ކޭވައިއެފް ސްޕޯރޓްސް އެކަޑަމީއާއި، ދިއްދޫގެ އެކަޑަމީއެއް ކަމަށްވާ، ދި ސްޕޯރޓްސް ހޭންޑްބޯލް އެކަޑަމީގެ ދަރިވަރުންގެ މެދުގައި ރަޙުމަތްތެރިކަމުގެ މެޗުތަކެއް މިއަދު ހަވީރު ކުޅޭ ގޮތަށް ހަމަޖެހިއްޖެއެވެ.
މިއަދު ހަވީރު ކެލާގައި ކުޅުމަށް ހަމަޖެހިފައިވާ މި މެޗުތަކުގެ ތެރޭގައި ގްރޭޑް 5އިން ދަށުގެ ކުދިންނަށް ޚާއްޞަކުރެވިފައިވާ މެޗަކާއި، ގްރޭޑް 6އިން މަތީގެ ދަރިވަރުންނަށް ޚާއްޞަކޮށްގެން ކުޅޭ މެޗެއް އޮންނާނެ ކަމަށް ކެލާ ޔޫތު ފޯރަމްގެ ރައީސް އިބްރާހީމް ޢާމިރު ޢުޘްމާން ވިދާޅުވިއެވެ.
ރަޙުމަތްތެރިކަމުގެ ހޭންޑްބޯލް މެޗުތައް ދޭތެރެ ދޭތެރެއިން އަތޮޅުގެ އެކަޑަމީތަކުގެ މެދުގައި މިހާރަކަށް އައިސް އަންނަނީ ކުޅެވެކުންނެވެ.
އުންމީދުކުރެވެނީ ފެށުމެއްގެ ގޮތުގައި ނަމަވެސް ކައިރި ތާރީޚެއްގައި ކޭވައިއެފް ސްޕޯރޓްސް އެކަޑަމީން އިންތިޒާމުކުރާ، އެކަޑަމީ ލީގެއް ހޭންޑްބޯލްއިން ބޭއްވޭނެ ކަމަށެވެ. މި ކަމުގައި އަތޮޅުގެ އެކަޑަމީތަކުގެ ފުރިހަމަ ތާއީދު ކެލާ ޔޫތު ފޯރަމަށް ލިބޭނެ ކަމަށެވެ.
