ޑައިރެކްޓަރ ފައްތާޙް ނުވަތަ ހއ. ކެލާ ކާނިގަސްދޮށުގޭ ޢަބްދުލްފައްތާޙް، ކުރިއަށް އޮތް ލޯކަލް ކައުންސިލް އިންތިޚާބުގައި ކެލާ ކައުންސިލްގެ ރައީސްކަމަށް ދިވެހިރާއްޖޭގެ ވެރިކަންކުރާ ޕާޓީ (ޕީއެންސީ)ގެ ޓިކެޓްގައި ވާދަކުރާ ގޮތަށް ހަމަޖެހިއްޖެއެވެ.
ފިލްމީ ދާއިރާ ދޫކޮށް 2018 ވަނަ އަހަރުން ފެށިގެން ފައްތާޙް ދިރިއުޅެމުން އަންނަނީ އަމިއްލަ ރަށް ކަމުގައިވާ ހއ. ކެލާގައެވެ. 2004 ވަނަ އަހަރު ފިލްމީ ދާއިރާއިން ޤައުމީ އިނާމު ޙާޞިލްކުރައްވާފައިވާ ފައްތާޙަކީ ކާމިޔާބު ޝަޚްޞެކެވެ. ހުރިހާ ދިމާއަކަށް ވެސް ފައްތާޙް ޕަރފެކްޓެވެ.
ދިރިއުޅުން ރަށަށް ބަދަލުކުރުމަށް ފަހު، އަމިއްލަ ގޭގައި ހުޅުވި ކުޑަ ކެފޭއިން ވެސް އެ ކަން މިއަދު އޭނާ އަންނަނީ ސާބިތުކޮށްދެމުންނެވެ. މޮޅު ޑައިރެކެޓަރެއް ފަދައިން އޭނާއަކީ މޮޅު ޝެފެކެވެ. އެހައިމެ ކުޅަދާނަ ވޭޓަރެކެވެ. އަދި މިއަދު އޭނާއަކީ މުވައްޒަފުން ނުހަނު ލޯބިވާ ބޮހެއް ވެސް މެއެވެ.
ރަށްފުށުގެ ސާދާ ދިރިއުޅުމާއި، ރަށުވަންތަކަން އަބަދުވެސް ދަމަހައްޓަމުން އަންނަ ފައްތާޙަކީ “14 ވިލޭރޭ”އާއި “ވެހޭ ވާރޭތެރޭން”އާއި “ދޯބައްޓާ”އާއި “ހިނިތުންވެލާށޭ ކަލާ”ގެ އިތުރުން “ތިއޭ މި ހިތުގެ ވިންދަކީ” ފަދަ ހިތްގައިމު ޑްރާމާތައް އުފައްދާ މި މުޖުތަމަޢަށް ގެނެސްދިން ކުޅަދާނަ ޑައިރެކްޓަރެވެ.
ރަނގަޅު ގޮތުގައި ކުނި މޭނޭޖުކުރުމަށް ޔޫއެންޑީޕީއާޢި، އެންވައިރަމެންޓް މިނިސްޓްރީއާ ގުޅިގެން 28 ރަށެއްގައި ހޭލުންތެރިކަން އިތުރުކުރުމުގެ ޕްރޮގްރާމު ހިންގާ، ދެ ރަށެއްގައި ކުނި މެނޭޖުކުރާ ގޮތް ދަސްކޮށްދިނުމުގެ މަސައްކަތް ފައްތާޙު ވަނީ ކުރައްވާފައެވެ. އެއީ ރ. އުނގޫފާރާއި، ގދ. ފަރެސްމާތޮޑާގައެވެ.
ކެލާ ކައުންސިލްގެ ރައީސްކަމަށް މި ފަހަރު އެންމެ ރަނގަޅު ޗޮއިސްއަކީ ފައްތާޙެވެ. ފައްތާޙަކީ ހީވާގި ބޭފުޅެކެވެ. މުރާލި ބޭފުޅެކެވެ. އޭނާގެ ކިބައިގާ ކެރުމާއި ހިތްވަރު އެބަ ހުއްޓެވެ. ޢިލްމީ ގޮތުން ޤާބިލުކަން އޭނާ އަންނަނީ ސާބިތުކޮށްދެމުންނެވެ. މީހުން ގޮވައިގެން އުޅުމުގެ ހުނަރުވެރިކަން އޭނާގެ ކިބައިގާ އެބަހުރި ވެސް މެއެވެ.
ފައްތާޙަކީ މިޒާޖުގެ ގޮތުން ވެސް ހުރިހާ ޢުމަރަކާ ގުޅޭ ޝަޚްޞިއްޔަތެކެވެ. އުޅޭ އުޅުމެވެ. ވާހާކަދެއްކުމުގައި ގެންގުޅުއްވާ ޚާއްޞަ ގާތްކަމެވެ. އޯގާތެރިކަމާއި، އަޅައިލުމެވެ. ނަތީޖާއެއްގެ ގޮތުން މިއަދު ފައްތާޙަކީ ކެލާ ޒުވާނުންގެ ވެސް ޚާއްޞަ ނަމެކެވެ. ޢުމުރުން ދޮށީ ބޭބޭފުޅުންނާއި، އިސްރަށްވެހިންގެ ވެސް ހޮވުމެކެވެ. އެ ކަން މި ފަހަރުގެ އިންތިޚާބުގައި ވޯޓުން ދައްކައިދޭނެކަމާ މެދު ޝައްކެއްނެތެވެ.
ވަކަރަށް ޖަހައިލަން ވެސް ފައްތާޙުގެ ނަން އިޚްތިޔާރުކުރުން މި ފަހަރު މުހިންމެވެ. ފެށިފައި ހުރި އަދި ފެށުމަށް ތައްޔާރުވަމުންދާ ޕްރޮޖެކްޓްތައް ރައްޔިތުން ބޭނުންވާ ގޮތަށް، ރަށުގައި ހިންގުމަށް ވެރިކަންކުރާ ޕީއެންސީގެ ރައީސަކު ކެލާ ކައުންސިލުގައި ހުރުން މުހިންމެވެ. އެހެން ޕާޓީއެއްގެ މީހަކަށް ވުރެ ސަރުކާރާއި، ދައުލަތުގެ ކުންފުނިތަކުގެ ދޮރުތަކުގައި އޭނާ ޖަހައި ޓަކި ބާރުވާނެތީއެވެ. އަދި ފައްތާޙަކީ އެންމެން ވެސް ދަންނަ މޫނަކަށް ވުމީ ކަންކަން ކާމިޔާބުކުރުމަށް އޭނައަށް އޮތް ފަހި ފުރުޞަތެކެވެ.
