މިހާރު ކުރިއަށްދާ ގޯލްޑަން ފުޓްސަލް ޓޯނަމަންޓްގައި ހއ. ގެ ދެ ގުރޫޕުގަ ވެސް މިރޭ ކުޅޭ މެޗުތަކަކީ ވާދަވެރި މެޗުތަކަކަށް ވެއްޖެއެވެ.
އޭ ގުރޫޕަށް ބަލައި އިރު މިރޭ 10.00ގައި ކުޅޭ ބާރަށް، ކެލާ މެޗަކީ ސެމީގެ ޖާގައެއް ހޯދުމަށް ކެލައަށް ލިބޭ އެންމެ ފަހު ފުރުޞަތެވެ. މިރޭގެ މެޗުން މޮޅުވެގެން ނޫނީ މުބާރާތުގައި ކެލައަށް ކުރިއަށް ދެވޭނެ ގޮތެއް ނެތެވެ. ބާރަށަށް ވެސް މިރޭގެ މެޗުން ބަލިވެގެން ސެމީގެ ޖާގައެއް ލިބޭކަށް ނެތެވެ. އެހެންކަމުން ބާރަށަށް ވެސް މިރޭގެ މެޗުގެ މުހިންމުކަން ވަކިން ކުޑައެއް ނޫނެވެ.
މި ގުރޫޕުގެ އަނެއް މެޗުގައި ކުޅޭ ތުރާކުނަށް މެޗުގެ މުހިންމުކަން ކުޑަޔަސް ހޯރަފުށްޓަށް މިރޭގެ މެޗު ކާމިޔާބު ކޮށްގެން ސެމީގެ ޗާންސް އޮތުމުން ތުރާކުނާއި، ހޯރަފުށި ބައްދަލުކުރާ މެޗު ވެސް ވާދަވެރިކަމުގެ ފޯރި ކުޑަވެދާނެ ކަމަކަށް ނުބެލެވެއެވެ.
ހއ. ގެ ބީ ގުރޫޕަށް ބަލައިރު މިރޭ 11.00ގައި ކުޅޭ މާރަންދޫ، ދިއްދޫ މެޗަކީ ދިއްދޫއަށް މުހިންމު މެޗަކަށް ނުވިއަސް މާރަންދޫއަށް ވަރަށް މުހިންމު މެޗެކެވެ. ސަބަބަކީ މިރޭގެ މެޗުން މޮޅުވެގެން ސެމީއަށް މާރަންދޫކުރާ އުންމީދު އިތުރަށް އާވާނެތީއެވެ. މިރޭގެ މެޗުން މޮޅުވެގެން ދިއްދޫއަށް ކުރާނެ ފައިދާއެއް މި މުބާރާތުގައި ނެތެވެ.
މި ގުރޫޕުގަ މިރޭ 11.00ގައި ކުޅޭ އަނެއް މެޗުގައި ބައްދަލުކުރާ އުތީމަށް މެޗުގެ މުހިންމު ކަމެއް ނެތަސް މުރައިދޫއަށް މި މެޗަކީ މުހިންމު މެޗެކެވެ. ސަބަބަކީ މި މެޗު ކާމިޔާބުކޮށް މުރައިދޫއަށް ސެމީ ކަށަވަރުވުމާއެކު، ކުރިއަށް އޮތް މެޗު ޑްރޯކޮށްލައިގެން ގުރޫޕުގެ 1 ވަނަ ލިބުމުގެ ފުރުޞަތު ވެސް ބޮޑުކޮށް އޮތުމެވެ.
މިރޭ 10.00އިން 12.00އަށް ހުޅުމާލޭ ރެހެންދި ފުޓްސަލް ދަނޑު ހއ. އަތޮޅަށް ޚާއްޞަވެ އޮތް އޮތުން ފަޅުފިލުވައިދީ، މެޗުތަކުގެ ފޯރި ކުޅިވަރުގެ ރޫޙާ އެއް ގޮތަށް ނެގުމަށް ހއ. އަތޮޅުން ދުރުވެވެން ތިބި އެންމެ ތަކުން ދަނޑަށް ހާޒިރުވެދެއްވުމަކީ، ރަށްތައް ތަމްސީލުކުރާ ޓީމުތަކަށް ލިބޭނެ މަތިވެރި ހިތްވަރެކެވެ.
