ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު)ގެ 149 ވަނަ މާއްދާގެ ދަށުން އަތޮޅު ކައުންސިލަށް ލިބިދޭ ބާރުގެ ތެރެއިން ދެމުން އަންނަ ތިލައުތުރު އެވޯޑް 2025ގެ ދެ ދާއިރާއަކުން ހއ. ކެލާ ކާނިގަސްދޮށުގޭ ޢާއިޝަތު ނަބީހާ އަމީނު، އެވޯޑް ޙާޞިލްކޮށްފިއެވެ.
ހއ. އަތޮޅުގެ ވެރިރަށް ކަމުގައިވާ ދިއްދޫގައި، ތިލައުތުރު އެވޯޑް ދިނުމަށް ރޭ ބޭއްވި ކުލަގަދަ ރަސްމިއްޔާތު ޝަރަފުވެރިކޮށްދެއްވީ ކުރީގެ ރައީސް އަލްފާޟިލް ޢަބްދުﷲ ޔާމީނެވެ. ތިލައުތުރު އެވޯޑް ދެމުން އަންނަނީ މައިގަނޑު 6 ދާއިރާއަކުންނެވެ.
އެ ދާއިރާތަކަކީ:
1. ތިލައުތުރު ޝަރަފުވެރިކަމުގެ އެވޯޑް
2. މަތީ ދަރަޖަ ހޯދާ ފަރާތްތަކަށްދޭ އެވޯޑް
3. ތިލައުތުރު ހިތްވަރުދިނުމުގެ އެވޯޑް
4. ތިލައުތުރު ޚާއްޞަ އެވޯޑް
5. ތިލައުތުރު ހިންގުންތެރިކަމުގެ އެވޯޑް
6. ތިލައުތުރު ޚާއްޞަ ޚިދުމަތުގެ އެވޯޑް
ޢާއިޝަތު ނަބީހާ އަމީނު، ޙާޞިލްކުރީ މަތީ ދަރަޖަ ހޯދާ ފަރާތްތަކަށްދޭ އެވޯޑާއި، ތިލައުތުރު ޚާއްޞަ އެވޯޑެވެ. ތިލަދުންމަތީ އުތުރުބުރީގެ އަރުތަވެރިންނަށް ދެއްވާ މި ފަޚުރުވެރި އެވޯޑްތައް ނަބީހާ ޙާޞިލްކޮށްފައި ވާތީ، ނަބިހާއަށާއި، ނަބީހާގެ ލޮބުވެތި މަންމައާއި، ބައްޕައަށް ތިލައުތުރު ނޫހުގެ ފަރާތުން ތަހުނިޔާ ކިޔަމެވެ.
ނަބީހާއަށް ލިބުނު ތިލައުތުރު އަރުތަވެރިންގެ ދެ އެވޯޑާ ވެސް ހަވާޅުވެލެއްވީ ނަބީހާގެ ބައްޕައެވެ.
ނަބީހާއަކީ، ތަޢުލީމީ ގޮތުން ފަޚުރުވެރި ކާމިޔާބީތަކެއް ޅަ ޢުމުރުގައި ވެސް ކެލައަށް ހޯދައިދެމުން އަންނަ ޢިލްމީ އަދި ތޫނުފިލި ދަރިވަރެކެވެ.
