ރާއްޖޭގައި ބިނާކުރެވޭ އެންމެ ބޮޑު މިސްކިތް ހުޅުމާލޭގައި އެޅުމުގެ މަސައްކަތް ކުރިއަށް އޮތް 2026 ވަނަ އަހަރުތެރޭ ފައްޓަވާނެ ކަމަށް މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިނިސްޓަރ ޑރ. ޝަހީމް މި ކަން އިޢުލާންކުރެއްވީ އެމްއެމް ޓީވީގެ “ނިއުޅެމުންދާ ޚަބަރު” ޕްރޮގްރާމަށް ދެއްވި ބަސްދީގަތުމެއްގައެވެ. ތަފްޞީލުދެއްވަމުން މިނިސްޓަރ ވިދާޅުވީ އަންނަ އަހަރަކީ ރާއްޖެ އިސްލާމްވިތާ 900 އަހަރު ފުރޭ ތާރީޚީ އަަހަރަށް ވާތީ އަންނަ އަހަރު އެ މަޝްރޫޢު ފެށުމަށް ސަރުކާރުން ވަރަށް ބޮޑަށް މަސައްކަތްކުރައްވަމުން އަންނަ ކަމަށެވެ.
އެމްއެމް ޓީވީގެ “ނިއުޅެމުންދާ ޚަބަރު” ޕްރޮގްރާމަށް މިނިސްޓަރ ދެއްވި މި ބަސްދީ ގަތުމުގައި، ކުރީ އެއްވެސް ސަރުކާރަކަށް ދެ އަހަރުތެރޭ ނުފެށޭހާ ގިނަ ޢަދަދެއްގެ މަޝްރޫޢުތައް އެ މިނިސްޓްރީން މިހާރުވެސް ރާއްޖޭގެ އެކި ކަންކޮޅުތަކުގައި ކުރިއަށް ގެންދަވައި ކަމަށެވެ. އޭގެ ތެރޭގައި މިސްކިތްތަކާއި އިސްލާމީ މަރުކަޒުތައް ހިމެނޭ ކަމަށެވެ.
“އެއް ބިލިއަން ރުފިޔާއަށް ވުރެ އަގު ބޮޑު 70 އަށް ވުރެ ގިނަ މަޝްރޫޢު މި ވަގުތުވެސް ހިނގަމުން އެބަދޭ. ކުރިއަށް އޮތް 6 މަސްތެރޭ ހުޅުމާލޭގައި 5 މިސްކިތް ހުޅުވޭނެ. އެއީ ގާތްގަނޑަކަށް 3000 މީހުންގެ ޖާގަ.” މިނިސްޓަރ ޝަހީމް ވިދާޅުވިއެވެ.
