ބޮޑުތަކުރުފާނުގެ ރަށުގައި މިހާރު ކުރިއަށްދާ ތިލައުތުރު ފުޓުސަލް މުބާރާތުން ޕޮއިންޓެއް ވެސް ނުލިބި، ކެލާ މުބާރާތާ އަލްވަދާޢު ކިޔައިފިއެވެ.
ކެލާ ޓީމަށް މުބާރާތް ނިމުނީ އިއްޔެ ހަވީރު މުރައިދޫއާ ބައްދަލުކުރި މެޗު 2-0 އިން ބަލިވެގެންނެވެ. މުބާރާތުގައި ކެލާ ޓީމު ކުޅުނު 3 މެޗުން ވެސް އެ ޓީމު ވަނީ ބަލިވެފައެވެ.
ތިލައުތުރު ފުޓްސަލް މުބާރާތުން ރަނގަޅު ހިސާބަކަށް ނުގޮސް ކެޓި، ކެލައަކީ ފުޓުބޯޅައިގެ ރީތި ތާރީޚެއް އޮތް ރަށެކެވެ. ތާރީޚީ ގޮތުން ބަލައި އިރު ރާއްޖޭގެ ފުޓުބޯޅަ ފެށުނީ ކެލާއިންނެވެ. އެންމެ ފުރަތަމަ އެޅުނު ފުޓުބޯޅަ ދަނޑު އޮތީ ވެސް ކެލާގައެވެ. އަދި ހަމައެއާއެކު ހއ. އަތޮޅުން އެންމެ އުހުގައި މިހާތަނަށް ފުޓުބޯޅަ ކުޅުނީ ވެސް ކެލާއިންނެވެ.
ތިލައުތުރު ފުޓުސަލް މުބާރާތުގައި ކެލާ ހިމެނުނު ގުރޫޕު ބީގެ މެޗުތައް ރޭ ނިމުނު އިރު ގުރޫޕުގެ 1 ވަނަ ޓީމުގެ ގޮތުގައި ސެމީ ކަށަވަރުކުރީ 9 ޕޮއިންޓާއެކު ދިއްދޫއެވެ. ދެ ވަނަ ޓީމުގެ ގޮތުގައި ސެމީން ޖާގަ ހޯދީ 6 ޕޮއިންޓާއެކު މުރައިދޫއެވެ. ގުރޫޕުން މުބާރާތް ނިމުނު އަނެއް ރަށަކީ ބާރަށެވެ. މުބާރާތާ ވަކިވި އިރު ބާރަށަށް ލިބިފައި ވަނީ 3 ޕޮއިންޓެވެ.
ހއ. އަތޮޅުން އިންތިޒާމުކޮށްގެން ކުރިއަށްގެންދާ ތިލައުތުރު ފުޓްސަލް މުބާރާތަކީ އަތޮޅުގައި ބާއްވާ އެންމެ ވާދަވެރި އަދި އެންމެ ފޯރި ގަދަ މުބާރާތެވެ. މި އަހަރު މި މުބާރާތް ކުރިއަށް ދަނީ އުތީމުގައެވެ.
މި މުބާރާތުގެ ތަށްޓާ ހަމައަށް ދެވޭނެ ފޮމިއުލާއެއް ކެލާއިން ހޯދުމަކީ ވަރަށް މުހިންމު ކަމެކެވެ. އެ ކަމުގއި އެންމެންގެ އެހީތެރިކަމާއި އެއްބާރުލުން ކެލާ ކައުންސިލަށް ދޭންޖެހެއެވެ. ފުޓްބޯޅައިގެ ގުރާސްރޫޓް އިތުރަށް ހަރުދަނާކުރަން ޖެހެއެވެ. ޒުވަނުންނަށް ފުޓްބޯޅައިން ހޯދައިދެވޭ ފުރުޞަތުތައް މިހާރަށް ވުރެ ގިނަކުރަން ޖެހެއެވެ.
