އުސް ފަރުބަދައެއްހެން ސިފަކުރެވޭ ކެލާގެ ކުނިގޮނޑު ސާފުކުރުމުގެ މަސައްކަތް ފައްޓައިގެން ކުރިއަށް އެބަދެއެވެ.
ގާތްގަނޑަކަށް 2450 މީހުންގެ އާބާދީއެއް އޮންނަ ކެލައަކީ އަތޮޅުގެ ނިސްބަތުން އުކާލަންޖެހޭ ކުނީގެ މިންވަރު މަދު ރަށެއްނޫނެވެ. މާރަށަކަށްވުމުންނާއި، ދަނޑުވެރިކަމުގެ އެތައް ބާވަތެއް ގޯތިތެރޭ ހައްދާ އުޅުމުގެ ސަބަބުން ވެސް ކުނި އުފެދޭ މިންވަރު ފުށި ރަށްރަށާ އަޅައިބަލައި އިރު އެތައް ތަނެއް ވަނީ އިތުރުވެފައެވެ.
ރަނގަޅު ގޮތުގައި ކުނި މެނޭޖު ނުކުރެވުމުގެ ސަަބަބުންނާއި، އެ ކަމަށް ބޭނުންވާ ފުރިހަމަ ވަސީލަތްތައް ނެތުމަކީ މި ފަދަ ކުނީގެ ފަރުބަދަތައް އިތުރުވުމަށް ރަށްރަށުގައި މެދުވެރިވާ ސަބަބެކެވެ.
ރައްޔިތުންގެ މަޖިލީހުގެ ކެލާ ދާއިރާގެ އެމްޕީ ޢަބްދުﷲ ޝަރީފުގެ ފޭސްބުކް ޕޯސްޓެއްގައި އިއްޔެ ބަޔާންކުރައްވާފައި ވަނީ ކެލާގެ މާ ސިންގާ ކުނިގޮނޑު ނެގުމުގެ މަސައްކަތް ފެށި ވާހަކައެވެ. އަދި މި ގޮނޑަކީ ވޭތުވެ ދިޔަ ދެ ސަރުކާރަށް ވެސް ކޮށްނުދެވި އޮތް މަސައްކަތެއްކަން އެ ޕޯސްޓްގައި އެމްޕީ ބަޔާންކުރައްވާފައި ވެއެވެ.
