ދަރީންނާ މެދު މައިންބަފައިން މަސްއޫލުވާންޖެހޭކަން މިއަދުގެ ހުކުރު ޚުޠުބާގައި އަހުރެމެންނަށް ހަނދާންކޮށްދެއްވައިފިއެވެ. ޚުޠުބާގައި ހާމަކުރައްވާފައިވާ ގޮތުގައި، ދަރިންނަކީ މާތްﷲ މައިންބަފައިންނާ ހަވާލުކުރައްވާފައިވާ އަމާނާތެކެވެ. އެ ދަރީންގެ ކަންތައްތަކާ މެދު އެ ފަރާތްތަކުން މަސްއޫލުވާންޖެހޭނެއެވެ.
މި އަހަރުގެ ދެ ވަނަ ހުކުރު ޚުޠުބާގައި މި ކަމަށް ގޮވާލައްވާފައި ވަނީ ”ކުޑަކުދީން މިސްކިތަށް އަހުލުވެރިކުރުވުން” މި މައުޟޫގެ ދަށުން، މިއަދު މިސްކިތްތަކުގައި އިއްވި ހުކުރު ޚުޠުބާގައެވެ. އެހެން ދުވަސްތަކެކޭ އެއް ގޮތަށް މިއަދުގެ ހުކުރު ޚުޠުބާ ވެސް ފައްޓަވާފައި ވަނީ މާތްﷲއަށް ރިވެތިވެގެންވާ ޙަމްދު ޘަނާ ދެންނެވުމާއެކު ރަސޫލާއަށް ޞަލަވާތާއި ސަލާމް ލެއްވުން އެދި ދުޢާކުރަމުންނެވެ. ހަމައެހެންމެ މާތްﷲ އަށް ތަޤުވާގެރިވުމަށާއި، މާތްﷲ ފިޔަވާ ޙައްޤުވެގެން އަޅުކަންކުރެވޭ އެހެންފަތާރެއް ނުވާކަމަށާއި، އެ ކަލާނގެއަށް ޝަރީކުނުކުރުމަށް ހުރިހާ މުސްލިމުންނަށް ހަނދާންކޮށްދެއްވާފައި ވެއެވެ.
ޚުޠުބާގައި ކުޑަކުދީން މިސްކިތަށް އަހުލުވެރިކުރުވުމަށް ޓަކައި އެންމެ ފުރަތަމަ ވެސް ކުރަންޖެހޭ ކަމަކީ އެ ކުދީންގެ މައިންބަފައިންނަކީ ދީނަށް ލޯބިކުރާ ބަޔަކަށްވުން ކަމަށް ހާމަކޮށްފައި ވެއެވެ. އަދި މައިންބަފައިން ނަމާދުކުރުމާއި، ދީނީ ކަންތައްތަކަށް ފުރިހަމައަށް އަހައްމިއްޔަތުކަން ދީގެން އެކަންތައްތައް ކުރުމަށް ގޮވައިލައްވާފައި ވެއެވެ. އެހެންނޫނީ އެ ކުދިންނަކީ ފަރުޟުނަމާދުތަކަށް ރައްކާތެރިވާ، ދީނީ ކަންތައްތަ ސަމާލުކަންދޭ ބަޔަކަށް ނުވާނެކަމަށް ވެސް ޚުޠުބާގައި ހާމަކޮށްދެްވާފައި ވެއެވެ. އަދި މި ގޮތަށް ދަރިން ތަރުބިއްޔަތު ކުރެވިއްޖެ ނަމަ މައިންބަފައިންނާއި، ދަރީންގެ ކުރިމަގު އުޖާލާވެ، އުފާވެރިކަން ޙާސިލްވާނެކަން ވެސް ހާމަކޮށްފައި ވެއެވެ. އަދިހަމައެހެންމެ އެ ގޮތަށް ތިމާގެ ދަރިންތަރުބިއްޔަތު ނުކުރެވިއްޖެ ނަމަ ތިމާގެ ދިރިއުޅުމުގެ އުފާވެރިކަން ގެއްލި އާޚިރަތުގައި ހިތާމަކުރަންޖެހޭނެކަން ކީރިތި ޤުރްއާނާއި، ރަސޫލާގެ ސުންނަތުގެ އަލީގައި ބަޔާންކޮށްދެއްވާފައި ވެއެވެ.
އިބްރާހީމް ޢަލައިހިއްސަލާމްގެ ދިރިއުޅުއްވުމުން މިސާލު ނަންގަވަމުން ބަޔާންކުރައްވާފައިވަނީ ”އަޅަމެންގެ ވެރިރަސްކަލާކޮ! ހަމަކަށަވަރުން، އަޅުގެ ދަރީން ކުރެ ބަޔަކު، ގަހެއް ރުކެއް ނެތް ވާދީއެއްގައި، ޙުރުމަތްތެރިކުރައްވާފައިވާ އިބަރަސްކަލާނގެ ގެފުޅުގެ އަރިހުގައި ވަޒަންވެރިކޮށްފީމެވެ. އަޅުގެ ވެރިރަސްކަލާކޮ! އެއުރެން ނަމާދުޤާއިމުކޮށް އުޅުމަށްޓަކައެވެ. ފަހެ، މީސްތަކުންކުރެ ބަޔެއްގެ ހިތްތައް އެއުރެންގެ ފަރާތަށް ލަންބަވާނދޭވެ! އަދި މޭވާތަކުން އެއުރެންނަށް ރިޒުޤުދެއްވާދޭވެ! (އެއީ) އެއުރެން ޝުކުރުވެރިވުމަށް ޓަކައެވެ.” (ސޫރަތު އިބްރާހީމް 37) އަދި މީގެ އިތުރުން ލުޤްމާނުގެފާނު އެ ކަލޭގެފާނުގެ ދަރިކަލުންނަށް ރިވެތި ގޮތުގައި ނަސޭހަތް ދެއްވި ފަދައިން އަހަރެމެން ވެސް އަހަރެމެންގެ ދަރިންނަށް އެ ފަދަ ރިވެތި އުސޫލުތައް ބޭނުންކޮށްގެން ނަސޭހަތްދިނުމުގެ މަގު އިޚްތިޔާރުކުރުމަށް ޚުޠުބާގައި އިރުޝާދު ދެއްވާފައިވެއެވެ.
ޚުޠުބާ ނިންމަވާލައްވާފައި ވަނީ މި ޤައުމަށާއި، ޤައުމުގެ ކަންކަމަށް ރަނގަޅު ގޮތްވުމަށް އެދި ދުޢާކުރަމުންނެވެ. ޤައުމުގެ ކަންކަން އިސްލާމްދީނާ އެއް ގޮތަށް ގެންދިއުމަށް މަސައްކަތްކުރައްވާ ވެރީންނަށް ހެޔޮ ގޮތްވުމަށް އެދެމުންނެވެ. ބަލިމީހުންނަށް ޝިފާދެއްވާ ފުރިހަމަ ޞިއްޙަތާއި، ޢާފިޔަތުގެ ނިޢުމަތް މިންވަރު ކުރެއްވުމަށް އެދެމުންނެވެ.
