މަދަނީ ޖަމުޢިއްޔާތައް ބާރުވެރިކުރުމުގެ މަޤުސަދުގައި އިއްޔެ ފެށި “މަދަނީ ޖަމުޢިއްޔާތަކުގެ ޤައުމީ ފޯރަމް” ގައި، ކެލާ ޔޫތު ފޯރަމް ބައިވެރިވެއްޖެއެވެ. މިއީ މަދަނީ ޖަމުޢިއްޔާތައް ހިންގުމުގައި ހުރި ދަތިތަކާއި، ގޮންޖެހުންތައް ދެނެގަނެ، އެ ގޮންޖެހުންތަކުން އަރައިގަތުމުގައި ޖަމުޢިއްޔާތަކުގެ ދައުރާ ގުޅޭ ގޮތުން ހޭލުންތެރިކަން އިތުރުކުރުމަށް ޒުވާނުންނާ ބެހޭ ވުޒާރާއިން ސިލްސިލާކޮށް ކުރިއަށްގެންދާ ފޯރަމެކެވެ. ކެލާ ޔޫތު ފޯރަމްގެ ފަރާތުން މި ފޯރަމްގައި ބައިވެރިވަނީ މަސްއޫލުވެރިޔާ އަޙްމަދު ވަޙީދު ޢަލީއެވެ.
69 މަދަނީ ޖަމްޢިއްޔާއިންނާއި، އ.ތ.މ ކޮމިޓީތަކުން 30 ކޮމިޓީއަކާއި، 6 އަތޮޅު ކައުންސިލަކުން ބައިވެރިވެން ދެ ދުވަހުގެ މުއްދަތަށް ކުރިއަށްގެންދާ މި ފޯރަމަކީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ މެނިފެސްޓޯގައި ހިމެނޭ ވައުދެކެވެ.
މީރުމާ މާލަމްގައި ކުރިއަށްދާ މި ފޯރަމް ފެށުމަށް އިއްޔެ ހެނދުނު ބޭއްވި ރަސްމިއްޔާތު ޝަރަފުވެރިކޮށްދެއްވާ ޒުވާނުންނާ ބެހޭ މިނިސްޓަރ އިބްރާހީމް ވަޙީދު ވިދާޅުވީ ރާއްޖޭގެ މަދަނީ ޖަމްޢިއްޔާތަކުގައި މަސައްކަތްކުރަނީ ހިލޭ ސާބަހަށް މަސައްކަތްކުރައްވާ ބައެއް ކަމަށެވެ. އެ ފަރާތްތަކަށް ލިބޭ މާލީ އެއްވެސް މަންފާއެއް ރާއްޖޭގައި ނޯންނަ ކަމަށެވެ.
“މަދަނީ ޖަމްޢިއްޔާތައް ބާރުވެރިކޮށްދޭން ޖެހޭ. މާލީ ގޮތުން ވެސް ތަނަވަސްކަން ހޯދައިދޭން ޖެހޭ. ޕްރޮގްރާމްތައް ހިންގުމަށް އެހީތެރިކަން ފޯރުކޮށްދޭން ޖެހޭ. ޤައުމުގައި ދިމާވާ ކަންކަމަށް ވަކި ކޮޅަކަށް ނުޖެހި ބަސްބުނާ ބަޔަކަށް މަދަނީ ޖަމްޢިއްޔާތައް ހަދަންޖެހޭ” މިނިސްޓަރ އިބްރާހީމް ވަޙީދު ވިދާޅުވިއެވެ. މި ރަސްމިއްޔާތުގައި ޒުވާނުންނާ ބެހޭ ވަޒީރު ދެއްކެވި ވާހަކަފުޅުގައި ގައުމީ ފެންވަރުގައި ބާއްވާ މި ފަދަ ފޯރަމްތަކުގެ ސަބަބުން ޖަމިއްޔާތަކުގެ ގާބިލުކަން އިތުރުވެ، ޖަމްޢިއްޔާތަކުގެ މަސައްކަތްތައް ފުޅާވެގެންދާނެ ކަމަށް ވިދާޅުވިއެވެ. އަދި މާލީ ގޮތުން ޖަމިއްޔާތައް ހަރުދަނާވެ، ދެމެހެއްޓެނިވި ގޮތެއްގައި ހިންގުމަށް މަގުފަހިވުމާއެކު، މުޖުތަމަޢުގެ ތަރައްޤީއަށް މުހިންމު ދައުރެއް އަދާކުރާ، ބާރުވެރި އަދި ހަރުދަނާ މުއައްސަސާތަކަކަށް މަދަނީ ޖަމްޢިއްޔާތައް ބަދަލުވެގެންދާނެކަމަށް ވެސް ވަޒީރު ވިދާޅުވި އެވެ.
