޔާބުކޮށްގެންނެވެ. ފޯރިގަދަ ކުޅުމެއް ފެނިގެން ދިޔަ މި މެޗުގައި ކެލައަށް ލަނޑުޖަހައިދިނީ އަޙްމަދު ޝަފަޤްއާއި، އަޙްމަދު ވަޙީދެވެ. ބާރަށުން ލަނޑުޖެހީ މުޙައްމަދު މާއިޒް ޔޫސުފެވެ. ގިނަ ރީނދޫ ކާޑުތަކެއް ފެނިގެން ދިޔަ މި މެޗުގެ މޮޅު ކުޅުންތެރިއަކަށް ހޮވުނީ ކެލާ ޓީމުގެ ގޯލްކީޕަރު ޢަބްދުﷲ ޒިމާމެވެ.
މި މެޗުން ބަލިވި ބާރަށަށް މިހާތަނަށް ލިބިފައި ވަނީ 3 ޕޮއިންޓެވެ. މި ޓީމަށް ކުރިއަށް އަދި އެއް މެޗު އެބަ އޮތެވެ. މި މެޗުގައި ބާރަށް ބައްދަލުކުރާނީ ތުރާކުނާއެވެ. އެ މެޗު ކުޅުމަށް ހަމަޖެހިފައި ވަނީ މި މަހުގެ 16 ވަނަ ދުވަހު ހަވީރު 4.00ގައެވެ.
ހއ. ގެ ގުރޫޕު ބީގަ ރޭ ކުޅުނު ދެ ވަނަ މެޗު މުރައިދޫއިން ކާމިޔާބުކުރީ 3-1އިންނެވެ. އުތީމާއި، މުރައިދޫ ބައްދަލުކުރި މި މެޗު މުރައިދޫއިން ކާމިޔާބުކުރުމުން 9 ޕޮއިންޓާއެކު ބީ ގުރޫޕުން ސެމީގެ ފުރަތަމަ ޖާގަ ކަށަވަރުކުރި ޓީމަކަށް މުރައިދޫ ހޮވުނީއެވެ. ކުރިއަށް އެއް މެޗު އަދި މުރައިދޫއަށް އެބަ އޮތެވެ. މުރައިދޫއާއި، އުތީމު ބައްދަލުކުރި މެޗުގައި މުރައިދޫއިން ލަނޑުޖެހީ އައިރޫން އަޙްމަދު ރަޝީދު 1 ލަނޑު، އަޙްމަދު ނައުފަލް 1 ލަނޑު އަދި އުފާލް ޢަބްދުﷲ 1 ލަނޑެވެ. އުތީމުން ޖެހި ހަމައެކަނި ލަނޑު އެ ޓީމަށް ޖަހައިދިނީ ރިޝްވާން އިބްރާހީމް ރަޝީދު މޫސާއެވެ. މި މެޗުގެ މޮޅު ކުޅުންތެރިއަކަށް ހޮވުނީ މުރައިދޫ ޓީމުގެ ޖަޒީ ނަންބަރު 7 އައިރޫން އަޙްމަދު ރަޝީދެވެ.
ގުރޫޕު އޭގަ ރޭ ކުޅުނު ދެ ވަނަ މެޗު 3-2އިން ކާމިޔާބުކުރީ ތުރާކުނެވެ. ހޯރަފުށްޓާއި، ތުރާކުނު ބައްދަލުކުރި މި މެޗުގައި ތުރާކުނުން ލަނޑުޖެހީ އިސްމާޢީލް ޝަފީޢު 1 ލަނޑު، އަޙްމަދު ހުޝާމް 1 ލަނޑު އަދި މުޙައްމަދު ސަމާހް 1 ލަނޑެވެ. ހޯރަފުށިން 2 ލަނޑު ވެސް ޖެހީ ޢަބްދުﷲ ޔާމީނެވެ. މި މެޗުގެ މޮޅު ކުޅުންތެރިއަކަށް ހޮވުނީ ތުރާކުނު ޓީމުގެ ޖަރޒީ ނަންބަރު 8 އިސްމާޢީލް ޝަފީޢެވެ. މި ދެ ރަށަށް ވެސް ކުރިއަށް އަދި އެއް މެޗު އެބަ އޮތެވެ. މި މަހުގެ 16 ވަނަ ދުވަހު ހަވީރު 4.00ގައި ކުޅުމަށް ހަމަޖެހިފައިވާ މި މެޗުގައި ތުރާކުނު ބައްދަލުކުރާނީ ބާރަށާއެވެ. ހޯރަފުށި ބައްދަލުކުރާނީ ފިއްލަދޫއާއެވެ.
ބީ ގުރޫޕުން މާރަންދޫ ސެމީއަށް ކުރާ އުންމީދު އިތުރަށް އާވީ، ރޭ ދިއްދޫއާއެކު ކުޅުނު މެޗު އެއްވަރުވެ 4 ޕޮއިންޓް ލިބުމާ ގުޅިގެންނެވެ. މާރަންދޫއާއި، ދިއްދޫ ކުޅުނު މެޗު ނިމުނީ 2-2އިން ދެ ޓީމު އެއްވަރު ވެގެންނެވެ. މި މެޗުގައި މާރަންދޫއިން ޖެހި 2 ލަނޑު ވެސް ޖެހީ ޙަމްދޫން އަޙްމަދު ލަޠީފެވެ. ދިއްދޫ ޓީމުން 2 ލަނޑު ވެސް ޖެހީ އިބްރާހީމް ނަވާފް ސަޢީދެވެ. މި މެޗުގެ މޮޅު ކުޅުންތެރިއަކަށް ހޮވުނީ މާރަންދޫ ޓީމުގެ ޖަރޒީ ނަންބަރު 13 ޙަމްދޫން އަޙްމަދު ލަޠީފެވެ.
މި މަހުގެ 16 ވަނަ ދުވަހު ހަވީރު 5.00ގައި ކުޅެވޭ މެޗުގައި މުރައިދޫ ބައްދަލުކުރާނީ މި މުބާރަތުގެ އެންމެ ފަހުގެ ޗެމްޕިއަން ވަށަފަރާއެވެ. ވަށަފަރަށް ސެމީގެ ޖާގައެއް ލިބެން އޮތީ މި މެޗު ބަލި ނުވެ ނިންމާ ލެވިގެންނެވެ. މި މެޗުން ވަށަފަށް ބަލިވެއްޖެ ނަމަ މާރަންދޫއަށް ވެސް އެ ފުރުޞަތު ލިބުމުގެ ޗާންސް އެބަ އޮތެވެ. އެހެންނަމަވެސް މާރަންދޫއަށް އެ ފުރުޞަތު ލިބޭނީ އުތީމާއެކު ކުޅޭ މެޗުން މާރަންދޫ މޮޅުވެއްޖެ ނަމައެވެ.
