65 އަަހަރަށް ފަހު، އިތުރު 10 އަހަރު ވަޒީފާގައި ދެމިހުރެވޭ ގޮތަށް ރައްޔިތުންގެ މަޖިލީހުން “ރީ-އެމްޕްލޯއިމަންޓްގެ ބިލު” އިއްޔެ ފާސްކޮށްފިއެވެ.
މިއީ ތަޖުރިބާ ލިބިލައްވާފައިވާ މީހުންގެ ބޭނުން ދައުލަތަށް މުހިންމުވާކަން ވަރަށް ރަނގަޅަށް ހާމަކޮށްދޭ ކަމެކެވެ. އަދި ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ދައްކަވާ ވާހަކަފުޅާ ޢަމަލު ސީދާވާކަން އަންގައިދޭ ހެތްކެއް ވެސް މެއެވެ.
މި ބިލު ރައްޔިތުންގެ މަޖިލީހުން އިއްޔެ ފާސްކުރީ 46 މެންބަރުންގެ ވޯޓުންނެވެ. ސަރުކާރުގެ ފަރާތުން މި ބިލު މަޖިލީހުގެ ތަޅުމަށް ހުށަހަޅައިދެއްވީ ގުރައިދޫ ދާއިރާގެ މެންބަރު ހަނާން މުޙައްމަދު ރަޝީދެވެ. “ރީ-އެމްޕްލޯއިމަންޓްގެ ބިލު”އަކީ ދައުލަތުގެ ވަޒީފާ އަދާކުރަމުންއަންނަ ފަރާތްތަކަށް އުމުރުން 75 އަހަރު ފުރުމާ ހަމައަށް މަސައްކަތްކުރުމުގެ މަގުފަހިކޮށްދީ، ރީ-އެމްޕްލޯއިމަންޓް އުޞޫލުން ވަޒީފާ އަދާކުރުމުގެ ފުރުޞަތު ދިނުމުގައި ބަލާނެ ހަމަތަކާއި އުޞޫލުތައް ކަނޑައެޅުމަށް ހުށަހެޅުއްވި ބިލެކެވެ.
ރީ-އެމްޕްލޯއިމަންޓް އުޞޫލުގެ ދަށުން ވަޒީފާ ދެވޭނީ ދައުލަތުގެ ވަޒީފާގައި މަސައްކަތް ކުރަމުންދާ 65 އަހަރާއި 75 އަހަރާ ދެމެދުގެ މީހުންގެ ތެރެއިން ވަޒީފާގައި ދެމިތިބުމަށް އެދޭ މީހުންނަށެވެ. އަދި ދައުލަތުގެ ވަޒީފާއެއް އަދާކޮށްފައިވާ ފަރާތްތަކުގެ ތެރެއިން މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 7 އަހަރު ކުރިން ފެންޝަން ޙައްގުވާ އުމުރު ހަމަވެ، ވަޒީފާއިން ވަކިވެފައިވާ މީހުންނަށް ވެސް ވަޒީފާ ހަމަޖައްސައިދެވިދާނެ ކަމަށް އުސޫލުތަކުގެ ތެރޭގައި ހިމަނާފައި ވެއެވެ.
މި ބިލު ޤާނޫނަކަށްވި ނަމަވެސް ސިފައިންނާއި، ފުލުހުންނާއި، ފަނޑިޔާރުން އަދި ޤާނޫނުއަސާސީއާއި ޤާނޫނެއްގެ ދަށުން އައްޔަންކުރެވޭ މަޤާމުތަކުގައި ތިއްބަވާ ފަރާތްތަކަށް އެ ޤާނޫނެއް ނުހިނގާނެއެވެ.
