ދިވެހި ރައްޔިތުންގެ ކަންބޮޑުވުންތަކަށް ޙައްލު ހޯއްދަވައިދެއްވުމަށް ޑރ. މުޢިއްޒު ކުރައްވަމުން އަންނަނީ ލާމަސީލު މަސައްކަތްތަކެއް
ރައީސް ޑރ. މުޙައްމަދު މުޢިއްޒުގެ ހަރުދަނާ ސިޔާސަތުތަކުގެ ތެރޭން ރައްުޔިތުންގެ ކަންބޮޑުވުންތަކަށް ޙައްލު ހޯއްދަވައި ދެއްވުމަށް ޓަކައި ކުރައްވަމުން އަންނަނީ ލާމަސީލު މަސައްކަތްތަކެކެވެ. އެއްވެސް ރައީސަކު އަޅައިނުލައްވާ ގޯހުން ގޯހަށްދާން ދޫކޮށްލައިފައި ހުރި އެތައް ކަމެއް މިހާރުވެސް ހަމަމަގަށް އަޅުވައި ދެއްވައިފިއެވެ.
އެތައް ވިޔަފާރިވެރިއަކު ދެކޮޅުހެދި ޑޮލަރުގެ މައްސަލަ ޙައްލުކުރުމަށް ސަރުކާރުން އެޅުއްވި ފިޔަވަޅު ތަންފީޒުކުރައްވަމުން އެބަ ދެއެވެ. އެ ކަމުގެ އެންމެ ހެޔޮ ބަދަލު މިހާތަނަށް ރައްޔިތުންނަށް ފެންނަ ކަމަށް ނުވިއަސް ލުއިފަސޭހަތަކެއް އެ ކަމުން ވެސް ރައްުޔިތުންނަށް އަންނަނީ ލިބެމުންނެވެ.
ވޭޕު މަނާކޮށް، ދުންފަތުގެ ވިހަ ދުމުން މުޖުތަމަޢު ސަލާމަތްކުރުމަށް ޓަކައި އެޅުއްވި ފިޔަވަޅުގެ ހެޔޮ ބަދަލު މުޖުތަމަޢުން ފެންނަމުން އެބަދެއެވެ. އެތައް ބެލެނިވެރިއެއްގެ ދުލުން އެ ތަޢުރީފުތައް ރައީސް މުއިއްޒަށް އެބަ ކުރައްވައެވެ.
ހަމައެއް ލަމައެއް ނެތި މި ޤައުމުގައި ބޭރުމީހުން ކުރަމުން އައި ވިޔަފާރިތައް އުސޫލެއްގެ ތެރޭން މިހާއު އެ އަންނަނީ ތަރުތީބުކުރައްވަމުންނެވެ. އަދިހަމައެހެންމެ ފާލުން ނެއްޓިފައި އޮތް ބިދޭސީންގެ މައްސަލަ ޤާނޫނީ ހަމައިގެ ތެރެއަށް ގެނެސް ފާލު އެޅުވުމަށް ކުރައްވަމުން ދަނީވެސް ނަމޫނާ މަސައްކަތެކެވެ. މި މަސައްކަތްތަކުގެ ނަފާ ދިވެހިންނަށް ކައިރި ތާރީޚެއްގައި ކުރާތަން ފެންނާނެއެވެ.
މީގެ އިތުރުން ފާހިޝް ކަންކަމަށް މަގު ފަހިވާ ގޮތަށް މިރާއްޖޭގައި ހިންގަމުންއައި ސަތޭކައެއްހާ މަސާޖުޕާލާ ބަންދުކޮށް ގޭންގުތައް ޑރ. މުޢިއްޒު ހުއްޓުވައިފިއެވެ. ބައެއް މީހުންނަށް އެއީ ދޮގު ކަމަށް ހީވިއަސް ފާއިތުވެ ދިޔަ 10ވަރަކަށް އަހަރާ އަޅައިބަލައި އިރު މުޖުތަމަޢު މިހާރު އަމާން ކަމަށް ދެންނެވުމަކީ ބޭއިންޞާފުން ދަންނަވައި ވާހަކައެއް ނޫނެވެ.
އެންސްޕާއާއި، އާސަންދަ ނިޒާމު ހަރުދަނާކޮށް ބޭސްފަރުވާގެ ކަންތައް ހަމަމަގަށް އެޅުވުމަށް ކުރައްވަމުންދާ މަސައްކަތްތަކުގެ ތެރޭން ކުރިން ނުލިބޭ އެތައް ޚިދުމަތްތަކެއް ލިބޭ ގޮތް ހަމަޖައްސައި ދެއްވައިފިއެވެ. ބޭސް ނުލިބޭތީ ރައްޔިތުން ކުރައްވާ ސަކުވާތައް ގަދަޔަސް އެކަން ވެސް ޑރ. މުޢިއްޒު ހަމަމަގަށް އަޅުއްވާ ކާމިޔާބުކުރައްވާނެއެވެ.
އެކަނިވެރި މައިންނާއި، ބަފައިންނާއި، ތެލެސީމިއާ ކުދިންނާއި، ޙާފިޒުންނަށްދޭ އެލަވަންސުތަކާއި، ސަރުކާރު މުވައްޒަފުންގެ މުސާރައަށް ހެޔޮ ބަދަލުތައް ގެނެސް ދެއްވައިފިއެވެ.
ގޯތި ގެދޮރު ގަނެ، ގެދޮރު ޢިމާރާތްކުރުމަށް އިންޓްރެސް ކުޑަ ލޯނު ލިބޭނެ ގޮތްތައް ރާއްޖޭގައި ފަހިކޮށް ދެއްވައި، އެ ކަމަށް އެދުނު ފަރާތްތަކަށް 900 މިލިއަން ރުފިޔާ ބޭންކުތަކުން ދޫކޮށްފިއެވެ.
އަތޮޅުތެރޭގެ މީހުން ކަންބޮޑުވާ ކަންތައްތަކެއް އުސޫލުގެ ތެރޭގައި ހުއްޓަސް، މި ހިނގާ ޖަނަވަރީމަހު ހުޅުވާލާ ބޯހިޔާވަހިކަމުގެ މަޝްރޫޢުގެ ތެރޭން ބޯހިޔާވަހިކަން ބޭނުންވާ ފަރާތްތަކުގެ ތެރޭން އެތައް ބަޔަކަށް ފުލެޓާއި، ގޯތި ލިބިގެން ދާނެއެވެ.
ފަތުރުވެރިކަމުގެ ސިނާއަތުން ނަފާ ހޯދައިދިނުމަށް ކައިރި ކައިރީގައި އެއަރޕޯޓު އެޅުމަކީ މުހިންމު ކަމެއް ކަމަށް ރައީސަށް ފެނިވަޑައިގަންނަވާތީއާއި، ބައެއް ރަށްރަށުގެ ރައްޔިތުން އެ ކަމަށް އެދޭތީ ވައިގެ ބަނދަރުތައް ބަރިބަރިއަށް ހެދިގެން އަންނަތަން ފެންނަން ފަށާނެއެވެ. ރޭގަނޑު ދަތުރުނުކުރެވޭ ހުރިހާ އެއަރޕޯޓަކަށް ރޭގަނޑު ދަތުރިކުރެވޭ ގޮތް މިހާރުވެސް އެ ވަނީ ހަމަޖައްސައި ދެއްވާފައެވެ.
މާލިއްޔަތުގެ އުޞޫލުގެ ތެރޭގައި ފާލުން ނެއްޓިފައި ހުރި ކަންކަން ވެސް ޤައުމުގެ މާލިއްޔަތަށް ބުރައަކަށް ނުވާނެ ގޮތަށް ރައީސް މިއަދު އެ ވަނީ ޙައްލުކުރައްވަން ފައްޓަވާފައެވެ. މި އުސޫލުތަކަށް ބަދަލު އަންނަ އިރު ނިކަމެތި ކަމެއް ބަޔަކަށް ލިބުނަސް ޤައިމުގެ ބައިތުލްމާލަން އާރޯކަން އެ ކަންކަމުން އަންނާނެއެވެ.
ރާއްޖޭގެ ސަރަޙައްދު ބެލެހެއްޓެވުން ހަރުދަނާ ކުރެއްވުމަށް ރައީސް މުޢިއްޒު އެޅުއްވި ހަރުދަނާ ފިޔަވަޅުތަކުގެ ހެޔޮ ފައިދާ ރައްޔިތުންނަށް މިއަދު އަންނަނީ ލިބެމުންނެވެ. އެ ކަމުގެ ސަބަބުން މުޖުތަމަޢުގެ ބިރަކަށް ވެފައި އޮތް މަސްތުވާތަކެތީގެ ވަބާ ބޮޑުތަނުން ކުޑަވަމުން އަންނަތަން މިހާރުވެސް އެބަ ފެނެއެވެ.
ބާނާ މަހަށް ފައިސާ ނުލިބޭތީ މުޒާހަރާ ކުރަމުން ދިޔަ މަސްވެރިންގެ ކަންބޮޑުވުން ވެސް އެހެން އެއްވެސް ރައީސަކު ނުކުރައްވާހާ ރަނގަޅަށް އެ ކަން ޙައްލުކޮށް ދެއްވައިފިއެވެ.
ޢުމްރާނީ ތަރައްޤީއަށް ވޭތުވެ ދިޔަ ދެ އަހަރުތެރޭ ބޭއްވި ގާބުރިއެއް ނެތް ކަމަށް ވާދަވެރިން ބުނުއްވާ އިރު، 50އަށް ވުރެ ގިނަ ރަށުގައި ކައުންސިލް އިދާރާ މަލެއް ފޮޅޭހެން ނިމެމުން އަންނަތަން އެބަ ފެނެއެވެ. ކުޅިވަރުގެ ދާއިރާއިން އެތައް މަޝްރޫޢުތަކެއް ދެ އަހަރުތެރޭ ނިންމައިފިއެވެ. އެތައް ރަށެއްގައި ޕޮލިސް ސްޓޭޝަން އަޅަމުން އެބައާދެއެވެ. މިސްކިއްތަކާއި، އިސްލާމީ މަތުކަޒުތައް ބިނާކުރަމުން އެބަ އާދެއެވެ. މަގުހެދުމާއި، ބިން ހިއްކުމުގެ މަޝްރޫޢުތަކާއި، ޞިއްޙީ ދާއިރާއިން ވެސް ގިނަ ޕްރޮޖެކްޓްތަކެއް ކުރިއަށް ދެއެވެ.
ލާމަރުކަޒީ ނިޒާމުގެ ޙަޤީޤީ ފައިދާ ރައްޔިތުންނަށް ހޯދައިދެއްވުމަށް ވެސް ޑރ. މުޢިއްޒު ހަރުދަނާ ފިޔަވަޅުތަކެއް އަޅުއްވައިފިއެވެ. ކޮންމެ ރަށެއްގައި އޭޓީއެމް ބަހައްޓައިފިއެވެ. ކޮންމެ އަތޮޅަކުން އައިޑީ ކާޑާއި، ޕާސްޕޯޓު ޕްރިންޓްކުރެވޭ ގޮތް ހަމަޖައްސަވައި ދެއްވައިފިއެވެ. ކައުންސިލުތަކަށް ފަޅުރަށް ދޭން ފައްޓައިފިއެވެ. ރަށްރަށުގައި ހިންގާ ވިޔަފާރިތަކާއި، ސިޓީ ހޮޓާތަކުން ލިބޭ ކުލީގެ ފައިސާ އެ ރަށްރަށަށް ލިބޭ ގޮތް ހަމަޖައްސައި ދެއްވައިފިއެވެ. އތމ ކޮމިޓީގެ މެންބަރުންނަށް ރަނގަޅު ގޮތްތަކެއް ހަމަޖައްސައި ދެއްވައިފިއެވެ. އަތޮޅު ފިހާރަތަކުން ލިބޭ ފައިސާ ކައުންސިލުތަކަށް ދިނުމަށް މިހާރު ވަނީ ނިންމާފައެވެ. ޑޮލަރު އޭޓީއެމްތައް ވެސް ޑޮލަރު ގެންގުޅޭ ރަށްރަށުގައި ބަހައްޓަން މިހާރު ވަނީ ފަށައިފައެވެ.
ޑރ. މުހައްމަދު މުޢިއްޒުގެ ޒަޢާމަތުގައި ނިމި ދިޔަ ދެ އަހަރު ކުރެއްވި މަސައްކަތްތަކަށް ބަޔަކު އޭ ރިޕޯޓު ނުދިނަސް އަޅުގަނޑު ދޭނީ އޭ ރިޕޯޓެވެ. އެ މަނިކުފާނު ކުރައްވަމުން އަންނަނީ ލާމަސީލު މަސައްކަތްތަކެވެ. އިންސާނުންގެ ޚިޔާލާއި، ދެކޭ ގޮތް ތަފާތުވުމަކީ ޠަބީޢީ ކަމެކެވެ.
