މިހާރު ވެރިކަންކުރަމުންދާ ޕާޓީން، އަންނަ ލޯކަލް ކައުންސިލް އިންތިޚާބުގައި ވާދަކުރަން ބޭނުންވާ ފަރާތްތަކުން ކުރިމަތިލުމުގެ ފުރުޞަތު ހުޅުވައިލައިފައިވާ އިރު، ކެލާގެ ތަރައްޤީއަށް މިހާތަނަށް އަޅައި އެންމެ މުހިންމު ފިޔަވަޅު އެޅުމަށް، ނިމި ދިޔަ ހަފުތާގައި ކެލާ ކައުންސިލުން އެ ވަނީ ނިންމާފައެވެ.
ވެރިކަންކުރާ ޕާޓީއަށް ނިސްބަތްވާ 5 ކައުންސިލަރުން ހިމެނޭ ކެލާ ކައުންސިލުން މި ދިޔަ ބުރާސްފަތި ދުވަހު ވަނީ 75 ހޯސްޕަވަރުގެ އެކްސްކަވޭޓަރެއް ސަޕްލައިކޮށްދިނުމުގެ އެއްބަސްވުމުގައި ސޮއިކޮށްފައެވެ.
ހޯމްސްޓެޑް ޕްރައިވެޓް ލިމިޓެޑާ ޙަވާލުކުރި މި އެކްސްކަވޭޓަރުގެ އަގަކީ 785990 (ހަތް ލައްކަ އައްޑިހަ ފަސްހާސް ނުވަ ސަތޭކަ ނުވަދިހަ ރުފިޔާ) އެވެ. މިއީ ކެލާ ކައުންސިލްގެ އެތައް ބޭނުންތަކެއް ފުދުމުގެ އިތުރުން ކައުންސިލްގެ މާލިއްޔާތަށް އާރޯކަން ގެނެސްދޭނެ އެކްސްކަވޭޓަރަކަށް ވެގެންދާނެއެވެ.
ލާމަރުކަޒީ ނިޒާމުން ވެރިކަން ހިންގުމުގެ ޙަޤީޤީ ބޭނުމަކީ ރައްޔިތުން ބާރުވެރިކުރުމެވެ. ރައްޔިތުންގެ ވެރިކަން ރައްޔިތުން ހިންގުމެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި ލާމަރުކަޒީ ނިޒާމު ހަރުދަނާ ކުރެއްވުމަށް އަޅުއްވަމުންދާ އެންމެ ހަރުދަނާ ފިޔަވަޅަކީ ވެސް މާލީ ގޮތުން ފުދުންތެރި ބަޔަކަށް ކައުންސިލުތައް ހެދުމެވެ.
ކައުންސިލަރުންގެ އަތްމައްޗަށް ރަށްތައް ހިންގުމުގެ މުގޫ ދޫކޮށްލައިފައި ވަނީ ރައްޔިތުންގެ މަޝްވަރާގެ ތެރޭން ރަށްތައް ތަރައްޤީކުރުމަށެވެ. ފާއިތުވެ ދިޔަ އެތައް ކައުންސިލަކަށް ނިންމަން ނުކެރުނު އެތައް ކަމެއް މިހާރު ހިނގަމުންދާ ކެލާގެ ކައުންސިލުން ކާމިޔާބުކަމާއެކު ވަނީ ނިންމާފައެވެ. އެހެނަސް ރައްޔިތުމީހާގެ ހިތުގައި ޖެހި ވިންދު ގާތުން އެންމެ ރަނގަޅަށް ބަލައިނުލެވުނު ކަން ގިނަ ބަޔަކު އަންނަނީ ފާހަގަކުރަމުންނެވެ.
ކަން މި ގޮތަށް އޮތަސް މި ފަހަރު ތިޔަ ހޯދަވަން ނިންމެވި އެކްސްކަވޭޓަރު ވެގެން ދާނީ ކެލާ ކައުންސިލަށް ރުފިޔާ ޖަހައިދޭ ތައްގަނޑަކަށެވެ. އަދި ކެރޭން ލޮރީއެއް ހޯދަން އިޢުލާނުކުރާނެ ނަމައޭ މަގޭ ހިތަށް އަރައެވެ.
